და წარავლინნა ისუმან, ძემან ნავესმან, სატტით (!) ორნი კაცნი განსმტურობად ქუეყანისა, მეტყუელმან. აღედით და იხილეთ ქუეყანაჲ და იერიქოჲ: Page of ms. Ga: 308r და წარსრულნი შევიდეს ორნი ჭაბუკნი იერიქოს და შევიდეს სახლსა დედაკაცისა მეძვისასა, რომლისა სახელი რააბ, დაივანეს მუნ.
და მიუთხრეს მეფესა იერიქოჲსასა, მეტყუელთა: შემოსრულ არიან აქა კაცნი ძეთა ისრაჱლისათანი განმსტურობად ქუეყანისა.
და მიავლინა მეფემან იერიქოჲსამან და ჰრქუა რააბსა, მეტყუელმან: გამოიყვანენ შემოსრულნი შენსა სახიდ შენდა ღამე, რამეთუ განმსტურობად ქუეყანისა მოვიდეს.
და მიმყვანებელმან დედაკაცმან კაცთამან დამალნა იგინი სელის ლელწამსა შინა დაზჳნულსა მისგან ერდოსა ზედა და ჰრქუა მათ, მეტყუელმან: შემოვიდეს ჩემდა კაცნი,
ვითარცა ბჭე დაეჴშვოდა სიბნელესა, და კაცნი განვიდეს და ვერ ზედვმიწევნულობ ვიდრე ვიდეს, სდევნეთ უკუანა მათსა და ეწიენით მათ.
ხოლო მან აღიყვანნა იგინი ერდოსა ზედა. დამალნა იგინი შეშათა შინა სელის ლელწმისათა დაზჳნულისა მის მიერ ერდოსა ზედა.
და კაცთა სდევნეს უკუანა მათსა გზასა იორდანედ მიმართსა მებოძირთა ზედა და ბჭე დაეჴშა. და იყო, ვითარცა განვიდეს მდევარნი უკუანა მათსა,
ხოლო პირველ დაძინებადმდე მათდა და იგიცა აღვიდა ერდოდ მათდა მიმართ და ჰრქუა კაცთა:
კაცნო, ზედვმიმწდომობ, ვითარმედ მოგცა ღმერთმან თქუენმან ქუეყანაჲ თქუენ, რამეთუ დაცემულ არს შიში თქუენი ჩუენ ზედა.
რამეთუ გუესმა, ვითარმედ განაჴმო ღმერთმან ზღუაჲ მეწამული პირისაგან თქუენისა, გამო-რაჲ-ხჳ\დოდეთ Page of ms. Ga: 308v ქუეყანისაგან ეგჳპტისა, და რაოდენნი უყვნა ორთა მეფეთა ამორრეველთასა, რომელნი იყვნეს წიაღ იორდანესა, სიონს და ოგს. რომელნი მოსრენით იგინი.
და გუესმა რაჲ ჩუენ, განვჰკრთით გულითა ჩუენითა და არა არს სული არცა ერთისა შორის პირისაგან თქუენისა, რამეთუ უფალი ღმერთი თქუენი ღმერთი არს ცათა შინა ზე და ქუეყანასა ზედა ქუე.
და აწ მეფუცენით მე უფალსა ღმერთსა თქუენსა, რამეთუ ვჰყოფ თქუენ თანა წყალობასა, და ყავთ თქუენცა წყალობაჲ სახლსა ზედა მამისა ჩემისასა.
და განარინეთ სახლი მამისა ჩემისაჲ და დედაჲ ჩემი და ძმანი ჩემნი და დანი ჩემნი და ყოველნი სახლისა მამისა ჩემისანი და ყოველნი, რაოდენნი არიან მისნი, და განარინეთ სული ჩემი სიკუდილისაგან.
და ჰრქუეს მას კაცთა: სული ჩუენი ნაცვალად თქუენდა სიკუდიდ. და მან ჰრქუა მათ: ვითარცა გამოგცეს თქუენ უფალმან ქალაქი, ყავთ ჩემ ზედა წყალობაჲ და ჭეშმარიტებაჲ.
და შთაუტევნა იგინი სარკუმლით
და ჰრქუა მათ: მთად კერძო წარედით, ნუ შეგემთხჳნენ თქუენ მდევარნი და დაიმალენით მუნ სამთა დღეთა, ვიდრემდის უკმოიქცენ მდევარნი უკუანა თქუენსა, და ამის შემდგომად წარედით გზასა თქუენსა.
და თქუეს კაცთა მისსა Page of ms. Ga: 309r მიმართ: უბრალო ვართ ჩუენ ფიცისა ამისაგან შენისა.
აჰა. ჩუენ შემოვალთ კერძოსა და დასდვა ნიშანი: საბელი ძოწეული ესე მოაბა სარკუმელსა, რომლისა მიერ შთამსხენ ჩუენ ძის მიერ. და მამაჲ შენი და დედაჲ შენი და ძმანი შენნი და ყოველი სახლი მამისა შენისაჲ შეჰკრიბო თავისა მიმართ თჳსისა სახიდ შენდა.
და იყოს, ყოველი, რომელი განვიდეს კარით სახლისა შენისაჲთ გარე, მზღველ თავისა თჳსისა იყოს, ხოლო ჩუენ -- უბრალო ფიცისა ამისაგან შენისა. და რაოდენნიცა იყვნენ შენ თანა სახლსა შინა შენსა, ჩუენ ვიყვნეთ მზდველნი.
ხოლო მეუსამართლოოს თუ ვინ ჩუენ, ანუ გამოაცხადნესცა სიტყუანი ესე ჩუენნი, ვიყვნეთ უბრალო ფიცისა ამისგან.
და ჰრქუა მათ: სიტყჳსაებრ თქუენისა ეგრეთ იყავნ. და განავლინნა იგინი და წარვიდეს.
და მივიდეს მთით კერძო და დაადგრეს მუნ სამ დღე. და ეძინეს მდევართა ყოველსა გზასა და ვერ პოვნეს.
და მიიქცეს ორნი ჭაბუკნი და შთავიდეს მთით და მოიწინეს იისუჲს მომართ, ძისა ნავისა, და მიუთხრნეს მას ყოველნი შემთხუეულნი მათნი,
და ჰრქუეს იისუს, ვითარმედ: მომცა უფალმან ღმერთმან ჩუენმან ყოველი ქუეყანაჲ ჴელსა ჩუენსა და ძრწის ყოველი მკჳდრი მის ქუეყანისაჲ ჩუენგან.
