TITUS
Vetus Testamentum graece iuxta LXX interpretes
Part No. 646
Previous part

Chapter: 77 
Verse: 1  Συνέσεως τῷ Ασαϕ.
Προσέχετε, λαός μου, τὸν νόμον μου,
κλίνατε τὸ οὖς ὑμῶν εἰς τὰ ῥήματα τοῦ στόματός μου·
Verse: 2  ἀνοίξω ἐν παραβολαῖς τὸ στόμα μου,
ϕϑέγξομαι προβλήματα ἀπ' ἀρχῆς.
Verse: 3  ὅσα ἠκούσαμεν καὶ ἔγνωμεν αὐτὰ
καὶ οἱ πατέρες ἡμῶν διηγήσαντο ἡμῖν,
Verse: 4  οὐκ ἐκρύβη ἀπὸ τῶν τέκνων αὐτῶν εἰς γενεὰν ἑτέραν
ἀπαγγέλλοντες τὰς αἰνέσεις τοῦ κυρίου
καὶ τὰς δυναστείας αὐτοῦ
καὶ τὰ ϑαυμάσια αὐτοῦ, ἃ ἐποίησεν.
Verse: 5  καὶ ἀνέστησεν μαρτύριον ἐν Ιακωβ
καὶ νόμον ἔϑετο ἐν Ισραηλ,
ὅσα ἐνετείλατο τοῖς πατράσιν ἡμῶν
τοῦ γνωρίσαι αὐτὰ τοῖς υἱοῖς αὐτῶν,
Verse: 6  ὅπως ἂν γνῷ γενεὰ ἑτέρα,
υἱοὶ οἱ τεχϑησόμενοι,
καὶ ἀναστήσονται καὶ ἀπαγγελοῦσιν αὐτὰ τοῖς υἱοῖς αὐτῶν,
Verse: 7  ἵνα ϑῶνται ἐπὶ τὸν ϑεὸν τὴν ἐλπίδα αὐτῶν
καὶ μὴ ἐπιλάϑωνται τῶν ἔργων τοῦ ϑεοῦ
καὶ τὰς ἐντολὰς αὐτοῦ ἐκζητήσουσιν,
Verse: 8  ἵνα μὴ γένωνται ὡς οἱ πατέρες αὐτῶν
γενεὰ σκολιὰ καὶ παραπικραίνουσα,
γενεά, ἥτις οὐ κατηύϑυνεν τὴν καρδίαν αὐτῆς
καὶ οὐκ ἐπιστώϑη μετὰ τοῦ ϑεοῦ τὸ πνεῦμα αὐτῆς.
Verse: 9  υἱοὶ Εϕραιμ ἐντείνοντες καὶ βάλλοντες τόξοις
ἐστράϕησαν ἐν ἡμέρᾳ πολέμου.
Verse: 10  οὐκ ἐϕύλαξαν τὴν διαϑήκην τοῦ ϑεοῦ
καὶ ἐν τῷ νόμῳ αὐτοῦ οὐκ ἤϑελον πορεύεσϑαι
Verse: 11  καὶ ἐπελάϑοντο τῶν εὐεργεσιῶν αὐτοῦ
καὶ τῶν ϑαυμασίων αὐτοῦ, ὧν ἔδειξεν αὐτοῖς,
Verse: 12  ἐναντίον τῶν πατέρων αὐτῶν ἃ ἐποίησεν ϑαυμάσια
ἐν γῇ Αἰγύπτῳ ἐν πεδίῳ Τάνεως.
Verse: 13  διέρρηξεν ϑάλασσαν καὶ διήγαγεν αὐτούς,
ἔστησεν ὕδατα ὡσεὶ ἀσκὸν
Verse: 14  καὶ ὡδήγησεν αὐτοὺς ἐν νεϕέλῃ ἡμέρας
καὶ ὅλην τὴν νύκτα ἐν ϕωτισμῷ πυρός.
Verse: 15  διέρρηξεν πέτραν ἐν ἐρήμῳ
καὶ ἐπότισεν αὐτοὺς ὡς ἐν ἀβύσσῳ πολλῇ
Verse: 16  καὶ ἐξήγαγεν ὕδωρ ἐκ πέτρας
καὶ κατήγαγεν ὡς ποταμοὺς ὕδατα.
