TITUS
Vetus Testamentum graece iuxta LXX interpretes
Part No. 796
Previous part

Chapter: 7 
Verse: 1  πότερον οὐχὶ πειρατήριόν ἐστιν ὁ βίος ἀνϑρώπου ἐπὶ τῆς γῆς
καὶ ὥσπερ μισϑίου αὐϑημερινοῦ ἡ ζωὴ αὐτοῦ;
Verse: 2  ἢ ὥσπερ ϑεράπων δεδοικὼς τὸν κύριον αὐτοῦ καὶ τετευχὼς // σκιᾶς
ἢ ὥσπερ μισϑωτὸς ἀναμένων τὸν μισϑὸν αὐτοῦ.
Verse: 3  οὕτως κἀγὼ ὑπέμεινα μῆνας κενούς,
νύκτες δὲ ὀδυνῶν δεδομέναι μοί εἰσιν.
Verse: 4  ἐὰν κοιμηϑῶ, λέγω Πότε ἡμέρα;
ὡς δ' ἂν ἀναστῶ, πάλιν Πότε ἑσπέρα;
πλήρης δὲ γίνομαι ὀδυνῶν ἀπὸ ἑσπέρας ἕως πρωί.
Verse: 5  ϕύρεται δέ μου τὸ σῶμα ἐν σαπρίᾳ σκωλήκων,
τήκω δὲ βώλακας γῆς ἀπὸ ἰχῶρος ξύων.
Verse: 6  ὁ δὲ βίος μού ἐστιν ἐλαϕρότερος λαλιᾶς,
ἀπόλωλεν δὲ ἐν κενῇ ἐλπίδι.
Verse: 7  μνήσϑητι οὖν ὅτι πνεῦμά μου ἡ ζωὴ
καὶ οὐκέτι ἐπανελεύσεται ὁ ὀϕϑαλμός μου ἰδεῖν ἀγαϑόν.
Verse: 8  οὐ περιβλέψεταί με ὀϕϑαλμὸς ὁρῶντός με·
οἱ ὀϕϑαλμοί σου ἐν ἐμοί, καὶ οὐκέτι εἰμὶS
Verse: 9  ὥσπερ νέϕος ἀποκαϑαρϑὲν ἀπ' οὐρανοῦ.
ἐὰν γὰρ ἄνϑρωπος καταβῇ εἰς ᾅδην, οὐκέτι μὴ ἀναβῇ
Verse: 10  οὐδ' οὐ μὴ ἐπιστρέψῃ ἔτι εἰς τὸν ἴδιον οἶκον,
οὐδὲ μὴ ἐπιγνῷ αὐτὸν ἔτι ὁ τόπος αὐτοῦ.
Verse: 11  ἀτὰρ οὖν οὐδὲ ἐγὼ ϕείσομαι τῷ στόματί μου,
λαλήσω ἐν ἀνάγκῃ ὤν,
ἀνοίξω πικρίαν ψυχῆς μου συνεχόμενος.
Verse: 12  πότερον ϑάλασσά εἰμι ἢ δράκων,
ὅτι κατέταξας ἐπ' ἐμὲ ϕυλακήν;
Verse: 13  εἶπα ὅτι Παρακαλέσει με ἡ κλίνη μου,
ἀνοίσω δὲ πρὸς ἐμαυτὸν ἰδίᾳ λόγον τῇ κοίτῃ μου·
Verse: 14  ἐκϕοβεῖς με ἐνυπνίοις καὶ ἐν ὁράμασίν με καταπλήσσεις.
Verse: 15  ἀπαλλάξεις ἀπὸ πνεύματός μου τὴν ψυχήν μου,
ἀπὸ δὲ ϑανάτου τὰ ὀστᾶ μου.
Verse: 16  οὐ γὰρ εἰς τὸν αἰῶνα ζήσομαι, ἵνα μακροϑυμήσω·
ἀπόστα ἀπ' ἐμοῦ, κενὸς γάρ μου ὁ βίος.
Verse: 17  τί γάρ ἐστιν ἄνϑρωπος, ὅτι ἐμεγάλυνας αὐτὸν
ἢ ὅτι προσέχεις τὸν νοῦν εἰς αὐτὸν
Verse: 18  ἢ ἐπισκοπὴν αὐτοῦ ποιήσῃ ἕως τὸ πρωὶ
καὶ εἰς ἀνάπαυσιν αὐτὸν κρινεῖς;
Verse: 19  ἕως τίνος οὐκ ἐᾷς με
οὐδὲ προίῃ με, ἕως ἂν καταπίω τὸν πτύελόν μου ἐν ὀδύνῃ;
Verse: 20  εἰ ἐγὼ ἥμαρτον, τί δύναμαί σοι πρᾶξαι,
ὁ ἐπιστάμενος τὸν νοῦν τῶν ἀνϑρώπων;
διὰ τί ἔϑου με κατεντευκτήν σου,
εἰμὶ δὲ ἐπὶ σοὶ ϕορτίον;
Verse: 21  καὶ διὰ τί οὐκ ἐποιήσω τῆς ἀνομίας μου λήϑην
καὶ καϑαρισμὸν τῆς ἁμαρτίας μου;
νυνὶ δὲ εἰς γῆν ἀπελεύσομαι,
ὀρϑρίζων δὲ οὐκέτι εἰμί.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.