TITUS
Vetus Testamentum graece iuxta LXX interpretes
Part No. 1101
Previous part

Chapter: 48 
Verse: 1    Καὶ ἐγένετο τῷ μηνὶ τῷ ἑβδόμῳ ἦλϑεν Ισμαηλ υἱὸς Ναϑανιου υἱοῦ Ελασα ἀπὸ γένους τοῦ βασιλέως καὶ δέκα ἄνδρες μετ' αὐτοῦ πρὸς Γοδολιαν εἰς Μασσηϕα, καὶ ἔϕαγον ἐκεῖ ἄρτον ἅμα.
Verse: 2    καὶ ἀνέστη Ισμαηλ καὶ οἱ δέκα ἄνδρες, οἳ ἦσαν μετ' αὐτοῦ, καὶ ἐπάταξαν τὸν Γοδολιαν, ὃν κατέστησεν βασιλεὺς Βαβυλῶνος ἐπὶ τῆς γῆς,
Verse: 3    καὶ πάντας τοὺς Ιουδαίους τοὺς ὄντας μετ' αὐτοῦ ἐν Μασσηϕα καὶ πάντας τοὺς Χαλδαίους τοὺς εὑρεϑέντας ἐκεῖ.
Verse: 4    καὶ ἐγένετο τῇ ἡμέρᾳ τῇ δευτέρᾳ πατάξαντος αὐτοῦ τὸν Γοδολιαν, καὶ ἄνϑρωπος οὐκ ἔγνω,
Verse: 5    καὶ ἤλϑοσαν ἄνδρες ἀπὸ Συχεμ καὶ ἀπὸ Σαλημ καὶ ἀπὸ Σαμαρείας, ὀγδοήκοντα ἄνδρες, ἐξυρημένοι πώγωνας καὶ διερρηγμένοι τὰ ἱμάτια καὶ κοπτόμενοι, καὶ μαναα καὶ λίβανος ἐν χερσὶν αὐτῶν τοῦ εἰσενεγκεῖν εἰς οἶκον κυρίου.
Verse: 6    καὶ ἐξῆλϑεν εἰς ἀπάντησιν αὐτοῖς Ισμαηλ· αὐτοὶ ἐπορεύοντο καὶ ἔκλαιον, καὶ εἶπεν αὐτοῖς Εἰσέλϑετε πρὸς Γοδολιαν.
Verse: 7    καὶ ἐγένετο εἰσελϑόντων αὐτῶν εἰς τὸ μέσον τῆς πόλεως ἔσϕαξεν αὐτοὺς εἰς τὸ ϕρέαρ.
Verse: 8    καὶ δέκα ἄνδρες εὑρέϑησαν ἐκεῖ καὶ εἶπαν τῷ Ισμαηλ Μὴ ἀνέλῃς ἡμᾶς, ὅτι εἰσὶν ἡμῖν ϑησαυροὶ ἐν ἀγρῷ, πυροὶ καὶ κριϑαί, μέλι καὶ ἔλαιον· καὶ παρῆλϑεν καὶ οὐκ ἀνεῖλεν αὐτοὺς ἐν μέσῳ τῶν ἀδελϕῶν αὐτῶν.
Verse: 9    καὶ τὸ ϕρέαρ, εἰς ὃ ἔρριψεν ἐκεῖ Ισμαηλ πάντας οὓς ἐπάταξεν, ϕρέαρ μέγα τοῦτό ἐστιν ὃ ἐποίησεν ὁ βασιλεὺς Ασα ἀπὸ προσώπου Βαασα βασιλέως Ισραηλ· τοῦτο ἐνέπλησεν Ισμαηλ τραυματιῶν.
Verse: 10    καὶ ἀπέστρεψεν Ισμαηλ πάντα τὸν λαὸν τὸν καταλειϕϑέντα εἰς Μασσηϕα καὶ τὰς ϑυγατέρας τοῦ βασιλέως, ἃς παρεκατέϑετο ὁ ἀρχιμάγειρος τῷ Γοδολια υἱῷ Αχικαμ, καὶ ᾤχετο εἰς τὸ πέραν υἱῶν Αμμων.
Verse: 11    καὶ ἤκουσεν Ιωαναν υἱὸς Καρηε καὶ πάντες οἱ ἡγεμόνες τῆς δυνάμεως οἱ μετ' αὐτοῦ πάντα τὰ κακά, ἃ ἐποίησεν Ισμαηλ,
Verse: 12    καὶ ἤγαγον ἅπαν τὸ στρατόπεδον αὐτῶν καὶ ᾤχοντο πολεμεῖν αὐτὸν καὶ εὗρον αὐτὸν ἐπὶ ὕδατος πολλοῦ ἐν Γαβαων.
Verse: 13    καὶ ἐγένετο ὅτε εἶδον πᾶς ὁ λαὸς ὁ μετὰ Ισμαηλ τὸν Ιωαναν καὶ τοὺς ἡγεμόνας τῆς δυνάμεως τῆς μετ' αὐτοῦ,
Verse: 14    καὶ ἀνέστρεψαν πρὸς Ιωαναν.
Verse: 15    καὶ Ισμαηλ ἐσώϑη σὺν ὀκτὼ ἀνϑρώποις καὶ ᾤχετο πρὸς τοὺς υἱοὺς Αμμων.
Verse: 16    καὶ ἔλαβεν Ιωαναν καὶ πάντες οἱ ἡγεμόνες τῆς δυνάμεως οἱ μετ' αὐτοῦ πάντας τοὺς καταλοίπους τοῦ λαοῦ, οὕς ἀπέστρεψεν ἀπὸ Ισμαηλ, δυνατοὺς ἄνδρας ἐν πολέμῳ καὶ τὰς γυναῖκας καὶ τὰ λοιπὰ καὶ τοὺς εὐνούχους, οὓς ἀπέστρεψεν ἀπὸ Γαβαων,
Verse: 17    καὶ ᾤχοντο καὶ ἐκάϑισαν ἐν Γαβηρωϑ χαμααμ τὴν πρὸς Βηϑλεεμ τοῦ πορευϑῆναι εἰσελϑεῖν εἰς Αἴγυπτον
Verse: 18    ἀπὸ προσώπου τῶν Χαλδαίων, ὅτι ἐϕοβήϑησαν ἀπὸ προσώπου αὐτῶν, ὅτι ἐπάταξεν Ισμαηλ τὸν Γοδολιαν, ὃν κατέστησεν βασιλεὺς Βαβυλῶνος ἐν τῇ γῇ.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.