Verse: 17  καὶ προσέϑεντο ἔτι τοῦ ἁμαρτάνειν αὐτῷ,
παρεπίκραναν τὸν ὕψιστον ἐν ἀνύδρῳ
Verse: 18  καὶ ἐξεπείρασαν τὸν ϑεὸν ἐν ταῖς καρδίαις αὐτῶν
τοῦ αἰτῆσαι βρώματα ταῖς ψυχαῖς αὐτῶν
Verse: 19  καὶ κατελάλησαν τοῦ ϑεοῦ καὶ εἶπαν
Μὴ δυνήσεται ὁ ϑεὸς ἑτοιμάσαι τράπεζαν ἐν ἐρήμῳ;
Verse: 20  ἐπεὶ ἐπάταξεν πέτραν καὶ ἐρρύησαν ὕδατα
καὶ χείμαρροι κατεκλύσϑησαν,
μὴ καὶ ἄρτον δύναται δοῦναι
ἢ ἑτοιμάσαι τράπεζαν τῷ λαῷ αὐτοῦ;
Verse: 21  διὰ τοῦτο ἤκουσεν κύριος καὶ ἀνεβάλετο,
καὶ πῦρ ἀνήϕϑη ἐν Ιακωβ,
καὶ ὀργὴ ἀνέβη ἐπὶ τὸν Ισραηλ,
Verse: 22  ὅτι οὐκ ἐπίστευσαν ἐν τῷ ϑεῷ
οὐδὲ ἤλπισαν ἐπὶ τὸ σωτήριον αὐτοῦ.
Verse: 23  καὶ ἐνετείλατο νεϕέλαις ὑπεράνωϑεν
καὶ ϑύρας οὐρανοῦ ἀνέῳξεν
Verse: 24  καὶ ἔβρεξεν αὐτοῖς μαννα ϕαγεῖν
καὶ ἄρτον οὐρανοῦ ἔδωκεν αὐτοῖς·
Verse: 25  ἄρτον ἀγγέλων ἔϕαγεν ἄνϑρωπος,
ἐπισιτισμὸν ἀπέστειλεν αὐτοῖς εἰς πλησμονήν.
Verse: 26  ἀπῆρεν νότον ἐξ οὐρανοῦ
καὶ ἐπήγαγεν ἐν τῇ δυναστείᾳ αὐτοῦ λίβα
Verse: 27  καὶ ἔβρεξεν ἐπ' αὐτοὺς ὡσεὶ χοῦν σάρκας
καὶ ὡσεὶ ἄμμον ϑαλασσῶν πετεινὰ πτερωτά,
Verse: 28  καὶ ἐπέπεσον εἰς μέσον τῆς παρεμβολῆς αὐτῶν
κύκλῳ τῶν σκηνωμάτων αὐτῶν,
Verse: 29  καὶ ἐϕάγοσαν καὶ ἐνεπλήσϑησαν σϕόδρα,
καὶ τὴν ἐπιϑυμίαν αὐτῶν ἤνεγκεν αὐτοῖς,
Verse: 30  οὐκ ἐστερήϑησαν ἀπὸ τῆς ἐπιϑυμίας αὐτῶν.
ἔτι τῆς βρώσεως αὐτῶν οὔσης ἐν τῷ στόματι αὐτῶν
Verse: 31  καὶ ὀργὴ τοῦ ϑεοῦ ἀνέβη ἐπ' αὐτοὺς
καὶ ἀπέκτεινεν ἐν τοῖς πίοσιν αὐτῶν
καὶ τοὺς ἐκλεκτοὺς τοῦ Ισραηλ συνεπόδισεν.
Verse: 32  ἐν πᾶσιν τούτοις ἥμαρτον ἔτι
καὶ οὐκ ἐπίστευσαν ἐν τοῖς ϑαυμασίοις αὐτοῦ,
Verse: 33  καὶ ἐξέλιπον ἐν ματαιότητι αἱ ἡμέραι αὐτῶν
καὶ τὰ ἔτη αὐτῶν μετὰ σπουδῆς.
Verse: 34  ὅταν ἀπέκτεννεν αὐτούς, ἐξεζήτουν αὐτὸν
καὶ ἐπέστρεϕον καὶ ὤρϑριζον πρὸς τὸν ϑεὸν
Verse: 35  καὶ ἐμνήσϑησαν ὅτι ὁ ϑεὸς βοηϑὸς αὐτῶν ἐστιν
καὶ ὁ ϑεὸς ὁ ὕψιστος λυτρωτὴς αὐτῶν ἐστιν.
