და აღვიხილენ თუალნი ჩემნი, და ვიხილე, და აჰა ესერა კაცი, და ჴელსა მისსა აქუნდა საბელი ქუეყანის-საზომელი.
და ვარქუ მას, ვიდრე ხუალ შენ. და მრქუა მე; განზომად იჱრუსალემისა, და ხილვად რავედ არს სივრცჱ მისი, და რაოდენ არს სიგრძჱ მისი.
და ანგელოზი იგი, რომელი მეტყოდა მე დგა; და ანგელოზი სხუაჲ მოვიდოდა შემთხუევად მისა.
და მიუგო მას და ჰრქუა; აღირბინე და არქუ ჭაბუკსა იმას, ნაყოფიერად დაიმკჳდროს იჱრუსალემი სიმრავლისაგან კაცთაჲსა და საცხოვართა შორის მისა.
და მე ვეყო მას ზღუდე ცეცხლის გარემო, და დიდება ვეყო მას შორის მისსა.
ჵ ჵ ივლტოდე<თ> ქუეყანისაგან ჩრდილოჲსა, იტყჳს უფალი, რამეთუ ოთხთაგან ქართა ცისათა შეგკრიბნე თქუენ, იტყჳს უფალი,
სიონდ განერენით, რომელნი დამკჳდრებულ ხართ ასულისა ბაბილოვნისანი.
რამეთუ ამას Page of ms. J: A22v იტყჳს უფალი ყოვლისა-მპყრობელი, შემდგომად დიდებისა მომავლინა/ მე წარმართთა, რომელთა წარგტყუენნეს, რამეთუ რომელმან შეგახოს თქუენ ვითარცა რომელმან შეახის გუგასა თუალისა მისისასა.
რამეთუ აჰა ესერა მოვჰჴადო ჴელი ჩემი მათ ზედა, და იყვნენ ტყუჱ მათდა, რომელთა იგინი ჰმონებდეს მათ, და სცნათ რამეთუ უფალმან მომავლინა მე ყოვლისა-მპყრობელმან.
გიხაროდენ და მხიარულ იყავ სიონ, რამეთუ მე ესერა მოვალ, და დავემკჳდრო შორის შენსა, იტყჳს უფალი.
და შემოევედრებოდიან თესლნი მრავალნი უფალსა მას დღესა შინა, და იყვნენ მისა ერად, და დაემკჳდრნენ შორის შენსა, და სცნა რამეთუ უფალმან ყოვლისა-მპყრობელმან მომავლინა მე შენდა.
და დაიმკჳდროს უფალმან იუდაჲ ნაწილი იგი მისი ქუეყანაჲ წმიდაჲ, და სათნო იყოს მერმეცა იჱრუსალემი.
და ეშინოდენ ყოველსა ჴორციელსა პირისაგან უფლისა, რამეთუ აღდგომილ არს ღრუბლით გამო წმიდით მისით.:
