და მომიყვანა მე მზის-აღმოსავალად კერძო, რომელი ჰხედვიდა ადგილი, და განმიყვანა მე გარჱ.
და ესერა დიდებაჲ ღმრთისა ისრაჱლისაჲ მოვიდოდა გზასა მას მზის-აღმოსავალით კერძოსა, და ჴმაჲ ბანაკისა მისისაჲ ვითარცა ბმაჲ ორწილად სიმრავლეთაჲ მრავალთაჲ; და ქუეყანაჲ ბრწ<ყ>ინვიდა ვითარცა ნათელი დიდებისა მისისაგან გარემო.
და ხილვა<ჲ>, რომელ ვიხილე, იყო ხილვისა მის-ებრ, ოდეს შევიდოდე ცხებად ქალაქისა; და ხილვაჲ იგი ჩუენებისაჲ, რომელ ვიხილე, ხილვისა მის-ებრ იყო, რომელი ვიხილე მდინარესა მას ქობარისასა. და მე დავვარდი პირსა ზედა ჩემსა.
და დიდებაჲ უფლისაჲ შევიდა ტაძარსა მას გზასა მას ოდენ, რომელი ჰხედავს ბჭესა მას მზის-აღმოსავალისასა.
და აღმიღო მე სულმან, და შემიყვანა მე ეზოსა მას შინაგანსა, და აჰა ესერა სავსე იყო დიდებითა უფლისაჲთა ტაძარი იგი.
და დავდეგ, და აჰა ესერა ჴმაჲ ტაძრით გამო, და მეტყოდა მე, და კაცი იგი დგა მახლობელად ჩემსა.
და მრქუა მე, იხილეა, ძეო კაცისაო, ადგილი საყდრისა ჩემისაჲ, და ადგილი კუალთა ფერჴთა ჩემთაჲ, რომელსა შინა დამკჳდრებულ არს სახელი <წმიდაჲ> ჩემი შორის სახლსა ისრაჱლისასა საუკუნოდ, და არა შეაგინონ ამიერითგან სახლმან ისრაჱლისამან სახელი წმიდაჲ ჩემი მათ და მთავართა მათთა, სიძვითა მათითა და კაცის-კლვითა წინამძღუართა მათთაჲთა შორის მათსა.
დადგმითა მათითა წინაშე კარსეთა ჩემთა კართა Page of ms. J: B107r მათთაჲთა, და ზღრუბლნი/ ჩემნი მახლობელად ზღრუბლთა მათთა, და ყვეს კედელი ჩემი ვითარცა შეპყრობილი ჩემი და მათი, და შეაგინებდეს სახელსა წმიდასა ჩემსა უშჯულოებითა მათითა, რომელსა იქმოდეს. შევმუსრენ იგინი გულის-წყრომითა ჩემითა და მოსრვითა.
და აწ განიშოვრნედ სიძვანი მათნი და კაცის-კლვანი მთავართა მათთანი ჩემ წინაშე, და დავემკჳდრო მათ შორის საუკუნოდ.
და შენ, ძეო კაცისაო, უჩუენე სახლსა ისრაჱლისასა ტაძარი ესე ჩემი, და დასცხრედ ცოდვათა მათთაგან, და ხილვაჲ მისი და განწესებულებაჲ მისი.
და მათ მიიღონ ტანჯვაჲ მათი ყოველთათჳს საქმეთა მათთა, რომელ ქმნ<ნ>ეს, და გამოუხატო მათ სახლი ესე, და გამოსავალნი მისნი, და ძალი მისი, და ყოველნივე ბრძანებანი მისნი, და ყოველი შჯულიერებაჲ მისი აუწყე მათ, და გამოუხატე იგი წინაშე მათსა, და დაიცვნედ ყოველნი სამართალნი ჩემნი და ყოველნი ბრძანებანი ჩემნი, და ჰყოფდედ მათ.
და გამოხატვაჲ იგი სახლისაჲ მის თხემსა ზედა მის მთისასა, და ყოველნი საზღვარნი მისნი გარემო წმიდაჲ წმიდათაჲ არს.
