TITUS
Vetus Testamentum graece iuxta LXX interpretes
Part No. 69
Previous part

Chapter: 19 
Verse: 1    Τοῦ δὲ μηνὸς τοῦ τρίτου τῆς ἐξόδου τῶν υἱῶν Ισραηλ ἐκ γῆς Αἰγύπτου τῇ ἡμέρᾳ ταύτῃ ἤλϑοσαν εἰς τὴν ἔρημον τοῦ Σινα.
Verse: 2    καὶ ἐξῆραν ἐκ Ραϕιδιν καὶ ἤλϑοσαν εἰς τὴν ἔρημον τοῦ Σινα, καὶ παρενέβαλεν ἐκεῖ Ισραηλ κατέναντι τοῦ ὄρους.
Verse: 3    καὶ Μωυσῆς ἀνέβη εἰς τὸ ὄρος τοῦ ϑεοῦ· καὶ ἐκάλεσεν αὐτὸν ὁ ϑεὸς ἐκ τοῦ ὄρους λέγων Τάδε ἐρεῖς τῷ οἴκῳ Ιακωβ καὶ ἀναγγελεῖς τοῖς υἱοῖς Ισραηλ
Verse: 4    Αὐτοὶ ἑωράκατε ὅσα πεποίηκα τοῖς Αἰγυπτίοις, καὶ ἀνέλαβον ὑμᾶς ὡσεὶ ἐπὶ πτερύγων ἀετῶν καὶ προσηγαγόμην ὑμᾶς πρὸς ἐμαυτόν.
Verse: 5    καὶ νῦν ἐὰν ἀκοῇ ἀκούσητε τῆς ἐμῆς ϕωνῆς καὶ ϕυλάξητε τὴν διαϑήκην μου, ἔσεσϑέ μοι λαὸς περιούσιος ἀπὸ πάντων τῶν ἐϑνῶν· ἐμὴ γάρ ἐστιν πᾶσα ἡ γῆ·
Verse: 6    ὑμεῖς δὲ ἔσεσϑέ μοι βασίλειον ἱεράτευμα καὶ ἔϑνος ἅγιον. ταῦτα τὰ ῥήματα ἐρεῖς τοῖς υἱοῖς Ισραηλ.
Verse: 7    ἦλϑεν δὲ Μωυσῆς καὶ ἐκάλεσεν τοὺς πρεσβυτέρους τοῦ λαοῦ καὶ παρέϑηκεν αὐτοῖς πάντας τοὺς λόγους τούτους, οὓς συνέταξεν αὐτῷ ὁ ϑεός.
Verse: 8    ἀπεκρίϑη δὲ πᾶς ὁ λαὸς ὁμοϑυμαδὸν καὶ εἶπαν Πάντα, ὅσα εἶπεν ὁ ϑεός, ποιήσομεν καὶ ἀκουσόμεϑα. ἀνήνεγκεν δὲ Μωυσῆς τοὺς λόγους τοῦ λαοῦ πρὸς τὸν ϑεόν.
Verse: 9    εἶπεν δὲ κύριος πρὸς Μωυσῆν ᾽Ιδοὺ ἐγὼ παραγίνομαι πρὸς σὲ ἐν στύλῳ νεϕέλης, ἵνα ἀκούσῃ ὁ λαὸς λαλοῦντός μου πρὸς σὲ καὶ σοὶ πιστεύσωσιν εἰς τὸν αἰῶνα. ἀνήγγειλεν δὲ Μωυσῆς τὰ ῥήματα τοῦ λαοῦ πρὸς κύριον.
Verse: 10    εἶπεν δὲ κύριος πρὸς Μωυσῆν Καταβὰς διαμάρτυραι τῷ λαῷ καὶ ἅγνισον αὐτοὺς σήμερον καὶ αὔριον, καὶ πλυνάτωσαν τὰ ἱμάτια·
Verse: 11    καὶ ἔστωσαν ἕτοιμοι εἰς τὴν ἡμέραν τὴν τρίτην· τῇ γὰρ ἡμέρᾳ τῇ τρίτῃ καταβήσεται κύριος ἐπὶ τὸ ὄρος τὸ Σινα ἐναντίον παντὸς τοῦ λαοῦ.
Verse: 12    καὶ ἀϕοριεῖς τὸν λαὸν κύκλῳ λέγων Προσέχετε ἑαυτοῖς τοῦ ἀναβῆναι εἰς τὸ ὄρος καὶ ϑιγεῖν τι αὐτοῦ· πᾶς ὁ ἁψάμενος τοῦ ὄρους ϑανάτῳ τελευτήσει.
