და განყოფასა თქუენსა ქუეყანისასა სამკჳდრებელად, განუჩემოთ უფალსა პირველ ნაყოფად სიწმიდედ ქუეყანისაგან ოც და ხუთ ათასი წყრთაჲ სიგრძით, და სივრცით ოც ათასი. წმიდა იყოს ყოველთა შორის საზღვართა მისთა გარემო.
და იყოს ამისგანი სიწმიდედ ხუთასი წყრთაჲ ხუთასსა ზედა მოთხვილად გარემო, და ერგასის წყრთა განშოვრებულ გარემო.
და ამის განზომისა-ებრ განჰზომო სიგრძჱ ოც და ხუთი ათასი, და სივრცჱ ოც ათასი; და მას შინა იყოს წმიდაჲ წმიდათაჲ.
<ქუე>ყანისა მისგან იყოს მღდელთა, რომელნი ჰმსახურებდენ სიწმიდესა მას შინა, და იყოს რომელნი მიეახლებოდიან უფალსა მსახურებად, და იყოს მათა სახლებად განჩემებულად სიწმიდედ მათა.
ოც და ხუთ ათასად სიგრძით, და ოც ათას სივრცით, და ლევიტელთა, რომელნი ჰმსახურებდენ ტაძარსა მას ღმრთისასა მათა დაპყრობად ქალაქი სამკჳდრებელად.
დასაპყრობელად ქალაქი მისცე ხუთ ათასი სივრცით, და სიგრძით ოც და ხუთ ათასი, ვითარცა პირველ ნაყოფი იგი წმიდათაჲ ყოვლისა სახლისა ისრაჱლისა იყოს.
და წინამძღუარსა მას ამისგან და მისგან პირველ ნაყოფად წმიდათა და სამკჳდრებელად ქალაქისა, წინაშე პირველ ნაყოფთა მათ წმიდათასა, და წინაშე პირსა სამკჳდრებელისა მის ქალაქისასა ზღჳთ კერძო და ზღჳთ მომართ მზის-აღმოსავალად, და სიგრძჱ ვითარცა ერთი ნაწილთაგანი საზღვართა ზღჳს კერძოთაჲ, და სიგრძჱ საზღვრად კერძო მზის-აღმოსავალად ქუეყან<ის>ად.
და იყოს მათა სამკჳდრებლად ისრაჱლსა შორის, და არღარა ჰმძლავრობდენ Page of ms. J: B110r მთავარნი ისრაჱლისანი ერსა ჩემსა, და ქუეყანაჲ დაიმკჳდრონ/ ძეთა ისრაჱლისათა ტოჰმად-ტოჰმადმან მათმან.
ამას იტყჳს უფალი ღმერთი; კმა იყავნ თქუენდა, მთავარნო ისრაჱლისანო, სიცრუვჱ და უბადრუკებაჲ განიშოვრეთ, და განკითხვასა და სიმართლესა იქმოდეთ, და აღიღეთ მძლავრობაჲ ერისაგან ჩემისა, იტყჳს უფალი ღმერთი.
სასწორი მართალი და საწყაული სიმართლისაჲ და კაბიწი სიმართლისაჲ იყავნ თქუენდა საწყაულად.
და კაბიწი იგი ეგრევე ერთი იყოს მოღებად და მიცემად; მეათჱ ჴჳმირისაჲ კაბიწი, და მეათჱ ჴჳმირისაჲ, ჴჳმირისა მის-ებრ იყოს სწორად.
და სასწორი ოც და ხუთ ობოლი; ათხუთმეტი სიკლაჲ მნაჲ იგი იყავნ თქუენი.
და ესე არს პირველ ნაყოფი, რომელი განაჩინოთ. საწყაული ჴჳმირისაგან იფქლისა, და მეექუსჱ მისი სათველი ოც და ათისაგან გრივისა ქრთილისა.
და ბრძანებაჲ ზეთისაჲ ასისაგან გუერდისა ათი გუერდი, და ათისაგან გუერდისა ერთი გუერდი, რამეთუ ათი გუერდი არს გომორ.
და ათისაგან ცხოვრისა ერთი ცხოვარი შესაწირავად ყოველთაგან ტოჰმთა ისრაჱლისათა საკლველად და ყოვლად-დასაწუველად, <და> საცხოვრებელად რაჲთა ლხინება იყოს თქუენთჳს, იტყჳს უფალი ღმერთი.
და ყოველმან ერმან მოსცეს პირველი ნაყოფი მთავარსა მას ისრაჱლისასა,
და მთავრისა მისგან იყოს ყოვლად-დასაწუველნი იგი, და საკლველნი, და შესაწირავნი დღესასწაულთა და თთჳს-თავთა და შაბათთა, და ყოველთა დღესასწაულთა სახლისა ისრაჱლისათა, მანვე ყოს ცოდვისათჳს, და შესაწირავი და ყოვლად-დასაწუველნი და ცხორებისაჲ სალხინებელად სახლისათჳს ისრაჱლისაჲ.
ამას იტყჳს უფალი ღმერთი; პირველსა თთუესა, ერთსა მის თთჳსასა, მოიბათ ჴბოჲ ზროხათაგან უბიწოჲ სალხინებელად სიწმიდისა.
და მოიღოს მღდელმან მან სისხლისა მისგან სალხინებელისა, და სცხოს Page of ms. J: B110v წყირთლთა კარისათა და ოთხთა საკიდურთა ტაძრისათა/ და საკურთხეველსა და წყირთლთა ბჭისა მის შინაგანისა ეზოჲსათა.
და ეგრეთვე ყოს თთუესა მას მეშჳდესა, ერთსა მის თჳსასა, მოიღოს თითოეულისაგან შესაწირავი, და ლხინება ყოს სახლისა მისთჳს.
და პირველსა მას თთუესა, მეათოთხმეტესა თთჳსასა, იყოს თქუენდა პასექი, რომელ არს ვნებისაჲ დღესასწაული. შჳდ დღჱ უცომოსა ჰშჭამდეთ.
და ყოს მთავარმან შესაწირავი თავისა თჳსისათჳს და სახლისათჳს და ყოვლისათჳს ერისა ქუეყანისა, ჴბოჲ ერთი ცოდვისათჳს.
და შჳდთა მათ დღეთა დღესასწაულისათა ჰყოფდეს ყოვლად-დასაწუველთა უფლისა, შჳდი ზუარაკი და შჳდი ვერძი უბიწოჲ დღითი დღედ შჳდთა მათ დღეთა, და ცოდვისათჳს თიკანი თხათაჲ დღითი დღედ და შესაწირავი.
პური ცხობილი ჴბოსა თანა, და ცხობილი ვერძისა თანა, და ზეთი ექუს ქსესტისაჲ ცხობილსა თანა.
და მეშჳდესა მას თთუესა, ათოთხმეტესა მის თთჳსასა დღესასწაულსა ჰყოფდე ეგრევე შჳდ დღჱ, ვითარცა იგი ცოდვისათჳს, და ვითარცა იგი მანნაჲ, და ვითარცა იგი ზეთი.;
