ამას იტყჳს უფალი. დაიმარხეთ სამართალი და ყავთ სიმართლჱ, რამეთუ მოახლებულ არს მაცხოვარებაჲ ჩემი მოწევნად, და წყალობაჲ ჩემი გამოჩინებად.
ნეტარ არს მამაკაცი, რომელმან ყოს ესე, და კაცი რომელმან შეიწყნაროს ესე და დაიმარხნეს შაბათნი ჩემნი შეუგინებელად, და დაიცვნეს ჴელნი თჳსნი, Page of ms. J: A89r რაჲთა არა ქმნეს სიცრუვჱ.
ნუ იტყჳნ უცხოთესლი იგი/ რომელი მოსრულ იყოს უფლისა, გან-მე-მაშოროსა უფალმან ერისაგან თჳსისა. და ნუ იტყჳნ საჭურისი იგი, რამეთუ მე ვარ ხჱ ჴმელი.
რამეთუ ამას ეტყჳს უფალი საჭურისთა მათ, რომელნი იმარხვიდენ შაბათთა ჩემთა, და რომელთა გამოირჩიონ, რაჲ იგი მე მნებავს, და რომელთა თავს-ისხნენ აღთქუმანი ჩემნი.
ვსცე მათ სახლსა შინა ჩემსა, და ზღუდესა ჩემსა, ადგილი სახელოვანი, უმჯობჱს რომელთა ესხენ ძეებ და ასულებ. სახელი საუკუნოჲ მივცე მათ, და არა მოაკლდეს.
და უცხოთესლთა მათ, რომელნი მოვიდენ უფლისა მონებად მისა, და შეიყუარონ სახელი უფლისაჲ, რაჲთა იყვნენ იგინი მონად და მჴევლად, და ყოველთა რომელთა დაიმარხონ შაბათი ჩემი, და არა შეაგინონ იგი, და შეიწყნარნენ აღთქუმანი ჩემნი,
შევიყვანნე იგინი მთასა წმიდასა ჩემსა, და ვახარო მათ ტაძარსა შინა სალოცველსა ჩემსა, მსხუერპლნი მათნი და შესაწირავნი მათნი იყვნენ სათნო საკურთხეველსა ჩემსა. რამეთუ სახლსა ჩემსა სახლ სალოცველ ეწოდოს შორის ყოველთა წარმართთა.
თქუა უფალმან, რომელმან შეკრიბნეს განბნეულნი ისრაჱლისანი, რამეთუ შევკრიბო მათ ზედა შესაკრებელი ყოველთა მჴეცთაჲ ველურთაჲ.
მოვედით და ჭამდით, ყოველნი მჴეცნი მაღნარისანი.
აწ იხილეთ რამეთუ დაბრმეს ყოველნივე, და არა ცნეს გულის-ჴმის-ყოფად. ყოველნივე არიან ძაღლ მცბიერ, რომელნი ვერ შემძლებელ არიედ ყეფად: საჩუენებელსა იხილვედ საწოლსა თჳსსა, და უყუარს ძილი.
ძაღლნი არიან უძღებნი გულითა, და არა იციან მაძღრობაჲ, და არიან ყოველნი უკეთურ, და არა იციან გულის-ხმის-ყოფაჲ. ყოველნივე გზათა თჳსთა შეუდგან კაცად-კაცადი გონებასა თჳსსა.
