განვეცხადე <მათ> რომელნი მე არა მიკითხვიდეს, და ვეპოვე რომელნი მე არა მეძიებდეს. ვარქუ ვითარმედ აქა ვარ ნათესავსა მას, რომელი არა ხადოდა სახელსა ჩემსა.
განვიპყრენ ჴელნი ჩემნი დღჱ ყოველ ერისა მიმართ ურჩისა და მაცილობელისა, რომელნი ვლენან გზასა არა კეთილსა, არამედ შემდგომად ცოდვათა მათთა.
ერმან ამან რომელმან განმარისხა მე წინაშე ჩემსა მარადის, იგინი უზორვენ მტილებსა მათსა, და უკუმევენ საკუმეველსა ეშმაკთა ალიზთა შინა მათთა.
და დამკჳდრებულთა საფლავთა შინა, და ქუაბებსა შინა, დაიძინიან Page of ms. J: A96r ინიან სიზმართათჳს. რომელნი ჭამენ ჴორცსა ღორისასა,/ და სუმენ წუენსა მსხუერპლთა მათთასა, და ყოველი სამსახურებელი მათი შეგინებულ არს.
რომელნი იტყჳან, განმეშორე ჩემ გან: ნუ მომეახლები მე, რამეთუ წმიდა ვარ. ესე არს კუამლი გულის-წყრომისა ჩემისაჲ. ცეცხლი აღატყდების მის ზედა ყოველთა დღეთა.
აჰა ესერა წერილ არს წინაშე ჩემსა, და არა დავიდუმო ვიდრემდე მივაგო წიაღთა მათთა
ყოველნივე ცოდვანი მათნი, ყოველთა დღეთა მათთა და მამათა მათთაჲ ერთბამად, იტყჳს უფალი. რომელნი იგი უკუმევდეს მთათა ზედა, და ბორცუთა ზედა მაყუედრებდეს, და მივაგნე საქმენი მათნი პირველდა წიაღთა მათთა.
ამას იტყჳს უფალი, ვითარცა იგი იპოვის მარცუალი ტევანსა შინა, და თქჳან, ნუ განჰრყუნი მას, რამეთუ კურთხევაჲ უფლისაჲ არს მას შინა. ეგრჱთ ვყო მისთჳს რომელი იგი მმონებდეს მე. ამისთჳს არა წარვწყმიდნე ყოველნი,
და გამოვიყვანო იაკობისგან თესლი, და იუდაჲსგან, და დაიმკჳდროს მთაჲ წმიდაჲ ჩემი, და დაიმკჳდრონ რჩეულთა ჩემთა, და მონათა ჩემთა, და დაეშჱნნენ მუნ.
და იყვნენ მაღნართა შინა საყოფელნი სამწყსოთანი, და ჴევი იგი აქორისაჲ განსასუენებელ მროწეულთა ერისა მის ჩემისა, რომელნი მეძიებდეს მე.
ხოლო თქუენ რომელთა დამიტევეთ მე, და დაივიწყეთ მთაჲ წმიდაჲ ჩემი, და განუმზადებდით ბედსა ტაბლასა, და აღუვსით ეშმაკსა საწდჱ.
აწ მე მიგცნე თქუენ მახჳლსა, და ყოველნივე მოსრვით დაეცნეთ, რამეთუ გიწოდე თქუენ და არა მერჩდით მე: გეტყოდე თქუენ და არა ისმინეთ ჩემი, და ჰყავთ ბოროტი წინაშე ჩემსა, და რაჲ იგი მე არა მინდა გამოირჩიეთ თქუენ.
ამისთჳს ამას იტყჳს უფალი, აჰა ესერა, რომელნი მმონებდენ მე, იგინი ჭამდენ, ხოლო თქუენ გმშიოდის, და რომელნი მმონებდეს მე, იგინი სუმიდენ, ხოლო თქუენ გწყუროდის <. . .>.
და რომელნი მმონებდენ მე, იგინი იხარებდენ სიხარულითა Page of ms. J: A96v გულისაჲთა, ხოლო თქუენ ჰღაღადებდეთ სალმობითა/ გულისა თქუენისაჲთა, და ჭირითა სულისა თქუენისაჲთა ჰღაღადებდეთ.
რამეთუ დაუტეოთ სახელი ჩემი მაძღრივ რჩეულთა ჩემთა, და თქუენ მოგსრნეს უფალმან: ხოლო რომელნი მმონებდენ მე, მათ ეწოდოს სახელი ახალი.
რომელი იკურთხეოდის ქუეყანასა ზედა, რამეთუ აკურთხევდენ ღმერთსა ჭეშმარიტსა, და რომელნი ფუცვიდენ ქუეყანასა ზედა, ფუცვიდენ ჭეშმარიტსა ღმერთსა, რამეთუ დაავიწყდეს ჭირი იგი პირველი, და არღარა მოუჴდეს გულსა მათსა.
რამეთუ იყოს ცაჲ ახალი და ქუეყანაჲ ახალი, და არღარა მოიჴსენონ პირველთაჲ მათ, და არცა მოვიდეს გულსა მათსა,
არამედ სიხარული და მხიარულებაჲ პოვონ მას შინა, რაოდენ იგი მე დავჰბადო. რამეთუ აჰა ესერა ვყო იჱრუსალემი სიხარულ, და ერი ჩემი მხიარულება,
და ვიხარებდე მე იჱრუსალემისა მიმართ, და მხიარულ ვიყო ერსა ჩემსა ზედა, და არღარა ისმეს მას შინა ჴმაჲ ტირილისაჲ, და ჴმაჲ ღაღადებისაჲ.
და არღარა იყოს მუნ უჟამოდ შობილი და უსრული, და მოხუცებული რომელმან არა აღასრულნეს ჟამნი თჳსნი. რამეთუ ყრმაჲ იგი ძჱ ასისა წლისაჲ მოკუდეს, და მოხუცებული იგი ყრმაჲ აღესრულოს, და ყრმაჲ რომელი არა ას წლისაჲ აღესრულოს, იგი წყეულ იყოს.
და აღაშჱნნენ სახლნი, და იგინი დაემკჳდრნენ მას შინა. და დაასხან ვენაჴი, და იგინივე ჭამდენ ნაყოფსა მათსა.
და არღარა აღაშჱნებდენ, რაჲთა სხუანი დაემკჳდრნენ, და არცა იგინი დაჰნერგვიდენ, და სხუანი ჭამდენ. რამეთუ დღისა მის-ებრ ხისა ცხორებისა იყვნენ დღენი ერისა ჩემისანი, და საქმენი შრომათა მათთანი დააძუელნენ.
ხოლო რჩეულნი ჩემნი არა შურებოდიან ცუდად, და არცა შვილთ-ისხმიდენ საწყეველად, რამეთუ ნათესავნი კურთხეულნი არიან ღმრთისა მიერ.
და იყოს ვიდრე ღაღადებადმდე მათა Page of ms. J: A97r მე ვისმინო მათი, და ვიდრე სიტყუადმდე/ მათა ვჰრქუა: აქა ვარ.
მას ჟამსა მგელნი და კრავნი ერთად ძოვდენ, და ლომი ვითარცა ჴარი ჭამდეს ბზესა, და გუელი ჭამდეს მიწასა ვითარცა პურსა, და არა ვის ავნებდენ, და არცა უნასებდენ მთასა ზედა წმიდასა ჩემსა, იტყჳს უფალი.
