TITUS
Vetus Testamentum graece iuxta LXX interpretes
Part No. 417
Previous part

Chapter: 26 
Verse: 1    Καὶ ἔλαβεν πᾶς ὁ λαὸς τῆς γῆς τὸν Οζιαν, καὶ αὐτὸς δέκα καὶ ἓξ ἐτῶν, καὶ ἐβασίλευσαν αὐτὸν ἀντὶ τοῦ πατρὸς αὐτοῦ Αμασιου.
Verse: 2    αὐτὸς ᾠκοδόμησεν τὴν Αιλαϑ, αὐτὸς ἐπέστρεψεν αὐτὴν τῷ Ιουδα μετὰ τὸ κοιμηϑῆναι τὸν βασιλέα μετὰ τῶν πατέρων αὐτοῦ.
Verse: 3    υἱὸς δέκα ἓξ ἐτῶν ἐβασίλευσεν Οζιας καὶ πεντήκοντα καὶ δύο ἔτη ἐβασίλευσεν ἐν Ιερουσαλημ, καὶ ὄνομα τῇ μητρὶ αὐτοῦ Χαλια ἀπὸ Ιερουσαλημ.
Verse: 4    καὶ ἐποίησεν τὸ εὐϑὲς ἐνώπιον κυρίου κατὰ πάντα, ὅσα ἐποίησεν Αμασιας ὁ πατὴρ αὐτοῦ.
Verse: 5    καὶ ἦν ἐκζητῶν τὸν κύριον ἐν ταῖς ἡμέραις Ζαχαριου τοῦ συνίοντος ἐν ϕόβῳ κυρίου· καὶ ἐν ταῖς ἡμέραις αὐτοῦ ἐζήτησεν τὸν κύριον, καὶ εὐόδωσεν αὐτῷ κύριος.
Verse: 6    καὶ ἐξῆλϑεν καὶ ἐπολέμησεν πρὸς τοὺς ἀλλοϕύλους καὶ κατέσπασεν τὰ τείχη Γεϑ καὶ τὰ τείχη Ιαβνη καὶ τὰ τείχη ᾽Αζώτου καὶ ᾠκοδόμησεν πόλεις ᾽Αζώτου καὶ ἐν τοῖς ἀλλοϕύλοις.
Verse: 7    καὶ κατίσχυσεν αὐτὸν κύριος ἐπὶ τοὺς ἀλλοϕύλους καὶ ἐπὶ τοὺς ῎Αραβας τοὺς κατοικοῦντας ἐπὶ τῆς πέτρας καὶ ἐπὶ τοὺς Μιναίους.
Verse: 8    καὶ ἔδωκαν οἱ Μιναῖοι δῶρα τῷ Οζια, καὶ ἦν τὸ ὄνομα αὐτοῦ ἕως εἰσόδου Αἰγύπτου, ὅτι κατίσχυσεν ἕως ἄνω.
Verse: 9    καὶ ᾠκοδόμησεν Οζιας πύργους ἐν Ιερουσαλημ καὶ ἐπὶ τὴν πύλην τῆς γωνίας καὶ ἐπὶ τὴν πύλην τῆς ϕάραγγος καὶ ἐπὶ τῶν γωνιῶν καὶ κατίσχυσεν.
Verse: 10    καὶ ᾠκοδόμησεν πύργους ἐν τῇ ἐρήμῳ καὶ ἐλατόμησεν λάκκους πολλούς, ὅτι κτήνη πολλὰ ὑπῆρχεν αὐτῷ ἐν Σεϕηλα καὶ ἐν τῇ πεδινῇ καὶ ἀμπελουργοὶ ἐν τῇ ὀρεινῇ καὶ ἐν τῷ Καρμήλῳ, ὅτι ϕιλογέωργος ἦν.
Verse: 11    καὶ ἐγένετο τῷ Οζια δυνάμεις ποιοῦσαι πόλεμον καὶ ἐκπορευόμεναι εἰς παράταξιν εἰς ἀριϑμόν, καὶ ὁ ἀριϑμὸς αὐτῶν διὰ χειρὸς Ιιηλ τοῦ γραμματέως καὶ Μαασαιου τοῦ κριτοῦ διὰ χειρὸς Ανανιου τοῦ διαδόχου τοῦ βασιλέως.
Verse: 12    πᾶς ὁ ἀριϑμὸς τῶν πατριαρχῶν τῶν δυνατῶν εἰς πόλεμον δισχίλιοι ἑξακόσιοι,
Verse: 13    καὶ μετ' αὐτῶν δύναμις πολεμικὴ τριακόσιαι χιλιάδες καὶ ἑπτακισχίλιοι πεντακόσιοι· οὗτοι οἱ ποιοῦντες πόλεμον ἐν δυνάμει ἰσχύος βοηϑῆσαι τῷ βασιλεῖ ἐπὶ τοὺς ὑπεναντίους.
