Ո́ւնկնդիր ա(ստուա)ծ աղօթից իմոց, եւ մի́ անտես առներ զխնդրուածս իմ։
Նայեա́ց առ իս եւ լո́ւր ինձ. զի տրտմեցա́յ ես ՛ի ձանձրանալ իմում եւ խռովեցայ։
՛Ի ձայնէ թշնամւոյն եւ ՛ի նեղել մեղաւորի խոտորեցան յիս անիրաւութ(եամ)բ, բարկու(թեամ)բ ոխս պահէին ինձ։
Սիրտ իմ խռովեցաւ յիս, եւ երկեւղ մահու անկաւ ՛ի վ(ե)ր(այ) իմ։
Ա́հ եւ դողումն եկն ՛ի վերայ իմ, եւ ծածկեաց զիս խաւար։
Ասէի տայր ոք ինձ թեւս ո(ր)պ(էս) զաղաւնւոյ. զի թռչէի վերանայի,
հեռացեալ դադարէի յանապատի։
Ակն ունէի ա(ստուծո)յ որ փրկէր զիս ՛ի կարճմտութ(են)է զայրանալոյ, ՛ի մրրկեալ նեղսրտութ(են)է։
Ընկլո́ տ(է)ր եւ բաժանեա́ զլեզուս ն(ո)ց(ա), զի տեսի զանօրէնութի(ւն) եւ զհակառակու(թ)ի(ւն) ՛ի քաղաքի։
՛Ի տուէ եւ ՛ի գիշերի շուրջ եղեն զպարսպօք ն(ո)ր(ա) անօրէնու(թ)ի(ւն). չարիք եւ մեղք են ՛ի մէջ ն(ո)ց(ա).
եւ ո́չ պակասեաց ՛ի հրապարակաց ն(ո)ց(ա) վա́շխ եւ նենգութի(ւն)։
Զի թէ թշնամւոյն նախատեալ էր՝ համբերէի́ արդեւք, կամ ատելւոյն մեծաբանեալ էր ՛ի վ(ե)ր(այ) իմ՝ թաքչէի արդեւք ՛ի նմանէ։
Իսկ դո́ւ մարդ հաւասար իմ, առաջնո́րդ իմ եւ ծանօթ իմ։
Ապաքէն ՛ի նոյն քաղցրացուցեր ի́նձ եւ քեզ կերակուր, զի գնայաք միաբանութ(եամ)բ ՛ի տան ա(ստուծո)յ։
Եկեսցէ մա́հ ՛ի վ(ե)ր(այ) ն(ո)ց(ա), եւ կենդանւո́յն իջցեն ՛ի դժոխս. զի չարութի(ւն) է ՛ի բնակու(թ)ե(ան) ն(ո)ց(ա) եւ ՛ի մէջ ն(ո)ց(ա)։
Ես առ ա(ստուա)ծ կարդացի, եւ տ(է)ր լուաւ ինձ
յերեկոյս՝ ՛ի վաղորդա́յն ՛ի հասարակ աւուր։ Պատմեցի եւ ասացի եւ լուիցէ́ ձայնի իմում.
փրկեսցէ́ խաղաղու(թեամ)բ զանձն իմ ՛ի մերձաւորաց իմոց, զի կարեօք հասին ՛ի վ(ե)ր(այ) իմ։
Լուիցէ ա(ստուա)ծ եւ խոնարհ արասցէ զնոսա, որ յառաջն է քան զյաւիտեանս։ Զի ո́չ գոյր ն(ո)ց(ա) փոխանակ, եւ ո́չ երկեան յա(ստուծո)յ։
Ձգեաց զձեռն իւր ՛ի հատուցանել ն(ո)ց(ա), եւ ն(ո)ք(ա) պղծեցի́ն զօրէնս ն(ո)ր(ա)։
Բաժանեցան ՛ի սրտմտու(թեն)է երեսաց ն(ո)ց(ա). եւ եհաս ՛ի սիրտս ն(ո)ց(ա)։ Կակուղ էին բանք ն(ո)ց(ա) քան զձէթ, եւ ինքեանք էին ո(ր)պ(էս) սլաք։
Ընկեա́ ՛ի տ(է)ր զհոգս քո եւ նա կերակրէ զքեզ, եւ ո́չ տայ յաւիտեան սասանու(թ)ի(ւն) արդարոյ։
Դու ա(ստուա)ծ իջուսցես զն(ո)ս(ա) ՛ի գուբ ապականութե(ան), արք արիւնահեղք եւ նենգաւորք մի́ հասարակեսցեն զաւուրս իւրեանց. այլ ես ՛ի քե́զ տ(է)ր յուսացայ։ Տունք ի՜բ։ Գոբղայս. լ՜ը։ Կանոն Գոբղայս. է՜։ Սաղմոս ժ՜թ։ Տունս յ՜ի։
