რაჟამს განვკურნო მე ისრაჱლი, და გამოცხადნეს უკეთურებაჲ ეფრემისი, და უკეთურებაჲ სამარიაჲსაჲ, რამეთუ ქმნეს სიცრუვჱ, და მპარავი შევიდეს განძარცუვად; ავაზაკი გზასა მისსა.
რაჲთა თანა სახიობდენ ვითარცა მაქებელნი გულთა მათთა; ყოველნი უკეთურებანი მათნი მოვიჴსენნე, აწ მოიცვალნეს Page of ms. O: 372r იგინი/ ზრახვათა მათთა; წინაშე პირსა ჩემსა იყვნეს.
უკეთურებათა შინა მათთა ახარეს მეფეთა, და ტყუვილითა მათითა მთავართა.
ყოველნი იმრუშებდეს, ვითარცა თორნე შთაგზებული, ცხობად სიცხესა შინა ალისაგან, შესუარული ცმელითა, ვიდრემდე შეფუვეს იგი.
დღენა მეფეთა თქუენთანი, იწყეს მთავართა გულის-წყრომად ღჳნისა გან; განირთხა ჴელი მისი უშჯულოთა თანა .
რამეთუ აღატყდა ვითარცა თორნე გულნი მათნი, და ხეთქასა მათსა, ღამჱ ყოველ ძილითა განძღო ეფრემ; განთიად აღატყდა ვითარცა ცეცხლი საჴუმილი,
ყოველნივე განჴურდეს ვითარცა თორნე, და შეჭამნა მსაჯულნი მათნი, და ყოველნი მეფენი მათნი დაეცნეს, და არა ვინ იყო მათ შორის, რომელმანმცა მხადა მე.
ეფრემ ერსა შორის მისსა აღრეულ იყო; ეფრემ იყო ვითარცა ყურბეული ვერ გარდაქცეული.
და შეჭამეს უცხოთა ძალი მისი; და მჴიენი გამოუჴდეს მას, და მან ვერ ცნა.
და დამდაბლდეს გინებაჲ ისრაჱლისაჲ წინაშე პირსა მისსა, და არა მოიქცეს უფლისა ღმრთისა მათისა, და არა გამოიძიეს იგი ამას ყოველსა შინა.
და იყოს ეფრემ ვითარცა ტრედი უგულისხმოჲ, რომელსა არა უცნ გული. ეგჳპტესა ჰხადოდა, და ასურასტანელთა შევიდიან.
გარდავჰბურო მათ ბადჱ ჩემი, და ვითარცა მფრინველნი ცისანი გარდამოვსთხინე იგინი. განვსწავლნე Page of ms. O: 372v იგინი ჰამბავითა ჭირისა მათისაჲთა./
ვაჲ მათა, რამეთუ განმწუართეს ჩემგან. უბადრუკ არიან, რამეთუ უსახურ იქმნნეს ჩემდა; მე ვიჴსნნე იგინი, ხოლო იგინა ძჳრსა ზრახვიდეს ჩემთჳს ნაცილად.
და არა ღაღადებდეს ჩემდამო გულნი მათნი, არამედ ვალალაებდეს საწოლთა მათთა ზედა; იფქლისათჳს და ღჳნისა დაიჭრებოდეს.
განისწავლნეს ჩემდამო, და მე განვამტკიცენ მკლავნი მათნი, და ჩემდამო ზრახეს ბოროტი,
გარდაიქცეს არა რად, იქმნნეს ვითარცა მშჳლდი გარდაცუმული; დაეცნენ მახჳლითა მთავარნი მათნი უსწავლელებითა ენისა მათისაჲთა. ესე არს განქარვებულებაჲ მათი ქუეყანასა ეგჳპტისასა.:
