შეიყუარო შენ უფალი ღმერთი შენი და დაიმარხნე მცნებანი მისნი Page of ms. S: 332V და წამებანი და სამართალნი მისნი და მსჯავრნი ყოველთა დღეთა ცხორებისა შენისათა.
და გულისჴმა-ჰყო დღეს, ვითარმედ: არა თუ ყრმანი თქუენნი, რომელთა არარა უწყიან და არცა იხილეს სწავლა იგი უფლისა ღმრთისა თქუენისა და საკჳრველებანი მისნი, ჴელი იგი მტკიცე და მკლავი იგი მაღალი,
სასწაულნი მისნი და საქმენი იგი მისნი, რომელ ჰყო უფალმან ღმერთმან ეგჳპტეს ფარაო მეფისა ზედა და ყოველსა ქუეყანასა მისსა
და რა-იგი უყო ერსა მას მეგჳპტელთასა, ეტლებსა და ჰუნებსა მათსა, ვითარიგი დაფარნა წყალმან ერჳთრისა მის ზღჳსამან წინაშე მდევართა თქუენთა, რამეთუ წარწყმიდნა იგინი უფალმან მოდღენდელად დღედმდე,
და რავდენ-რაჲ ყო თქუენთჳს უდაბნოსა მას, ვიდრე მოსლვად მოწევნადმდე ადგილსა ამას,
და რავდენი-რაჲ უყო დათანს და აბირონს, ძეთა მათ ელიაბისთა, ძისა რუბენისთა, ვითარ-იგი აღაღო ქუეყანამან პირი თჳსი და დაანთქნა იგინი და ყოველი სიმდიდრე ნაყოფისა მათისა და ყოველნი სახლნი მათნი და საყოფელნი მათნი შორის ძეთა მათ ისრაელისათა.
რამეთუ თუალთა თქუენთა იხილნეს ყოველნი საქმენი უფლისანი და საკჳრველებანი მისნი, რომელ ყვნა თქუენ შორის მოდღენდელად დღედმდე.
ეკრძალენით Page of ms. S: 333R დამარხვად ყოველთა მცნებათა მისთა. რომელ-ესე მე გამცნებ თქუენ დღეს, რაჲთა სცხონდეთ და განჰმრავლდეთ, და შეხჳდეთ და დაიმკჳდროთ ქუეყანა იგი, რომლისათჳს-ეგე წიაღ-ხუალთ იორდანესა დამკჳდრებად მუნ,
რაჲთა დღეგრძელ იყვნეთ ქუეყანასა მას ზედა, რომლისათჳს-იგი ეფუცა უფალი მამათა მათ თქუენთა მიცემად მათა და ნათესავისა მათისა შემდგომად მათსა ქუეყანასა, რომელსა გამოსდის სძე და თაფლი.
რამეთუ ქუეყანა იგი, რომელსა თქუენ შეხუალთ დამკჳდრებად, არა ეგრე არს, ვითარ-იგი ქუეყანა ეგჳპტელთა, ვინაიგი თქუენ გამოხუედით, რამეთუ რაჟამს დასთესიან თესლი და მორწყიან ფერჴითა მათითა, განქმნიან ვითარ ყუერბი მტილისა.
ხოლო ქუეყანა იგი, რომელსა თქუენ შეხუალთ დამკჳდრებად, ქუეყანა -- მთა და ბარი -- ცუარისაგან ზეცისასა ირწყვის იგი,
რომელსა-იგი უფალი ღმერთი თჳთ ღუწის და თუალნი უფლისა ღმრთისანი მას ზედა არიან დასაბამითგან წელიწადისათ და მიაღსასრულადმდე წელიწადისა.
უკუეთუ სმენით ისმინნეთ ყოველნი ესე მცნებანი ჩემნი, რომელთა-ესე დღეს გამცნებ თქუენ, და შეიყუაროთ უფალი ღმერთი თქუენი და ჰმსახურებდეთ მას ყოვლითავე გულითა Page of ms. S: 333V თქუენითა და ყოვლითა ძალითა თქუენითა,
მოგცეს უფალმან წჳმა ქუეყანასა თქუენსა ჟამსა შინა მისსა მსთუა და მცხუედი და შეიკრიბო შენ იფქლი შენი და ღჳნო შენი.
და მოგცეს შენ თივა ველთაგან შენთა საზრდელად საცხოვართა შენთა, ჰჭამდეღა და განსძღებოდი,
იგულე თავი შენი, ნუუკუე განჰსუქნე და განვრცნე და შეცთეს გული შენი და ჰმსახურებდეთ და თაყუანის-სცემდეთ ღმერთთა უცხოთა.
და განრისხნეს გულისწყრომით უფალი თქუენ ზედა და დააყენნეს ცანი და არა გამოსცეს წჳმა, და ქუეყანამან არა გამოსცეს ნაყოფი თჳსი, და წარსწყმდეთ მსთუად ქუეყანისა მისგან კეთილისა, რომელ-იგი უფალმან მოგცეს თქუენ.
დაისხენით მცნებანი ესე ჩემნი გულსა თქუენსა და გონებასა თქუენსა და შეიბნეთ იგი სასწაულად ჴელთა თქუენთა. და იყვნენ იგინი შეურყეველად წინაშე თუალთა თქუენთა.
და ასწავნეთ ესე შვილთა მათ თქუენთა. და იტყოდი ამას ჯდომასა სახლსა შენსა და სლვასა გზასა შენსა და დაწოლასა სარეცელსა შენსა და აღდგომასა შენსა.
და დასწერე ესე ზღურბლთა სახლისა თქუენისათა და ბჭეთა თქუენთა ზედა,
რაჲთა განმრავლდენ დღენი თქუენნი და დღენი ნაშობთა მათ თქუენთანი ქუეყანასა მას ზედა, Page of ms. S: 334R რომლისათჳს ეფუცა უფალი მამათა მათ თქუენთა მიცემად მათა, ვითარცა დღენი ცისანი ქუეყანასა ზედა.
და იყოს, უკუეთუ სმენით ისმინნეთ მცნებანი ესე ჩემნი, რომელთა-ესე მე გამცნებ თქუენ დღეს, და ჰყოთ ესე და შეიყუაროთ უფალი ღმერთი თქუენი და ხჳდოდით ყოველთა გზათა მისთა და შეეყვნეთ მას,
განასხნეს უფალმან ყოველნი წარმართნი პირისაგან თქუენისა და დაიმკჳდრნე შენ ნათესავნი დიდნი და უძლიერესნი შენსა.
ყოველსავე ადგილსა, რომელსაცა დასდგათ კუალი ფერჴისა თქუენისა, თქუენი იყოს უდაბნოთგან დიდით ვიდრე ლიბანედმდე და მდინარით დიდით ევფრატით და ვიდრე ზდუად დიდადმდე, დასავალით კერძო იყავნ საზღვარი თქუენი.
არავინ გიჴდებოდის თქუენ და არცაღა მო-ვინ-გექცეს პირსა თქუენსა, რამეთუ შიში და ზარი თქუენი მიჰფინოს უფალმან ღმერთმან თქუენმან ყოველსა მას ქუეყანასა, რომელსაცა მიხჳდოდით თქუენ, ვითარცა გეტყოდა თქუენ უფალი.
აჰა ესერა, მიგცემ თქუენ დღეს წყევასა და კურთხევასა.
კურთხევასა ამისთჳს, თუ ისმინნეთ მცნებანი უფლისა ღმრთისა თქუენისანი, რომელსაესე გამცნებ თქუენ დღეს დღე,
და წყევასა, არა თუ ისმინნეთ მცნებანი უფლისა ღმრთისა თქუენისანი და შესცთეთ გზისა მისგან, რომელი გამცენ თქუენ, და შეხჳდეთ და ჰმსახურებდეთ თქუენ ღმერთთა უცხოთა, რომელ არა იცოდეთ. Page of ms. S: 334V
და იყოს, რაჟამს შეგიყვანოს შენ უფალმან ღმერთმან შენმან ქუეყანასა მას, რომელსა შეხუალ დამკჳდრებად მუნ, და მისცე კურთხევა იგი მთასა მას ზედა გარიზინსა და წყევა იგი -- მთასა მას ზედა გებალსა.
ესე ორნივე წიაღ იორდანესა, გზასა მას მზის დასავალით კერძოსა, ქუეყანასა მას ქანანელთასა, რომელი დამკჳდრებულ არს მზის დასავალით კერძო თანაშე გალგალსა, მახლობელად მუხასა მას მადალსა.
აწ თქუენ, ეგერა, წიაღ-ხუალთ იორდანესა შესლვად და დამკჳდრებად ქუეყანისა მის, რომელ-იგი უფალმან ღმერთმან თქუენმან მოგცეს თქუენ, დაიმკჳდროთ იგი და დაეშენნეთ მუნ.
და დაიმარხნეთ და ჰყოთ ყოველი ესე მცნება და სამართალი, რომელსა-ესე გამცნებ თქუენ დღეს.
