Page of ms. O: 75r ... ჴელი შენი. და გამოიღო და იყო ჴელი მისი სპეტაკ ვითარცა თოვლი.
და მერმე კუალად ჰრქუა: შეყავ ჴელი შენი წიაღთა შენთა. და შეყო ჴელი მისი წიაღადვე მისა და გამოყო ჴელი თჳსი წიაღთაგან და კუალად მოეგო ფერსავე ჴორცთა მისთასა.
უკუეთუ არა ჰრწმენეს შენი, არცა ისმინონ ჴმისა შენისაჲ სასწაულისა მის პირველისაჲ, ჰრწმენეს შენი და ჴმისა მის სასწაულისა მეორისაჲ ისმინონ შენი.
და იყოს, უკუეთუ არა ჰრწმენეს შენი ორთაჲ მათ სასწაულთაჲ და არცა ისმინონ ჴმისა შენისაჲ, მოიღო წყლისა მისგან მდინარისა და დასთხიო იგი ჴმელსა ზედა და იყოს წყალი იგი, რომელ მოიღო მდინარისა მისგან, სისხლ ქუეყანასა ზედა.
ჰრქუა მოსე უფალსა: გევედრები შენ, უფალო, ვერ. შემძლებელ ვარ გუშინდითგან და ძუღუანდითგან, არცა ვინაჲთგან იწყე სიტყუად მსახურისა შენისა, რამეთუ ჴმა-წულილ და ენა-მძიმე ვარ მე.
ჰრქუა ღმერთმან მოსეს: ვინ მოსცა პირი კაცთა, ანუ ვინ შექმნა მსმენელი და ყრუჲ, ... ანუ არა მე უფალმან ღმერთმან?
ხოლო აწ ვიდოდე შენ და მე აღვაღო პირი შენი და გასწაო შენ, რასა იტყოდი.
და ჰრქუა მოსე: გევედრები შენ, უფალო, გამო-ვინ-იძიე შემძლებელი სხუაჲ, რომელი მიავლინო.
განრისხნა Page of ms. O: 75v უფალი გულის წყრომით მოსეს ზედა და თქუა: ანუ არა ეგერა აჰრონ, ძმაჲ შენი ლევიტელი? ვიცი, რამეთუ სიტყჳთ გეტყოდის იგი შენ. და აჰა-ეგერა იგი გამოგეგებვოდის შემთხუევად შენდა და გიხილოს შენ და განიხაროს გულსა თჳსსა.
და უთხრნე მას სიტყუანი ესე და მისცნე სიტყუანი ჩემნი პირსა მისსა და მე აღვაღო [პირი შენი და] პირი მისი და გასწავო თქუენ, რაჲ ჰყოთ.
და მან გატყუას შენ ერისა მიმართ და იგი იყოს პირ შენდა და შენ ეყო მას ღმრთისა მიერ.
და კუერთხი ეგე, რომელ გარდაიქცა გუელად, მიიღე ჴელითა შენითა, რომლითა ჰყოფდე მით სასწაულებსა.
წარმოვიდა მიერ მოსე და მიიქცა იოთორისა, სიმამრისა თჳსისა, და ჰრქუა მას: წარვიდე და მივიქცე მე ძმათა ჩემთა, რომელნი არიან ეგჳპტეს, და ვიხილნე იგინი, ცოცხალ.ღა თუ არიანა. ჰრქუა იოთორ მოსეს: გუალე, ვიდოდე ცოცხლებით! შემდგომად დღეთა მრავალთა მოკუდა მეფჱ იგი ეგჳპტელთაჲ.
ჰრქუა უფალმან მოსეს მადიამს შინა: გუალე და ვიდოდე ეგჳპტედ, რამეთუ მოწყდეს ყოველნი, რომელნი ეძიებდეს სულსა შენსა.
წარმოიყვანა მოსე ცოლი თჳსი და ყრმანი და ასხნა იგინი კარაულებსა და მოიქცა ეგჳპტედ...
ჰრქუა უფალმან Page of ms. O: 76r მოსეს: მი-რაჲ -ხჳდოდი შენ და მიიქცე ეგჳპტედ. იხილე, ნიშები იგი ყოველი, რომელი მიგეც ჴელსა შენსა, ქმენ წინაშე ფარაოჲსსა. ხოლო მე განვაფიცხო გული ფარაოჲსი და არა გამოუტევოს ერი ჩემი.
შენ არქუ ფარაოს: ამას იტყჳს უფალი: ძჱ ჩემი პირმშოჲ ისრაჱლი.
გარქუ შენ: გამოუტევე ერი ჩემი, რაჲთა მსახურებდენ მე. უკუეთუ არა ინებო გამოვლინებად, იხილე, მე მოვკლა ძჱ შენი პირმშოჲ.
იყო გზასა ზედა სავანესა მას შეემთხჳა მას ანგელოზი უფლისაჲ და ეგულვა მოკლვაჲ მისი.
და მოიღო სეფორა ქასრი და წინა-დასცჳთა წინა-დაცუეთილებაჲ ძისა თჳსისაჲ და შეუვრდა ფერჴთა მისთა და თქუა: დადგა სისხლი წინა-დაცუეთილებისა ძისა ჩემისაჲ.
და წარვიდა მისგან ანგელოზი იგი, რამეთუ თქუა: დადგა სისხლი წინა დაცუეთისაჲ ყრმისა ჩემისაჲ.
ჰრქუა უფალმან აჰრონს: განვედ შენ და მიეგებვოდე შენ მოსეს უდაბნოდ. განვიდა და შეემთხჳა მას მთასა მას ზედა ღმრთისასა და ამბორს უყვეს ურთიერთას.
და უთხრნა მოსე აჰრონს ყოველნი ესე სიტყუანი ღმრთისანი, რომელთათჳს მოვლინა, და ყოველნი ესე სამართალნი, რომელი ამცნო მას.
მოვიდეს მოსე და აჰრონ და შეკრიბნეს მოხუცებულნი ძეთა ისრაჱლისათანი.
და ეტყოდა Page of ms. O: 76v აჰრონ ყოველთავე მათ სიტყუათა, რომელთა ეტყოდა ღმერთი მოსეს, და ქმნნა სასწაულნი წინაშე ერისა მის.
ჰრწმენა ერსა მას და განიხარეს, რამეთუ მოჰხედა უფალმან ერსა თჳსსა, ძეთა ისრაჱლისათა, და რამეთუ იხილა ჭირი იგი მათი. მოდრკეს ერი იგი და თაყუანის-სცეს უფალსა.