Verse: 36  καὶ ἠπάτησαν αὐτὸν ἐν τῷ στόματι αὐτῶν
καὶ τῇ γλώσσῃ αὐτῶν ἐψεύσαντο αὐτῷ,
Verse: 37  ἡ δὲ καρδία αὐτῶν οὐκ εὐϑεῖα μετ' αὐτοῦ,
οὐδὲ ἐπιστώϑησαν ἐν τῇ διαϑήκῃ αὐτοῦ.
Verse: 38  αὐτὸς δέ ἐστιν οἰκτίρμων
καὶ ἱλάσεται ταῖς ἁμαρτίαις αὐτῶν καὶ οὐ διαϕϑερεῖ
καὶ πληϑυνεῖ τοῦ ἀποστρέψαι τὸν ϑυμὸν αὐτοῦ
καὶ οὐχὶ ἐκκαύσει πᾶσαν τὴν ὀργὴν αὐτοῦ·
Verse: 39  καὶ ἐμνήσϑη ὅτι σάρξ εἰσιν,
πνεῦμα πορευόμενον καὶ οὐκ ἐπιστρέϕον.
Verse: 40  ποσάκις παρεπίκραναν αὐτὸν ἐν τῇ ἐρήμῳ,
παρώργισαν αὐτὸν ἐν γῇ ἀνύδρῳ;
Verse: 41  καὶ ἐπέστρεψαν καὶ ἐπείρασαν τὸν ϑεὸν
καὶ τὸν ἅγιον τοῦ Ισραηλ παρώξυναν.
Verse: 42  οὐκ ἐμνήσϑησαν τῆς χειρὸς αὐτοῦ,
ἡμέρας, ἧς ἐλυτρώσατο αὐτοὺς ἐκ χειρὸς ϑλίβοντος,
Verse: 43  ὡς ἔϑετο ἐν Αἰγύπτῳ τὰ σημεῖα αὐτοῦ
καὶ τὰ τέρατα αὐτοῦ ἐν πεδίῳ Τάνεως·
Verse: 44  καὶ μετέστρεψεν εἰς αἷμα τοὺς ποταμοὺς αὐτῶν
καὶ τὰ ὀμβρήματα αὐτῶν, ὅπως μὴ πίωσιν·
Verse: 45  ἐξαπέστειλεν εἰς αὐτοὺς κυνόμυιαν, καὶ κατέϕαγεν αὐτούς,
καὶ βάτραχον, καὶ διέϕϑειρεν αὐτούς·
Verse: 46  καὶ ἔδωκεν τῇ ἐρυσίβῃ τὸν καρπὸν αὐτῶν
καὶ τοὺς πόνους αὐτῶν τῇ ἀκρίδι·
Verse: 47  ἀπέκτεινεν ἐν χαλάζῃ τὴν ἄμπελον αὐτῶν
καὶ τὰς συκαμίνους αὐτῶν ἐν τῇ πάχνῃ·
Verse: 48  καὶ παρέδωκεν εἰς χάλαζαν τὰ κτήνη αὐτῶν
καὶ τὴν ὕπαρξιν αὐτῶν τῷ πυρί·
Verse: 49  ἐξαπέστειλεν εἰς αὐτοὺς ὀργὴν ϑυμοῦ αὐτοῦ,
ϑυμὸν καὶ ὀργὴν καὶ ϑλῖψιν,
ἀποστολὴν δι' ἀγγέλων πονηρῶν·
Verse: 50  ὡδοποίησεν τρίβον τῇ ὀργῇ αὐτοῦ,
οὐκ ἐϕείσατο ἀπὸ ϑανάτου τῶν ψυχῶν αὐτῶν
καὶ τὰ κτήνη αὐτῶν εἰς ϑάνατον συνέκλεισεν
Verse: 51  καὶ ἐπάταξεν πᾶν πρωτότοκον ἐν Αἰγύπτῳ,
ἀπαρχὴν τῶν πόνων αὐτῶν ἐν τοῖς σκηνώμασι Χαμ.
Verse: 52  καὶ ἀπῆρεν ὡς πρόβατα τὸν λαὸν αὐτοῦ
καὶ ἀνήγαγεν αὐτοὺς ὡς ποίμνιον ἐν ἐρήμῳ
Verse: 53  καὶ ὡδήγησεν αὐτοὺς ἐν ἐλπίδι, καὶ οὐκ ἐδειλίασαν,
καὶ τοὺς ἐχϑροὺς αὐτῶν ἐκάλυψεν ϑάλασσα.