და ესე საზომი არს საკურთხეველისაჲ მის წყრთითა წყრთა და ციდ წიაღად ღრმა წყრთადმდე, და წყრთა ერთ სივრცჱ, და გ<რ>ძილი გარემო ბაკოთა მისთა მტკაველ ერთ, და ესე სიმაღლჱ ს<ა>კურთხეველისაჲ მის.
სიღრმითგან წიაღისა მისისაჲთ სალხინებელად დიდად მიმართ ქუემო კერძო წყრთით ორით, და სივრცჱ წყრთა ერთ, და სალხინებელით მცირით სალხინებელად დიდადმდე წყრთითა ოთხ, და სივრცე წყრთა ერთ.
და არიელი წყრთითა ოთხ, და არიელითგან ვიდრე ზემო რქათამდე წყრთა ერთ.
და არიელი ათორმეტ წყრთა სიგრძით წყრთა მიმართ ათორმეტად ოთხ-კედლად ოთხთავე კიდეთა მისთა.
და სალხინებელი იგი წყრთა Page of ms. J: B107v ათოთხმეტ სივრცე ოთხად მიმართ ადგიდ მისა, და გრძილი მისი/ გარემოჲს გარემო მრგულ<ი>ად ზოგი წყრთისაჲ, და გარემოჲ მისი წყრთა ერთ გარეშე კერძო; და კიბენი მისნი ჰხედვიდეს აღმოსავალად კერძო.
და მრქუა მე; ძეო კაცისაო; ამას იტყჳს უფალი ღმერთი ისრაჱლისაჲ; ესე არს ბრძანებაჲ საკურთხეველისაჲ დღესა მას საქმისა მისისასა შეწირვად მას ზედა ყოვლად-დასაწუველნი, და პკურებად მას ზედა სისხლისა.
და მისცე ლევიტელთა მათ მღდელთა ნათესავსა სადუკისთა, რომელნი მომეახლებოდიან მე, იტყჳს უფალი ღმერთი, მსახურებად ჩემდა, ჴბოჲ ზროხათაგანი ცოდვისათჳს.
და მოიღონ სისხლისა მისისაგანი, და სცხონ ოთხთა რქათა საკურთხეველისათა და ოთხთა კიდეთა სალხინებელისათა და ხარისხთა გარემო; ლხინება ყონ მისთჳს.
და მოიღონ ჴბოჲ იგი, რომელ ცოდვისათჳს არს, და დაწუან იგი განშორებულსა ადგილსა მის ტაძრისასა გარეშჱ სიწმიდეთა მათ.
<და> მეორესა დღესა მოიხუნენ ორნი თიკანნი თხათაგან უბიწოთა ცოდვისათჳს, და ლხინება ყონ სალხინებელისა მისთჳს, ვითარცა ლხინება ყვეს ჴბოჲთა მით.
და შემდგომად დასრულებისა მის ლხინებისა შესწირო ჴბოჲ ზროხათაგან უბიწოჲ, და ვერძი ცხოვართაგან უბიწოჲ.
და შესწიროთ წინაშე უფლისა, და დაასხან მას ზედა <მღდელთა> მარილი, და შეწირონ იგი ყოვლად-მწუვარად უფლისა.
შჳდ დღე შესწირვიდე თიკანსა ცოდვისათჳს დღითი დღედ, და ჴბოჲ ზროხათაგან და ვერძი ცხოვართაგან უბიწონი შეწირნოდიან
შჳდ დღჱ, და ლხინებაჲ ყონ საკურთხეველისა მისთჳს, და განწმიდონ იგი, და აღავსნენ ჴელნი მათნი.
და <ი>ყოს მერვით დღითგან და მიმართ, შესწირვიდენ მღდელნი მრგულიად-დასაწუველთა თქუენთა საკურთხეველსა მას ზედა ყოვლად-დასაწუველთა თქუენთა, და ცხოვრებისა თქუენისათჳს, და შეგიწყნარნე თქუენ, იტყჳს ადონაჲ უფალი.;/ Page of ms. J: B108r
