TITUS
Biblia Udica, Versio Nizhensis: Vetus Testamentum
Part No. 58
Previous part

Chapter: 18 

Q̣ONƷ́UĠOY be͑yinśxo q̇a mandi leviġo tapšurbi äš
Q'ONČUĞOY běyinšxo q'a mandi leviğo tapşurbi əş


Verse: 1  Link to rat Q̣ONƷ́UĠON Aarona pine: "Hun, vi ġarmoġon saal vi näsiläxun bakalṭoġon ə͑vel ganu günax äšesunaxun efi nu murdarlayinšaksuna be͑ġalanan. Be͑yinśluġi ə͑vel mandi nu murdarlayinšaksun isä sayǯä vi q̇a vi ġarmoġoy ozanene.
   Q'ONČUĞON Aarona pine: "Hun, vi ğarmoğon saal vi nəsiləxun bakalt'oğon ı̌vel ganu günax əşesunaxun efi nu murdarlayinşaksuna běğalanan. Běyinšluği ı̌vel mandi nu murdarlayinşaksun isə saycə vi q'a vi ğarmoğoy ozanene.

Verse: 2  Link to rat Vi tayfinaxun bakala mandi leviġoval vi ṭo͑ġo͑l exṭa ki, hun q̇a vi ġarmoġon ə͑vel čadəra q̇ulluġbaṭan vä͑x kömäybaṭun.
   Vi tayfinaxun bakala mandi leviğoval vi t'ǒğǒl ext'a ki, hun q'a vi ğarmoğon ı̌vel çadıra q'ulluğbat'an və̌x köməybat'un.

Verse: 3  Link to rat Barta šoṭoġon vi kiin oq̇a äšṗi va kömäybeq̇aṭun, ama nä q̇urban ečala ganu, nä šoṭay sal sa ätṭäǯä ə͑śa maq̇aṭun biti, tene vä͑nal biyalnan, šoroxal.
   Barta şot'oğon vi kiin oq'a əşp'i va köməybeq'at'un, ama nə q'urban eçala ganu, nə şot'ay sal sa ətt'əcə ı̌ša maq'at'un biti, tene və̌nal biyalnan, şoroxal.

Verse: 4  Link to rat Barta ə͑vel čadəri bütüm äšurxosṭa vaxun baki kömäybeq̇aṭun, ama ef tayfinaxun nu bakala sal sa amdara ṭiya ə͑śa bisṭa barmatanan.
   Barta ı̌vel çadıri bütüm əşurxost'a vaxun baki köməybeq'at'un, ama ef tayfinaxun nu bakala sal sa amdara t'iya ı̌ša bist'a barmatanan.

Verse: 5  Link to rat Ama čadəri boš baci q̇a q̇urban ečala ganu ə͑śa biti biq̇ala äšurxo vä͑n banan, tene Bez äǯuġ ṗurum israilluġoy loxol bäč̣üḳeġale.
   Ama çadıri boş baśi q'a q'urban eçala ganu ı̌ša biti biq'ala əşurxo və̌n banan, tene Bez əcuğ p'urum israilluğoy loxol bəc'ük'eğale.

Verse: 6  Link to rat Israilluġoy bošṭan leviġo Zuz č̣äḳṗi vä͑x pay ḳinäḳ tadi ki, vä͑x kömäybeq̇aṭun. Šorox ə͑vel čadəra q̇ulluġbseynaḳṭun č̣äḳece.
   İsrailluğoy boşt'an leviğo Zuz c'ək'p'i və̌x pay k'inək' tadi ki, və̌x köməybeq'at'un. Şorox ı̌vel çadıra q'ulluğbseynak't'un c'ək'eśe.

Verse: 7  Link to rat Ama be͑yinśluġbi q̇urban ečala ganu q̇a čadəri boš pärdin bać̣ane bakala än ə͑vel ganu ə͑śalayinšaksuna sayǯä va q̇a vi ġarmoġoz iǯaza tasṭa, moṭoġo sa pay ḳinäḳ vä͑xez tasṭa. Vä͑xun bašq̇a šunesa ṭiya ə͑śalayinšakayin besṗanan".
   Ama běyinšluğbi q'urban eçala ganu q'a çadıri boş pərdin bač'ane bakala ən ı̌vel ganu ı̌šalayinşaksuna saycə va q'a vi ğarmoğoz icaza tast'a, mot'oğo sa pay k'inək' və̌xez tast'a. Və̌xun başq'a şunesa t'iya ı̌šalayinşakayin besp'anan".