Verse: 14    καὶ ἡτοίμαζεν αὐτοῖς Οζιας πάσῃ τῇ δυνάμει ϑυρεοὺς καὶ δόρατα καὶ περικεϕαλαίας καὶ ϑώρακας καὶ τόξα καὶ σϕενδόνας εἰς λίϑους.
Verse: 15    καὶ ἐποίησεν ἐν Ιερουσαλημ μηχανὰς μεμηχανευμένας λογιστοῦ τοῦ εἶναι ἐπὶ τῶν πύργων καὶ ἐπὶ τῶν γωνιῶν βάλλειν βέλεσιν καὶ λίϑοις μεγάλοις· καὶ ἠκούσϑη ἡ κατασκευὴ αὐτῶν ἕως πόρρω, ὅτι ἐϑαυμαστώϑη τοῦ βοηϑηϑῆναι, ἕως οὗ κατίσχυσεν.
Verse: 16    Καὶ ὡς κατίσχυσεν, ὑψώϑη ἡ καρδία αὐτοῦ τοῦ καταϕϑεῖραι, καὶ ἠδίκησεν ἐν κυρίῳ ϑεῷ αὐτοῦ καὶ εἰσῆλϑεν εἰς τὸν ναὸν κυρίου ϑυμιάσαι ἐπὶ τὸ ϑυσιαστήριον τῶν ϑυμιαμάτων.
Verse: 17    καὶ εἰσῆλϑεν ὀπίσω αὐτοῦ Αζαριας ὁ ἱερεὺς καὶ μετ' αὐτοῦ ἱερεῖς τοῦ κυρίου ὀγδοήκοντα υἱοὶ δυνατοὶ
Verse: 18    καὶ ἔστησαν ἐπὶ Οζιαν τὸν βασιλέα καὶ εἶπαν αὐτῷ Οὐ σοί, Οζια, ϑυμιάσαι τῷ κυρίῳ, ἀλλ' ἢ τοῖς ἱερεῦσιν υἱοῖς Ααρων τοῖς ἡγιασμένοις ϑυμιάσαι· ἔξελϑε ἐκ τοῦ ἁγιάσματος, ὅτι ἀπέστης ἀπὸ κυρίου, καὶ οὐκ ἔσται σοι τοῦτο εἰς δόξαν παρὰ κυρίου ϑεοῦ.
Verse: 19    καὶ ἐϑυμώϑη Οζιας, καὶ ἐν τῇ χειρὶ αὐτοῦ τὸ ϑυμιατήριον τοῦ ϑυμιάσαι ἐν τῷ ναῷ, καὶ ἐν τῷ ϑυμωϑῆναι αὐτὸν πρὸς τοὺς ἱερεῖς καὶ ἡ λέπρα ἀνέτειλεν ἐν τῷ μετώπῳ αὐτοῦ ἐναντίον τῶν ἱερέων ἐν οἴκῳ κυρίου ἐπάνω τοῦ ϑυσιαστηρίου τῶν ϑυμιαμάτων.
Verse: 20    καὶ ἐπέστρεψεν ἐπ' αὐτὸν ὁ ἱερεὺς ὁ πρῶτος καὶ οἱ ἱερεῖς, καὶ ἰδοὺ αὐτὸς λεπρὸς ἐν τῷ μετώπῳ· καὶ κατέσπευσαν αὐτὸν ἐκεῖϑεν, καὶ γὰρ αὐτὸς ἔσπευσεν ἐξελϑεῖν, ὅτι ἤλεγξεν αὐτὸν κύριος.
Verse: 21    καὶ ἦν Οζιας ὁ βασιλεὺς λεπρὸς ἕως ἡμέρας τῆς τελευτῆς αὐτοῦ, καὶ ἐν οἴκῳ αϕϕουσωϑ ἐκάϑητο λεπρός, ὅτι ἀπεσχίσϑη ἀπὸ οἴκου κυρίου· καὶ Ιωαϑαμ ὁ υἱὸς αὐτοῦ ἐπὶ τῆς βασιλείας αὐτοῦ κρίνων τὸν λαὸν τῆς γῆς.
Verse: 22    καὶ οἱ λοιποὶ λόγοι Οζιου οἱ πρῶτοι καὶ οἱ ἔσχατοι γεγραμμένοι ὑπὸ Ιεσσιου τοῦ προϕήτου.
Verse: 23    καὶ ἐκοιμήϑη Οζιας μετὰ τῶν πατέρων αὐτοῦ, καὶ ἔϑαψαν αὐτὸν μετὰ τῶν πατέρων αὐτοῦ ἐν τῷ πεδίῳ τῆς ταϕῆς τῶν βασιλέων, ὅτι εἶπαν ὅτι Λεπρός ἐστιν· καὶ ἐβασίλευσεν Ιωαϑαμ υἱὸς αὐτοῦ ἀντ' αὐτοῦ.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.