TITUS
Vetus Testamentum graece iuxta LXX interpretes
Part No. 436
Previous part

Chapter: 9 
Verse: 1    καὶ ἀναστὰς Εσδρας ἀπὸ τῆς αὐλῆς τοῦ ἱεροῦ ἐπορεύϑη εἰς τὸ παστοϕόριον Ιωαναν τοῦ Ελιασιβου
Verse: 2    καὶ αὐλισϑεὶς ἐκεῖ ἄρτου οὐκ ἐγεύσατο οὐδὲ ὕδωρ ἔπιεν πενϑῶν ὑπὲρ τῶν ἀνομιῶν τῶν μεγάλων τοῦ πλήϑους.
Verse: 3    καὶ ἐγένετο κήρυγμα ἐν ὅλῃ τῇ Ιουδαίᾳ καὶ Ιερουσαλημ πᾶσι τοῖς ἐκ τῆς αἰχμαλωσίας συναχϑῆναι εἰς Ιερουσαλημ·
Verse: 4    καὶ ὅσοι ἂν μὴ ἀπαντήσωσιν ἐν δυσὶν ἢ τρισὶν ἡμέραις κατὰ τὸ κρίμα τῶν προκαϑημένων πρεσβυτέρων, ἀνιερωϑήσονται τὰ κτήνη αὐτῶν, καὶ αὐτὸς ἀλλοτριωϑήσεται ἀπὸ τοῦ πλήϑους τῆς αἰχμαλωσίας.
Verse: 5    Καὶ ἐπισυνήχϑησαν οἱ ἐκ τῆς ϕυλῆς Ιουδα καὶ Βενιαμιν ἐν τρισὶν ἡμέραις εἰς Ιερουσαλημ [οὗτος ὁ μὴν ἔνατος τῇ εἰκάδι τοῦ μηνός],
Verse: 6    καὶ συνεκάϑισαν πᾶν τὸ πλῆϑος ἐν τῇ εὐρυχώρῳ τοῦ ἱεροῦ τρέμοντες διὰ τὸν ἐνεστῶτα χειμῶνα.
Verse: 7    καὶ ἀναστὰς Εσδρας εἶπεν αὐτοῖς ῾Υμεῖς ἠνομήσατε καὶ συνῳκίσατε γυναῖκας ἀλλογενεῖς τοῦ προσϑεῖναι ἁμαρτίαν τῷ Ισραηλ·
Verse: 8    καὶ νῦν δότε ὁμολογίαν δόξαν τῷ κυρίῳ ϑεῷ τῶν πατέρων ἡμῶν
Verse: 9    καὶ ποιήσατε τὸ ϑέλημα αὐτοῦ καὶ χωρίσϑητε ἀπὸ τῶν ἐϑνῶν τῆς γῆς καὶ ἀπὸ τῶν γυναικῶν τῶν ἀλλογενῶν.
Verse: 10    καὶ ἐϕώνησαν ἅπαν τὸ πλῆϑος καὶ εἶπον μεγάλῃ τῇ ϕωνῇ Οὕτως ὡς εἴρηκας ποιήσομεν·
Verse: 11    ἀλλὰ τὸ πλῆϑος πολὺ καὶ ἡ ὥρα χειμερινή, καὶ οὐκ ἰσχύομεν στῆναι αἴϑριοι καὶ οὐχ εὕρομεν, καὶ τὸ ἔργον ἡμῖν οὐκ ἔστιν ἡμέρας μιᾶς οὐδὲ δύο· ἐπὶ πλεῖον γὰρ ἡμάρτομεν ἐν τούτοις.
Verse: 12    στήτωσαν δὲ οἱ προηγούμενοι τοῦ πλήϑους, καὶ πάντες οἱ ἐκ τῶν κατοικιῶν ἡμῶν, ὅσοι ἔχουσιν γυναῖκας ἀλλογενεῖς, παραγενηϑήτωσαν λαβόντες χρόνον·
Verse: 13    καὶ ἑκάστου δὲ τόπου τοὺς πρεσβυτέρους καὶ τοὺς κριτὰς ἕως τοῦ λῦσαι τὴν ὀργὴν τοῦ κυρίου ἀϕ' ἡμῶν τοῦ πράγματος τούτου.