Be͑yinśxoynaḳ q̇a leviġoynaḳ bakala pay
Běyinšxoynak' q'a leviğoynak' bakala pay


Verse: 8  Link to rat Q̣ONƷ́UĠON Aarona pine: "Mone, Zaynaḳ ečala payurxo bitova be͑ġsuna va Zuz tapšurbi. Zaynaḳ ečala bito ə͑vel payurxo vi q̇a vi ġarmoġoy bakale. Šorox vä͑xe kofsṭa, barta hämišäl metärq̇an baki.
   Q'ONČUĞON Aarona pine: "Mone, Zaynak' eçala payurxo bitova běğsuna va Zuz tapşurbi. Zaynak' eçala bito ı̌vel payurxo vi q'a vi ğarmoğoy bakale. Şorox və̌xe kofst'a, barta həmişəl metərq'an baki.

Verse: 9  Link to rat Mo Zaynaḳ ečeri ə͑vel paye - q̇urbanxoy nu boḳosṗi hissooxe. Zaynaḳ ečala bito payurxoy - čuresa taxəli paye, čuresa günaxxo oc̣kseynaḳ bakala nääl taxsəra oc̣kseynaḳ bakala q̇urbanxoy me hissä efi bakale.
   Mo Zaynak' eçeri ı̌vel paye - q'urbanxoy nu bok'osp'i hissooxe. Zaynak' eçala bito payurxoy - çuresa taxıli paye, çuresa günaxxo os'kseynak' bakala nəəl taxsıra os'kseynak' bakala q'urbanxoy me hissə efi bakale.

Verse: 10  Link to rat Šoṭo än ə͑vel sa ukun ḳinäḳ uka. Šoṭo sayǯä išq̇arxone ukes bakon, barta mo vä͑ynaḳ ə͑velxoy ə͑velq̇an baki.
   Şot'o ən ı̌vel sa ukun k'inək' uka. Şot'o saycə işq'arxone ukes bakon, barta mo və̌ynak' ı̌velxoy ı̌velq'an baki.

Verse: 11  Link to rat Zaynaḳ sa pay baksuna aḳesṭeynaḳ alabiyoroxal bito vine. Šoṭoġo va, vi ġarmoġo saal xuyärmoġoz tasṭa, šorox vä͑xe kofsṭa, barta hämišäl metärq̇an baki. Vi külfäti boš pak bakala här sunṭin šoṭoxun ukes banekon.
   Zaynak' sa pay baksuna ak'est'eynak' alabiyoroxal bito vine. Şot'oğo va, vi ğarmoğo saal xuyərmoğoz tast'a, şorox və̌xe kofst'a, barta həmişəl metərq'an baki. Vi külfəti boş pak bakala hər sunt'in şot'oxun ukes banekon.

Verse: 12  Link to rat Q̣ONƷ́UĠOYNAḲ samǯi nübär ḳinäḳ ečala än šaaṭ zeytuni č̣äyinä, noć̣a saal taxəli payal vaz tasṭa.
   Q'ONČUĞOYNAK' samci nübər k'inək' eçala ən şaat' zeytuni c'əyinə, noč'a saal taxıli payal vaz tast'a.

Verse: 13  Link to rat Oćalen tadi bito barurxoxun Q̣ONƷ́UĠOYNAḲ ečala samǯi nübärxo vine. Vi külfäti boš pak bakala här sunṭin šoṭoxun ukes banekon.
   Oç̌alen tadi bito barurxoxun Q'ONČUĞOYNAK' eçala samci nübərxo vine. Vi külfəti boş pak bakala hər sunt'in şot'oxun ukes banekon.

Verse: 14  Link to rat Israilluġoy boš Q̣ONƷ́UĠOYNAḲ pay \ ḳinäḳ ǯöybaki här šey vine. *
   İsrailluğoy boş Q'ONČUĞOYNAK' pay \ k'inək' cöybaki hər şey vine. *

Verse: 15  Link to rat Amdarxoy süfṭin ġar äyeläl, heyvanxoy süfṭin ärkäy balal - Q̣ONƷ́UĠOYNAḲ bakala me payurxo - vine. Ama insani balin q̇a haram hesabbakala heyvani balin gala tängä exṭa.
   Amdarxoy süft'in ğar əyeləl, heyvanxoy süft'in ərkəy balal - Q'ONČUĞOYNAK' bakala me payurxo - vine. Ama insani balin q'a haram hesabbakala heyvani balin gala təngə ext'a.

