ყოველი ოქრო, რომელი შეემსახურა საქმესა მას ყოვლისა მისებრ საქმისა წმიდათასა, იყო ოქროსა მის შესაწირავისა ოცდაცხრა ქანქარი და შჳდასოცდაათ სიკლა სიკლითა მით წმიდითა.
და ვეცხლი, შეწირული აღრაცხილთა მათგან კაცთა კრებულისათა, ათას ქანქარ და ათასშჳდას და სამეოცდაათხუთმეტ სიკლა.
დრაქმა ერთი თავად-თავად ნაზოგალი სიკლისა მის წმიდისა. ყოველი ერი წარმოვიდა აღხილვასა მას ოცით წლითგან და უზეშთაესი, სამეოცისა მის ბევრისა და სამ ათას ხუთას ერგასისისა.
და იყო ათი იგი ქანქარი ვეცხლისა გამოსადნობელად დასხმითსა სუეტის თავებად კარვისა მის და სუეტის თავად კრეთსაბმელისა. ასი სუეტის თავები ასისა მის ქანქარისა, ქანქარი ერთი იყო სუეტის თავი ერთი.
და შჳდას სამეოცდათხუთმეტი სიკლა ქმნეს იდაყუებად სუეტებისა მის და ოქროცხებულ-ყო უეტის თავები იგი.
და რვალი იგი შესაწირავისა სამეოცდა ათვრამეტ ქანქარ და ორ ათას ოთხას სიკლა.
და ქმნა მისგან ხარისხები იგი ბჭეთა მათ კარვისა საწამებელისათა.
და ხარისხები ეზოსა მის გარემო და ხარისხები ბჭეთა მათ ეზოსათა და მანაებად კარვისა და მანაებად ეზოსა მის გარემო.
და მოსადგმელი იგი რვალისა გარემო საკურთხეველსა და ყოველი ჭურჭელი საკურთხეველისა და ყოველივე საქმარი საკურთხეველისა მის საწამებელისა.
და ყვნეს ეგრე ძეთა ისრაელისათა, ვითარცა უბრძანა უფალმან მოსეს.
ხოლო ნეშტი იგი ოქროსა მის შეწირულისა ქმნეს სამსახურებელად წინაშე უფლისა.
და ნეშტი იგი იაკინთისა, და ძოწეულისა, და მეწამულისა, და ზეზისა ქმნეს სამოსლად სამსახურებელად აჰრონისა, რათა ჰმსახურებდეს მათ სიწმიდესა მას შინა.
და მოიღეს სამოსელი იგი მოსეს წინაშე და კარავი იგი, და ყოველი ჭურჭელი მისი, და მოქლონები, და ხარისხები მისი და სუეტები.
და კიდობანი იგი შჯულისა და აღსაპყრობელნი იგი მის[ნ]ი.
და საკურთხეველი, და ყოველი ჭურჭელი თავებისა, და საკმეველი იგი აღზავებისა და სასანთლე იგი წმიდა.
და სანთელნი იგი მისნი, სანთელნი სანთებელნი და ზეთი იგი ნათლისა.
და ტაბლა იგი წინაშე დასაგებელი და ყოველივე სანოვაგე ჭურჭელი მისი და პურნი იგი შესაწირავნი.
და სამოსლები იგი სიწმიდისანი აჰრონისნი მღდელობისანი და სამოსელნი იგი ძეთა ისრაელისათანი სამღდელონი.
და საბურველი იგი წარმოსაყოფელი ეზოსა, სუეტნი და ხარისხნი მისნი, და კრეთსაბმელი იგი კარისა მის კარვისა და ბჭისა მის ეზოსა და ყოველი ჭურჭელი კარვისა და ყოველი საქმარი მისი.
და მაშკები იგი ტყავებსა ვერძთასა ენდროს ფერი და საბურველი იგი ტყავებისა მის სიავისათა და სხუათა მათ სახურველები.
და მანაები იგი ყოველივე საქმარი საქმრისა მის კარვისა საწამებელისა.
რაოდენი უბრძანა უფალმან მოსეს, ეგრე ყვეს ძეთა ისრაელისათა ყოველივე იგი მომზადებაჲ.
და იხილა მოსე ყოველივე იგი ქმნული და მოემზადა იგი, ვითარცა უბრძანა უფალმან მოსეს, ეგრეთ მუნ ქმნა(!) იგი. და აკურთხნა იგინი მოსე.
