TITUS
Vetus Testamentum graece iuxta LXX interpretes
Part No. 842
Previous part

Chapter: 11 
Verse: 1  Εὐόδωσεν τὰ ἔργα αὐτῶν ἐν χειρὶ προϕήτου ἁγίου.
Verse: 2  διώδευσαν ἔρημον ἀοίκητον
καὶ ἐν ἀβάτοις ἔπηξαν σκηνάς·
Verse: 3  ἀντέστησαν πολεμίοις καὶ ἐχϑροὺς ἠμύναντο.
Verse: 4  ἐδίψησαν καὶ ἐπεκαλέσαντό σε,
καὶ ἐδόϑη αὐτοῖς ἐκ πέτρας ἀκροτόμου ὕδωρ
καὶ ἴαμα δίψης ἐκ λίϑου σκληροῦ.
Verse: 5  δι' ὧν γὰρ ἐκολάσϑησαν οἱ ἐχϑροὶ αὐτῶν,
διὰ τούτων αὐτοὶ ἀποροῦντες εὐεργετήϑησαν.
Verse: 6  ἀντὶ μὲν πηγῆς ἀενάου ποταμοῦ
αἵματι λυϑρώδει ταραχϑέντος
Verse: 7  εἰς ἔλεγχον νηπιοκτόνου διατάγματος
ἔδωκας αὐτοῖς δαψιλὲς ὕδωρ ἀνελπίστως
Verse: 8  δείξας διὰ τοῦ τότε δίψους
πῶς τοὺς ὑπεναντίους ἐκόλασας.
Verse: 9  ὅτε γὰρ ἐπειράσϑησαν, καίπερ ἐν ἐλέει παιδευόμενοι,
ἔγνωσαν πῶς μετ' ὀργῆς κρινόμενοι ἀσεβεῖς ἐβασανίζοντο·
Verse: 10  τούτους μὲν γὰρ ὡς πατὴρ νουϑετῶν ἐδοκίμασας,
ἐκείνους δὲ ὡς ἀπότομος βασιλεὺς καταδικάζων ἐξήτασας.
Verse: 11  καὶ ἀπόντες δὲ καὶ παρόντες ὁμοίως ἐτρύχοντο·
Verse: 12  διπλῆ γὰρ αὐτοὺς ἔλαβεν λύπη
καὶ στεναγμὸς μνημῶν τῶν παρελϑόντων·
Verse: 13  ὅτε γὰρ ἤκουσαν διὰ τῶν ἰδίων κολάσεων
εὐεργετημένους αὐτούς, ᾔσϑοντο τοῦ κυρίου.
Verse: 14  ὃν γὰρ ἐν ἐκϑέσει πάλαι ῥιϕέντα ἀπεῖπον χλευάζοντες,
ἐπὶ τέλει τῶν ἐκβάσεων ἐϑαύμασαν
οὐχ ὅμοια δικαίοις διψήσαντες.
Verse: 15  ἀντὶ δὲ λογισμῶν ἀσυνέτων ἀδικίας αὐτῶν,
ἐν οἷς πλανηϑέντες ἐϑρήσκευον ἄλογα ἑρπετὰ καὶ κνώδαλα // εὐτελῆ,
ἐπαπέστειλας αὐτοῖς πλῆϑος ἀλόγων ζῴων εἰς ἐκδίκησιν,
Verse: 16  ἵνα γνῶσιν ὅτι, δι' ὧν τις ἁμαρτάνει, διὰ τούτων κολάζεται.
Verse: 17  οὐ γὰρ ἠπόρει ἡ παντοδύναμός σου χεὶρ
καὶ κτίσασα τὸν κόσμον ἐξ ἀμόρϕου ὕλης
ἐπιπέμψαι αὐτοῖς πλῆϑος ἄρκων ἢ ϑρασεῖς λέοντας
Verse: 18  ἢ νεοκτίστους ϑυμοῦ πλήρεις ϑῆρας ἀγνώστους
ἤτοι πυρπνόον ϕυσῶντας ἄσϑμα
ἢ βρόμον λικμωμένους καπνοῦ
ἢ δεινοὺς ἀπ' ὀμμάτων σπινϑῆρας ἀστράπτοντας,
Verse: 19  ὧν οὐ μόνον ἡ βλάβη ἠδύνατο συνεκτρῖψαι αὐτούς,
ἀλλὰ καὶ ἡ ὄψις ἐκϕοβήσασα διολέσαι.
Verse: 20  καὶ χωρὶς δὲ τούτων ἑνὶ πνεύματι πεσεῖν ἐδύναντο
ὑπὸ τῆς δίκης διωχϑέντες
καὶ λικμηϑέντες ὑπὸ πνεύματος δυνάμεώς σου·
ἀλλὰ πάντα μέτρῳ καὶ ἀριϑμῷ καὶ σταϑμῷ διέταξας.
Verse: 21  τὸ γὰρ μεγάλως ἰσχύειν σοι πάρεστιν πάντοτε,
καὶ κράτει βραχίονός σου τίς ἀντιστήσεται;
Verse: 22  ὅτι ὡς ῥοπὴ ἐκ πλαστίγγων ὅλος ὁ κόσμος ἐναντίον σου
καὶ ὡς ῥανὶς δρόσου ὀρϑρινὴ κατελϑοῦσα ἐπὶ γῆν.
Verse: 23  ἐλεεῖς δὲ πάντας, ὅτι πάντα δύνασαι,
καὶ παρορᾷς ἁμαρτήματα ἀνϑρώπων εἰς μετάνοιαν.
Verse: 24  ἀγαπᾷς γὰρ τὰ ὄντα πάντα
καὶ οὐδὲν βδελύσσῃ ὧν ἐποίησας·
οὐδὲ γὰρ ἂν μισῶν τι κατεσκεύασας.
Verse: 25  πῶς δὲ διέμεινεν ἄν τι, εἰ μὴ σὺ ἠϑέλησας,
ἢ τὸ μὴ κληϑὲν ὑπὸ σοῦ διετηρήϑη;
Verse: 26  ϕείδῃ δὲ πάντων, ὅτι σά ἐστιν, δέσποτα ϕιλόψυχε·

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.