Verse: 16  Link to rat Barta šorox sa xašin bakaṭan, va ə͑vel gane šeḳelen * qo šeḳel gümüš tadi šoṭoġo haq̇eq̇aṭun (sa šeḳel q̇a gere).
   Barta şorox sa xaşin bakat'an, va ı̌vel gane şek'elen * qo şek'el gümüş tadi şot'oğo haq'eq'at'un (sa şek'el q'a gere).

Verse: 17  Link to rat Ama čure, eġeli saal kečin samǯi ärkäy balin gala hiḳḳal exmada, šoṭoġo śampa. Šorox ə͑vele; šoṭoġoy ṗiya q̇urban ečala gane börüġo čäčädi ičoġoy piyal boḳosṗa, šoṭo görä ki, šoṭoġoy boḳuni ad Q̣ONƷ́UĠO iräzibala ade.
   Ama çure, eğeli saal keçin samci ərkəy balin gala hik'k'al exmada, şot'oğo šampa. Şorox ı̌vele; şot'oğoy p'iya q'urban eçala gane börüğo çəçədi içoğoy piyal bok'osp'a, şot'o görə ki, şot'oğoy bok'uni ad Q'ONČUĞO irəzibala ade.

Verse: 18  Link to rat Šoṭoġoy yeq̇ isä va mandale. Q̣ONƷ́UĠOYNAḲ sa pay baksuna aḳesṭeynaḳ alabaki döše yeq̇ q̇a yön bude yeq̇ va mandalṭullariḳ.
   Şot'oğoy yeq' isə va mandale. Q'ONČUĞOYNAK' sa pay baksuna ak'est'eynak' alabaki döşe yeq' q'a yön bude yeq' va mandalt'ullarik'.

Verse: 19  Link to rat Israilluġon Q̣ONƷ́UĠOYNAḲ ečala bito ə͑vel payurxo va, vi ġarmoġo saal xuyärmoġoz tasṭa. Šorox vä͑xe kofsṭa, barta hämišäl metärq̇an baki. Mo Bezi vaxun saal vi näsiläxun ġaćeġala hämišäluġ, nu careġala sa iräziluġe". * \ elaxṗi ukun boxoy mandala ḳinäḳ.
   İsrailluğon Q'ONČUĞOYNAK' eçala bito ı̌vel payurxo va, vi ğarmoğo saal xuyərmoğoz tast'a. Şorox və̌xe kofst'a, barta həmişəl metərq'an baki. Mo Bezi vaxun saal vi nəsiləxun ğaç̌eğala həmişəluğ, nu śareğala sa irəziluğe". * \ elaxp'i ukun boxoy mandala k'inək'.

Verse: 20  Link to rat Q̣ONƷ́UĠON Aarona pine: "Zu israilluġo tadala oćala vä͑ynaḳ miras butene, vä͑x ṭe oćalaxun pay kofṭalatene, šoṭo görä ki, vä͑x kofṭala mirasi q̇a paye gala här šeya Zu vä͑x ṗaṗesṗoz.
   Q'ONČUĞON Aarona pine: "Zu israilluğo tadala oç̌ala və̌ynak' miras butene, və̌x t'e oç̌alaxun pay koft'alatene, şot'o görə ki, və̌x koft'ala mirasi q'a paye gala hər şeya Zu və̌x p'ap'esp'oz.

Verse: 21  Link to rat Israilluġon Zaynaḳ ečala ičoġoy girbi bare vic̣ payaxun sa paya isä leviġoz tasṭa. Mo šoṭoġoy ə͑vel gala bala q̇ulluġi äväze. *
   İsrailluğon Zaynak' eçala içoğoy girbi bare vis' payaxun sa paya isə leviğoz tast'a. Mo şot'oğoy ı̌vel gala bala q'ulluği əvəze. *

Verse: 22  Link to rat Ama israilluyox ə͑vel čadəra maq̇aṭun ə͑śalayinšaki, tene iz ǯaza bisun bakala günaxa bafṭalṭun.
   Ama israilluyox ı̌vel çadıra maq'at'un ı̌šalayinşaki, tene iz caza bisun bakala günaxa baft'alt'un.

Verse: 23  Link to rat Barta sayǯä leviġonq̇an ə͑vel čadəra äšṗi q̇ulluġbi, ṭe gane pak mandi nu murdarlayinšaksunal šoṭoġon be͑ġalaṭun. Mo vä͑ynaḳ näsiläxun-näsilä č̣ovakala hämišäluġ sa q̇aydane. Zu israilluġo tadala oćalaxun šoṭoġoynaḳ pay butene.
   Barta saycə leviğonq'an ı̌vel çadıra əşp'i q'ulluğbi, t'e gane pak mandi nu murdarlayinşaksunal şot'oğon běğalat'un. Mo və̌ynak' nəsiləxun-nəsilə c'ovakala həmişəluğ sa q'aydane. Zu israilluğo tadala oç̌alaxun şot'oğoynak' pay butene.

