TITUS
Vetus Testamentum graece iuxta LXX interpretes
Part No. 758
Previous part

Chapter: 23 
Verse: 1  ἐὰν καϑίσῃς δειπνεῖν ἐπὶ τραπέζης δυναστῶν,
νοητῶς νόει τὰ παρατιϑέμενά σοι
Verse: 2  καὶ ἐπίβαλλε τὴν χεῖρά σου
εἰδὼς ὅτι τοιαῦτά σε δεῖ παρασκευάσαι·
Verse: 3  εἰ δὲ ἀπληστότερος εἶ, μὴ ἐπιϑύμει τῶν ἐδεσμάτων αὐτοῦ,
ταῦτα γὰρ ἔχεται ζωῆς ψευδοῦς.
Verse: 4  μὴ παρεκτείνου πένης ὢν πλουσίῳ,
τῇ δὲ σῇ ἐννοίᾳ ἀπόσχου·
Verse: 5  ἐὰν ἐπιστήσῃς τὸ σὸν ὄμμα πρὸς αὐτόν, οὐδαμοῦ ϕανεῖται,
κατεσκεύασται γὰρ αὐτῷ πτέρυγες ὥσπερ ἀετοῦ,
καὶ ὑποστρέϕει εἰς τὸν οἶκον τοῦ προεστηκότος αὐτοῦ.
Verse: 6  μὴ συνδείπνει ἀνδρὶ βασκάνῳ
μηδὲ ἐπιϑύμει τῶν βρωμάτων αὐτοῦ·
Verse: 7  ὃν τρόπον γὰρ εἴ τις καταπίοι τρίχα,
οὕτως ἐσϑίει καὶ πίνει.
Verse: 8  μηδὲ πρὸς σὲ εἰσαγάγῃς αὐτὸν καὶ ϕάγῃς τὸν ψωμόν σου // μετ' αὐτοῦ·
ἐξεμέσει γὰρ αὐτὸν καὶ λυμανεῖται τοὺς λόγους σου τοὺς καλούς.
Verse: 9  εἰς ὦτα ἄϕρονος μηδὲν λέγε,
μήποτε μυκτηρίσῃ τοὺς συνετοὺς λόγους σου.
Verse: 10  μὴ μεταϑῇς ὅρια αἰώνια,
εἰς δὲ κτῆμα ὀρϕανῶν μὴ εἰσέλϑῃς·
Verse: 11  ὁ γὰρ λυτρούμενος αὐτοὺς κύριος κραταιός ἐστιν
καὶ κρινεῖ τὴν κρίσιν αὐτῶν μετὰ σοῦ.
Verse: 12  δὸς εἰς παιδείαν τὴν καρδίαν σου,
τὰ δὲ ὦτά σου ἑτοίμασον λόγοις αἰσϑήσεως.
Verse: 13  μὴ ἀπόσχῃ νήπιον παιδεύειν,
ὅτι ἐὰν πατάξῃς αὐτὸν ῥάβδῳ, οὐ μὴ ἀποϑάνῃ·
Verse: 14  σὺ μὲν γὰρ πατάξεις αὐτὸν ῥάβδῳ,
τὴν δὲ ψυχὴν αὐτοῦ ἐκ ϑανάτου ῥύσῃ.
Verse: 15  υἱέ, ἐὰν σοϕὴ γένηταί σου ἡ καρδία,
εὐϕρανεῖς καὶ τὴν ἐμὴν καρδίαν,
Verse: 16  καὶ ἐνδιατρίψει λόγοις τὰ σὰ χείλη
πρὸς τὰ ἐμὰ χείλη, ἐὰν ὀρϑὰ ὦσιν.
Verse: 17  μὴ ζηλούτω ἡ καρδία σου ἁμαρτωλούς,
ἀλλὰ ἐν ϕόβῳ κυρίου ἴσϑι ὅλην τὴν ἡμέραν·
Verse: 18  ἐὰν γὰρ τηρήσῃς αὐτά, ἔσται σοι ἔκγονα,
ἡ δὲ ἐλπίς σου οὐκ ἀποστήσεται.