Verse: 14    Ιωναϑας Αζαηλου καὶ Ιεζιας Θοκανου ἐπεδέξαντο κατὰ ταῦτα, καὶ Μοσολλαμος καὶ Λευις καὶ Σαββαταιος συνεβράβευσαν αὐτοῖς.
Verse: 15    καὶ ἐποίησαν κατὰ πάντα ταῦτα οἱ ἐκ τῆς αἰχμαλωσίας.
Verse: 16    καὶ ἐπελέξατο ἑαυτῷ Εσδρας ὁ ἱερεὺς ἄνδρας ἡγουμένους τῶν πατριῶν αὐτῶν, κατ' ὄνομα πάντας, καὶ συνεκάϑισαν τῇ νουμηνίᾳ τοῦ μηνὸς τοῦ δεκάτου ἐτάσαι τὸ πρᾶγμα.
Verse: 17    καὶ ἤχϑη ἐπὶ πέρας τὰ κατὰ τοὺς ἄνδρας τοὺς ἐπισυνέχοντας γυναῖκας ἀλλογενεῖς ἕως τῆς νουμηνίας τοῦ πρώτου μηνός.
Verse: 18    Καὶ εὑρέϑησαν τῶν ἱερέων οἱ ἐπισυναχϑέντες ἀλλογενεῖς γυναῖκας ἔχοντες·
Verse: 19    ἐκ τῶν υἱῶν ᾽Ιησοῦ τοῦ Ιωσεδεκ καὶ τῶν ἀδελϕῶν Μασηας καὶ Ελεαζαρος καὶ Ιωριβος καὶ Ιωδανος·
Verse: 20    καὶ ἐπέβαλον τὰς χεῖρας ἐκβαλεῖν τὰς γυναῖκας αὐτῶν, καὶ εἰς ἐξιλασμὸν κριοὺς ὑπὲρ τῆς ἀγνοίας αὐτῶν.
Verse: 21    καὶ ἐκ τῶν υἱῶν Εμμηρ Ανανιας καὶ Ζαβδαιος καὶ Μανης καὶ Σαμαιος καὶ Ιιηλ καὶ Αζαριας.
Verse: 22    καὶ ἐκ τῶν υἱῶν Φαισουρ Ελιωναις, Μασσιας, Ισμαηλος καὶ Ναϑαναηλος καὶ Ωκιδηλος καὶ Σαλϑας.
Verse: 23    καὶ ἐκ τῶν Λευιτῶν· Ιωζαβδος καὶ Σεμεϊς καὶ Κωλιος [οὗτος Καλιτας] καὶ Παϑαιος καὶ Ωουδας καὶ Ιωανας·
Verse: 24    ἐκ τῶν ἱεροψαλτῶν Ελιασιβος, Βακχουρος·
Verse: 25    ἐκ τῶν ϑυρωρῶν Σαλλουμος καὶ Τολβανης.