Verse: 54  καὶ εἰσήγαγεν αὐτοὺς εἰς ὅριον ἁγιάσματος αὐτοῦ,
ὄρος τοῦτο, ὃ ἐκτήσατο ἡ δεξιὰ αὐτοῦ,
Verse: 55  καὶ ἐξέβαλεν ἀπὸ προσώπου αὐτῶν ἔϑνη
καὶ ἐκληροδότησεν αὐτοὺς ἐν σχοινίῳ κληροδοσίας
καὶ κατεσκήνωσεν ἐν τοῖς σκηνώμασιν αὐτῶν τὰς ϕυλὰς // τοῦ Ισραηλ.
Verse: 56  καὶ ἐπείρασαν καὶ παρεπίκραναν τὸν ϑεὸν τὸν ὕψιστον
καὶ τὰ μαρτύρια αὐτοῦ οὐκ ἐϕυλάξαντο
Verse: 57  καὶ ἀπέστρεψαν καὶ ἠσυνϑέτησαν καϑὼς καὶ οἱ πατέρες αὐτῶν
καὶ μετεστράϕησαν εἰς τόξον στρεβλὸν
Verse: 58  καὶ παρώργισαν αὐτὸν ἐν τοῖς βουνοῖς αὐτῶν
καὶ ἐν τοῖς γλυπτοῖς αὐτῶν παρεζήλωσαν αὐτόν.
Verse: 59  ἤκουσεν ὁ ϑεὸς καὶ ὑπερεῖδεν
καὶ ἐξουδένωσεν σϕόδρα τὸν Ισραηλ
Verse: 60  καὶ ἀπώσατο τὴν σκηνὴν Σηλωμ,
σκήνωμα αὐτοῦ, οὗ κατεσκήνωσεν ἐν ἀνϑρώποις.
Verse: 61  καὶ παρέδωκεν εἰς αἰχμαλωσίαν τὴν ἰσχὺν αὐτῶν
καὶ τὴν καλλονὴν αὐτῶν εἰς χεῖρας ἐχϑροῦ
Verse: 62  καὶ συνέκλεισεν εἰς ῥομϕαίαν τὸν λαὸν αὐτοῦ
καὶ τὴν κληρονομίαν αὐτοῦ ὑπερεῖδεν.
Verse: 63  τοὺς νεανίσκους αὐτῶν κατέϕαγεν πῦρ,
καὶ αἱ παρϑένοι αὐτῶν οὐκ ἐπενϑήϑησαν·
Verse: 64  οἱ ἱερεῖς αὐτῶν ἐν ῥομϕαίᾳ ἔπεσαν,
καὶ αἱ χῆραι αὐτῶν οὐ κλαυσϑήσονται.
Verse: 65  καὶ ἐξηγέρϑη ὡς ὁ ὑπνῶν κύριος,
ὡς δυνατὸς κεκραιπαληκὼς ἐξ οἴνου,
Verse: 66  καὶ ἐπάταξεν τοὺς ἐχϑροὺς αὐτοῦ εἰς τὰ ὀπίσω
ὄνειδος αἰώνιον ἔδωκεν αὐτοῖς.
Verse: 67  καὶ ἀπώσατο τὸ σκήνωμα Ιωσηϕ
καὶ τὴν ϕυλὴν Εϕραιμ οὐκ ἐξελέξατο·
Verse: 68  καὶ ἐξελέξατο τὴν ϕυλὴν Ιουδα,
τὸ ὄρος τὸ Σιων, ὃ ἠγάπησεν,
Verse: 69  καὶ ᾠκοδόμησεν ὡς μονοκερώτων τὸ ἁγίασμα αὐτοῦ,
ἐν τῇ γῇ ἐϑεμελίωσεν αὐτὴν εἰς τὸν αἰῶνα.
Verse: 70  καὶ ἐξελέξατο Δαυιδ τὸν δοῦλον αὐτοῦ
καὶ ἀνέλαβεν αὐτὸν ἐκ τῶν ποιμνίων τῶν προβάτων,
Verse: 71  ἐξόπισϑεν τῶν λοχευομένων ἔλαβεν αὐτὸν
ποιμαίνειν Ιακωβ τὸν λαὸν αὐτοῦ
καὶ Ισραηλ τὴν κληρονομίαν αὐτοῦ,
Verse: 72  καὶ ἐποίμανεν αὐτοὺς ἐν τῇ ἀκακίᾳ τῆς καρδίας αὐτοῦ
καὶ ἐν ταῖς συνέσεσι τῶν χειρῶν αὐτοῦ ὡδήγησεν αὐτούς. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.