Verse: 19  ἄκουε, υἱέ, καὶ σοϕὸς γίνου
καὶ κατεύϑυνε ἐννοίας σῆς καρδίας·
Verse: 20  μὴ ἴσϑι οἰνοπότης
μηδὲ ἐκτείνου συμβολαῖς κρεῶν τε ἀγορασμοῖς·
Verse: 21  πᾶς γὰρ μέϑυσος καὶ πορνοκόπος πτωχεύσει,
καὶ ἐνδύσεται διερρηγμένα καὶ ῥακώδη πᾶς ὑπνώδης.
Verse: 22  ἄκουε, υἱέ, πατρὸς τοῦ γεννήσαντός σε
καὶ μὴ καταϕρόνει ὅτι γεγήρακέν σου ἡ μήτηρ.
Verse: 24  καλῶς ἐκτρέϕει πατὴρ δίκαιος,
ἐπὶ δὲ υἱῷ σοϕῷ εὐϕραίνεται ἡ ψυχὴ αὐτοῦ·
Verse: 25  εὐϕραινέσϑω ὁ πατὴρ καὶ ἡ μήτηρ ἐπὶ σοί,
καὶ χαιρέτω ἡ τεκοῦσά σε.
Verse: 26  δός μοι, υἱέ, σὴν καρδίαν,
οἱ δὲ σοὶ ὀϕϑαλμοὶ ἐμὰς ὁδοὺς τηρείτωσαν·
Verse: 27  πίϑος γὰρ τετρημένος ἐστὶν ἀλλότριος οἶκος,
καὶ ϕρέαρ στενὸν ἀλλότριον·
Verse: 28  οὗτος γὰρ συντόμως ἀπολεῖται,
καὶ πᾶς παράνομος ἀναλωϑήσεται.
Verse: 29  τίνι οὐαί; τίνι ϑόρυβος; τίνι κρίσις;
τίνι ἀηδίαι καὶ λέσχαι;
τίνι συντρίμματα διὰ κενῆς;
τίνος πέλειοι οἱ ὀϕϑαλμοί;
Verse: 30  οὐ τῶν ἐγχρονιζόντων ἐν οἴνοις;
οὐ τῶν ἰχνευόντων ποῦ πότοι γίνονται;
Verse: 31  μὴ μεϑύσκεσϑε οἴνῳ, ἀλλὰ ὁμιλεῖτε ἀνϑρώποις δικαίοις
καὶ ὁμιλεῖτε ἐν περιπάτοις·
ἐὰν γὰρ εἰς τὰς ϕιάλας καὶ τὰ ποτήρια δῷς τοὺς ὀϕϑαλμούς σου,
ὕστερον περιπατήσεις γυμνότερος ὑπέρου,
Verse: 32  τὸ δὲ ἔσχατον ὥσπερ ὑπὸ ὄϕεως πεπληγὼς ἐκτείνεται
καὶ ὥσπερ ὑπὸ κεράστου διαχεῖται αὐτῷ ὁ ἰός.
Verse: 33  οἱ ὀϕϑαλμοί σου ὅταν ἴδωσιν ἀλλοτρίαν,
τὸ στόμα σου τότε λαλήσει σκολιά,
Verse: 34  καὶ κατακείσῃ ὥσπερ ἐν καρδίᾳ ϑαλάσσης
καὶ ὥσπερ κυβερνήτης ἐν πολλῷ κλύδωνι·
Verse: 35  ἐρεῖς δέ Τύπτουσίν με, καὶ οὐκ ἐπόνεσα,
καὶ ἐνέπαιξάν μοι, ἐγὼ δὲ οὐκ ᾔδειν·
πότε ὄρϑρος ἔσται, ἵνα ἐλϑὼν ζητήσω μεϑ' ὧν συνελεύσομαι;

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.