Verse: 26    ἐκ τοῦ Ισραηλ· ἐκ τῶν υἱῶν Φορος Ιερμας καὶ Ιεζιας καὶ Μελχιας καὶ Μιαμινος καὶ Ελεαζαρος καὶ Ασιβιας καὶ Βανναιας·
Verse: 27    ἐκ τῶν υἱῶν Ηλαμ Ματανιας καὶ Ζαχαριας, Ιεζριηλος καὶ Ωβαδιος καὶ Ιερεμωϑ καὶ Ηλιας·
Verse: 28    καὶ ἐκ τῶν υἱῶν Ζαμοϑ Ελιαδας, Ελιασιμος, Οϑονιας, Ιαριμωϑ καὶ Σαβαϑος καὶ Ζερδαιας·
Verse: 29    καὶ ἐκ τῶν υἱῶν Βηβαι Ιωαννης καὶ Ανανιας καὶ Ζαβδος καὶ Εμαϑις·
Verse: 30    καὶ ἐκ τῶν υἱῶν Μανι Ωλαμος, Μαμουχος, Ιεδαιος, Ιασουβος καὶ Ασαηλος καὶ Ιερεμωϑ·
Verse: 31    καὶ ἐκ τῶν υἱῶν Αδδι Νααϑος καὶ Μοοσσιας, Λακκουνος καὶ Ναϊδος καὶ Βεσκασπασμυς καὶ Σεσϑηλ καὶ Βαλνουος καὶ Μανασσηας·
Verse: 32    καὶ ἐκ τῶν υἱῶν Ανναν Ελιωνας καὶ Ασαιας καὶ Μελχιας καὶ Σαββαιας καὶ Σιμων Χοσαμαιος·
Verse: 33    καὶ ἐκ τῶν υἱῶν Ασομ Μαλτανναιος καὶ Ματταϑιας καὶ Σαβανναιους καὶ Ελιϕαλατ καὶ Μανασσης καὶ Σεμεϊ·
Verse: 34    καὶ ἐκ τῶν υἱῶν Βαανι Ιερεμιας, Μομδιος, Μαηρος, Ιουηλ, Μαμδαι καὶ Πεδιας καὶ Ανως, Καραβασιων καὶ Ελιασιβος καὶ Μαμνιταναιμος, Ελιασις, Βαννους, Ελιαλις, Σομεϊς, Σελεμιας, Ναϑανιας· καὶ ἐκ τῶν υἱῶν Εζωρα Σεσσις, Εζριλ, Αζαηλος, Σαματος, Ζαμβρις, Ιωσηπος·
Verse: 35    καὶ ἐκ τῶν υἱῶν Νοομα Μαζιτιας, Ζαβαδαιας, Ηδαις, Ιουηλ, Βαναιας.
Verse: 36    πάντες οὗτοι συνῴκισαν γυναῖκας ἀλλογενεῖς· καὶ ἀπέλυσαν αὐτὰς σὺν τέκνοις.
Verse: 37    Καὶ κατῴκησαν οἱ ἱερεῖς καὶ οἱ Λευῖται καὶ οἱ ἐκ τοῦ Ισραηλ ἐν Ιερουσαλημ καὶ ἐν τῇ χώρᾳ. τῇ νουμηνίᾳ τοῦ ἑβδόμου μηνός καὶ οἱ υἱοὶ Ισραηλ ἐν ταῖς κατοικίαις αὐτῶν
Verse: 38    καὶ συνήχϑη πᾶν τὸ πλῆϑος ὁμοϑυμαδὸν ἐπὶ τὸ εὐρύχωρον τοῦ πρὸς ἀνατολὰς τοῦ ἱεροῦ πυλῶνος
Verse: 39    καὶ εἶπον Εσδρα τῷ ἀρχιερεῖ καὶ ἀναγνώστῃ κομίσαι τὸν νόμον Μωυσέως τὸν παραδοϑέντα ὑπὸ τοῦ κυρίου ϑεοῦ Ισραηλ.
Verse: 40    καὶ ἐκόμισεν Εσδρας ὁ ἀρχιερεὺς τὸν νόμον παντὶ τῷ πλήϑει ἀπὸ ἀνϑρώπου ἕως γυναικὸς καὶ πᾶσιν τοῖς ἱερεῦσιν ἀκοῦσαι τοῦ νόμου νουμηνίᾳ τοῦ ἑβδόμου μηνός·
Verse: 41    καὶ ἀνεγίγνωσκεν ἐν τῷ πρὸ τοῦ ἱεροῦ πυλῶνος εὐρυχώρῳ ἀπὸ ὄρϑρου ἕως μεσημβρινοῦ ἐνώπιον ἀνδρῶν τε καὶ γυναικῶν, καὶ ἐπέδωκαν πᾶν τὸ πλῆϑος τὸν νοῦν εἰς τὸν νόμον.