Verse: 13    οὐχ ἅψεται αὐτοῦ χείρ· ἐν γὰρ λίϑοις λιϑοβοληϑήσεται ἢ βολίδι κατατοξευϑήσεται· ἐάν τε κτῆνος ἐάν τε ἄνϑρωπος, οὐ ζήσεται. ὅταν αἱ ϕωναὶ καὶ αἱ σάλπιγγες καὶ ἡ νεϕέλη ἀπέλϑῃ ἀπὸ τοῦ ὄρους, ἐκεῖνοι ἀναβήσονται ἐπὶ τὸ ὄρος.
Verse: 14    κατέβη δὲ Μωυσῆς ἐκ τοῦ ὄρους πρὸς τὸν λαὸν καὶ ἡγίασεν αὐτούς, καὶ ἔπλυναν τὰ ἱμάτια.
Verse: 15    καὶ εἶπεν τῷ λαῷ Γίνεσϑε ἕτοιμοι τρεῖς ἡμέρας, μὴ προσέλϑητε γυναικί.
Verse: 16    ἐγένετο δὲ τῇ ἡμέρᾳ τῇ τρίτῃ γενηϑέντος πρὸς ὄρϑρον καὶ ἐγίνοντο ϕωναὶ καὶ ἀστραπαὶ καὶ νεϕέλη γνοϕώδης ἐπ' ὄρους Σινα, ϕωνὴ τῆς σάλπιγγος ἤχει μέγα· καὶ ἐπτοήϑη πᾶς ὁ λαὸς ὁ ἐν τῇ παρεμβολῇ.
Verse: 17    καὶ ἐξήγαγεν Μωυσῆς τὸν λαὸν εἰς συνάντησιν τοῦ ϑεοῦ ἐκ τῆς παρεμβολῆς, καὶ παρέστησαν ὑπὸ τὸ ὄρος.
Verse: 18    τὸ δὲ ὄρος τὸ Σινα ἐκαπνίζετο ὅλον διὰ τὸ καταβεβηκέναι ἐπ' αὐτὸ τὸν ϑεὸν ἐν πυρί, καὶ ἀνέβαινεν ὁ καπνὸς ὡς καπνὸς καμίνου, καὶ ἐξέστη πᾶς ὁ λαὸς σϕόδρα.
Verse: 19    ἐγίνοντο δὲ αἱ ϕωναὶ τῆς σάλπιγγος προβαίνουσαι ἰσχυρότεραι σϕόδρα· Μωυσῆς ἐλάλει, ὁ δὲ ϑεὸς ἀπεκρίνατο αὐτῷ ϕωνῇ.
Verse: 20    κατέβη δὲ κύριος ἐπὶ τὸ ὄρος τὸ Σινα ἐπὶ τὴν κορυϕὴν τοῦ ὄρους· καὶ ἐκάλεσεν κύριος Μωυσῆν ἐπὶ τὴν κορυϕὴν τοῦ ὄρους, καὶ ἀνέβη Μωυσῆς.
Verse: 21    καὶ εἶπεν ὁ ϑεὸς πρὸς Μωυσῆν λέγων Καταβὰς διαμάρτυραι τῷ λαῷ, μήποτε ἐγγίσωσιν πρὸς τὸν ϑεὸν κατανοῆσαι καὶ πέσωσιν ἐξ αὐτῶν πλῆϑος·
Verse: 22    καὶ οἱ ἱερεῖς οἱ ἐγγίζοντες κυρίῳ τῷ ϑεῷ ἁγιασϑήτωσαν, μήποτε ἀπαλλάξῃ ἀπ' αὐτῶν κύριος.
Verse: 23    καὶ εἶπεν Μωυσῆς πρὸς τὸν ϑεόν Οὐ δυνήσεται ὁ λαὸς προσαναβῆναι πρὸς τὸ ὄρος τὸ Σινα· σὺ γὰρ διαμεμαρτύρησαι ἡμῖν λέγων ᾽Αϕόρισαι τὸ ὄρος καὶ ἁγίασαι αὐτό.
Verse: 24    εἶπεν δὲ αὐτῷ κύριος Βάδιζε κατάβηϑι καὶ ἀνάβηϑι σὺ καὶ Ααρων μετὰ σοῦ· οἱ δὲ ἱερεῖς καὶ ὁ λαὸς μὴ βιαζέσϑωσαν ἀναβῆναι πρὸς τὸν ϑεόν, μήποτε ἀπολέσῃ ἀπ' αὐτῶν κύριος.
Verse: 25    κατέβη δὲ Μωυσῆς πρὸς τὸν λαὸν καὶ εἶπεν αὐτοῖς.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.