Verse: 24  Link to rat Šoṭay gala leviġo israilluġon Zaynaḳ ečala paya - ičoġoy girbi bare vic̣ payaxun sa payaz tasṭa. Moṭo göräl leviġo vä͑x tadala oćalaxun pay tene kofsṭa".
   Şot'ay gala leviğo israilluğon Zaynak' eçala paya - içoğoy girbi bare vis' payaxun sa payaz tast'a. Mot'o görəl leviğo və̌x tadala oç̌alaxun pay tene kofst'a".

Verse: 25  Link to rat Q̣ONƷ́UĠON Moiseya pine:
   Q'ONČUĞON Moiseya pine:

Verse: 26  Link to rat "Leviġo metär upa: "Zu vä͑x miras ḳinäḳ tadi paya, israilluġon Zaynaḳ ečala ičoġoy girbi bare vic̣ paye sunṭu exṭaṭan, šoṭay vic̣ paye sa paya Q̣ONƷ́UĠOYNAḲ ečanan.
   "Leviğo metər upa: "Zu və̌x miras k'inək' tadi paya, israilluğon Zaynak' eçala içoğoy girbi bare vis' paye sunt'u ext'at'an, şot'ay vis' paye sa paya Q'ONČUĞOYNAK' eçanan.

Verse: 27  Link to rat Me paya israilluġon Zaynaḳ ičoġoy exṗi arumaxun q̇a bapi finaxun ečala pay ḳinäḳ q̇abulboz.
   Me paya israilluğon Zaynak' içoğoy exp'i arumaxun q'a bapi finaxun eçala pay k'inək' q'abulboz.

Verse: 28  Link to rat Metärluġen, \ israilluġon ičoġoy girbi bare vic̣ paye sunṭu vä͑ynaḳ ečaṭan, šoṭoxun Zaynaḳ bakala hissinä ǯöybanan. Bez paya be͑yinś Aarona tadanan.
   Metərluğen, \ israilluğon içoğoy girbi bare vis' paye sunt'u və̌ynak' eçat'an, şot'oxun Zaynak' bakala hissinə cöybanan. Bez paya běyinš Aarona tadanan.

Verse: 29  Link to rat Vä͑ynaḳ ečala payurxoxun Q̣ONƷ́UĠOYNAḲ än šaaṭ ganu ǯöybanan, šoṭo görä ki, me pay ə͑vel paye".
   Və̌ynak' eçala payurxoxun Q'ONČUĞOYNAK' ən şaat' ganu cöybanan, şot'o görə ki, me pay ı̌vel paye".

Verse: 30  Link to rat Leviġo upanan: "Vä͑ynaḳ ečeri payaxun Zaynaḳ än šaaṭ ganu ǯöybaṭan, Zu šoṭo vä͑xun ef exṗi arumaxun q̇a ef bapi finaxun ečala pay ḳinäḳ q̇abulboz.
   Leviğo upanan: "Və̌ynak' eçeri payaxun Zaynak' ən şaat' ganu cöybat'an, Zu şot'o və̌xun ef exp'i arumaxun q'a ef bapi finaxun eçala pay k'inək' q'abulboz.

Verse: 31  Link to rat Mandiyo isä efiq̇an baki, efi külfäti boš bakalṭoġoy bitoṭin šoṭoxun ukes banekon. Mo efi ə͑vel gala bala q̇ulluġin äväze, šoṭo efi üḳen čureġala gala ukes banankon.
   Mandiyo isə efiq'an baki, efi külfəti boş bakalt'oğoy bitot'in şot'oxun ukes banekon. Mo efi ı̌vel gala bala q'ulluğin əvəze, şot'o efi ük'en çureğala gala ukes banankon.

Verse: 32  Link to rat Vä͑n Q̣ONƷ́UĠOYNAḲ än šaaṭ ganu ǯöybsunen, ṭe pay ə͑vel mandi tene murdarlayinšaksa. Šoṭo göräl ṭe paya uksunen iz ǯaza bisun bakala günaxa tenan bafsṭa".
   Və̌n Q'ONČUĞOYNAK' ən şaat' ganu cöybsunen, t'e pay ı̌vel mandi tene murdarlayinşaksa. Şot'o görəl t'e paya uksunen iz caza bisun bakala günaxa tenan bafst'a".



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.