Verse: 42    καὶ ἔστη Εσδρας ὁ ἱερεὺς καὶ ἀναγνώστης τοῦ νόμου ἐπὶ τοῦ ξυλίνου βήματος τοῦ κατασκευασϑέντος,
Verse: 43    καὶ ἔστησαν παρ' αὐτῷ Ματταϑιας, Σαμμους, Ανανιας, Αζαριας, Ουριας, Εζεκιας, Βααλσαμος ἐκ δεξιῶν,
Verse: 44    καὶ ἐξ εὐωνύμων Φαδαιος, Μισαηλ, Μελχιας, Λωϑασουβος, Ναβαριας, Ζαχαριας.
Verse: 45    καὶ ἀναλαβὼν Εσδρας τὸ βιβλίον τοῦ νόμου ἐνώπιον τοῦ πλήϑους προεκάϑητο γὰρ ἐπιδόξως ἐνώπιον πάντων
Verse: 46    καὶ ἐν τῷ λῦσαι τὸν νόμον πάντες ὀρϑοὶ ἔστησαν. καὶ εὐλόγησεν Εσδρας τῷ κυρίῳ ϑεῷ ὑψίστῳ ϑεῷ σαβαωϑ παντοκράτορι,
Verse: 47    καὶ ἐπεϕώνησεν πᾶν τὸ πλῆϑος Αμην, καὶ ἄραντες ἄνω τὰς χεῖρας προσπεσόντες ἐπὶ τὴν γῆν προσεκύνησαν τῷ κυρίῳ.
Verse: 48    ᾽Ιησοῦς καὶ Αννιουϑ καὶ Σαραβιας, Ιαδινος, Ιακουβος, Σαββαταιος, Αυταιας, Μαιαννας καὶ Καλιτας, Αζαριας καὶ Ιωζαβδος, Ανανιας, Φαλιας οἱ Λευῖται ἐδίδασκον τὸν νόμον κυρίου καὶ πρὸς τὸ πλῆϑος ἀνεγίνωσκον τὸν νόμον τοῦ κυρίου ἐμϕυσιοῦντες ἅμα τὴν ἀνάγνωσιν.
Verse: 49    καὶ εἶπεν Ατταρατης Εσδρα τῷ ἀρχιερεῖ καὶ ἀναγνώστῃ καὶ τοῖς Λευίταις τοῖς διδάσκουσι τὸ πλῆϑος ἐπὶ πάντας
Verse: 50    ῾Η ἡμέρα αὕτη ἐστὶν ἁγία τῷ κυρίῳ καὶ πάντες ἔκλαιον ἐν τῷ ἀκοῦσαι τοῦ νόμου ·
Verse: 51    βαδίσαντες οὖν ϕάγετε λιπάσματα καὶ πίετε γλυκάσματα καὶ ἀποστείλατε ἀποστολὰς τοῖς μὴ ἔχουσιν,
Verse: 52    ἁγία γὰρ ἡ ἡμέρα τῷ κυρίῳ· καὶ μὴ λυπεῖσϑε, ὁ γὰρ κύριος δοξάσει ὑμᾶς.
Verse: 53    καὶ οἱ Λευῖται ἐκέλευον τῷ δήμῳ παντὶ λέγοντες ῾Η ἡμέρα αὕτη ἁγία, μὴ λυπεῖσϑε.
Verse: 54    καὶ ᾤχοντο πάντες ϕαγεῖν καὶ πιεῖν καὶ εὐϕραίνεσϑαι καὶ δοῦναι ἀποστολὰς τοῖς μὴ ἔχουσιν καὶ εὐϕρανϑῆναι μεγάλως,
Verse: 55    ὅτι καὶ ἐνεϕυσιώϑησαν ἐν τοῖς ῥήμασιν, οἷς ἐδιδάχϑησαν. καὶ ἐπισυνήχϑησαν. //




Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.