TITUS
Biblia Udica, Versio Nizhensis: Vetus Testamentum
Part No. 227
Previous part

Chapter: 147 

147-ǯi ω͑vel mä͑ġ
147-ci Ǐvel mə̌ğ


Verse: 1    "Q̣ONƷ́UĠO halalq̇an baki" * upanan!
   "Q'ONČUĞO halalq'an baki" * upanan!
   \ Buxaʒ́uġoynaḳ mä͑ġpsunaxun šaaṭ šey tene bu!
   \ Buxačuğoynak' mə̌ğpsunaxun şaat' şey tene bu!
    Sa be͑ġa tärifläyinšbsun Šoṭo hetäre yarayinšbsa,
    Sa běğa tərifləyinşbsun Şot'o hetəre yarayinşbsa,
    Amdarane mu͑qsṭa Šoṭay c̣iya alabsunen.
    Amdarane mǔqst'a Şot'ay s'iya alabsunen.

Verse: 2    Yerusalima täzädän biq̇alone Q̣ONƷ́UX,
   Yerusalima təzədən biq'alone Q'ONČUX,
    Buxaʒ́uxsuzṭoġoy kiyel kofṭi israilluġo qoš qaydalone.
    Buxačuxsuzt'oğoy kiyel koft'i israilluğo qoş qaydalone.

Verse: 3    Üḳ xä͑xä͑ṭoġo üḳ tadalo,
   Ük' xə̌xə̌t'oğo ük' tadalo,
    Ičoġoy yaroġo ġaćṗi q̇olaybalone Šo.
    İçoğoy yaroğo ğaç̌p'i q'olaybalone Şo.

Verse: 4    Muć̣uliġoy sayane ava Šoṭin,
   Muč'uliğoy sayane ava Şot'in,
    C̣iyene čalxsa šoṭoġoy härsunṭu.
    S'iyene çalxsa şot'oğoy hərsunt'u.

Verse: 5    Beš Q̣ONƷ́UX kalane,
   Beş Q'ONČUX kalane,
    Iz kiyexun nu ayeġala äš tene bu Šoṭay,
    İz kiyexun nu ayeğala əş tene bu Şot'ay,
    Beyne ṗaq̇esṭala šey tene Šoṭay avabakalorox.
    Beyne p'aq'est'ala şey tene Şot'ay avabakalorox.

Verse: 6    Faġərxo e͑qevḳalo,
   Fağırxo ěqevk'alo,
    Pisṭoġo isä saki ćaxćuxḳalone Q̣ONƷ́UX.
    Pist'oğo isə saki ç̌axç̌uxk'alone Q'ONČUX.

Verse: 7    Mä͑ġur mä͑ġpi šükürbanan Q̣ONƷ́UĠO,
   Mə̌ğur mə̌ğpi şükürbanan Q'ONČUĞO,
    Arfa farpi tärifläyinšanan beš Buxaʒ́uġo!
    Arfa farpi tərifləyinşanan beş Buxačuğo!

Verse: 8    Göynul asoyxo girbi oćalin loxol aġala ciḳalo,
   Göynul asoyxo girbi oç̌alin loxol ağala śik'alo,
    Buruxmoġo o göyünbalone Šo.
    Buruxmoğo o göyünbalone Şo.

Verse: 9    Ä͑qnä heyvanxoy yema ṗaṗesṗalo,
   Ə̌qnə heyvanxoy yema p'ap'esp'alo,
    Q̣uzġuni busabaki baloġoy źomo girbalone Šo.
    Q'uzğuni busabaki baloğoy ǰomo girbalone Şo.

Verse: 10    Nä iz e͑k bäyič̣ bakalo,
   Nə iz ěk bəyic' bakalo,
    Nääl ič yeyin bakalo tene Buxaʒ́uġoy piyes šaaṭ aḳeġalo.
    Nəəl iç yeyin bakalo tene Buxačuğoy piyes şaat' ak'eğalo.

Verse: 11    Izi laxi yaq̇en taġalorox,
   İzi laxi yaq'en tağalorox,
    Sayǯä Šoṭay nu badalbakala čuresuna umudbakaloroxe Buxaʒ́uġoy piyes šaaṭ aḳeġon. *
    Saycə Şot'ay nu badalbakala çuresuna umudbakaloroxe Buxačuğoy piyes şaat' ak'eğon. *

Verse: 12    Ay Yerusalim, Q̣ONƷ́UĠOY c̣iya alaba!
   Ay Yerusalim, Q'ONČUĞOY s'iya alaba!
    Ay Sion, * vi Buxaʒ́uġo tärifläyinša!
    Ay Sion, * vi Buxačuğo tərifləyinşa!

Verse: 13    Vi darvazoġo osṭaarbi va q̇orišalo,
   Vi darvazoğo ost'aarbi va q'orişalo,
    Vi ǯamaata xeyir-bäräkät tadalone Šo.
    Vi camaata xeyir-bərəkət tadalone Şo.

Verse: 14    Šiṗluġe ečon Šoṭin me Vi oćali amdarxoynaḳ,
   Şip'luğe eçon Şot'in me Vi oç̌ali amdarxoynak',
    Šoṭoġoy pulane boševḳon ambarxo bakala än šaaṭ taxəlen.
    Şot'oğoy pulane boşevk'on ambarxo bakala ən şaat' taxılen.

Verse: 15    Oćala ämirbsun q̇a
   Oç̌ala əmirbsun q'a
    Šoṭay äyiti taci ṗaṗsun sane baksa.
    Şot'ay əyiti taśi p'ap'sun sane baksa.

Verse: 16    ω͑źene buṭḳon Šoṭin oćali ćoya läyifen buṭḳala ḳinäḳ,
   Ǐǰene but'k'on Şot'in oç̌ali ç̌oya ləyifen but'k'ala k'inək',
    Ḳä͑ne hari arcon oq̇a žeq̇a mušadaṭan taci arcala ḳinäḳ.
    K'ə̌ne hari arśon oq'a jeq'a muşadat'an taśi arśala k'inək'.

Verse: 17    Tääre hari baron alaxun źe͑ barala ḳinäḳ,
   Təəre hari baron alaxun ǰě barala k'inək',
    Šuva portṗon Šoṭay yaq̇abala me čaxluġa?
    Şuva portp'on Şot'ay yaq'abala me çaxluğa?

Verse: 18    Sa äyitene xebi ciḳon Šoṭin me buzurxo,
   Sa əyitene xebi śik'on Şot'in me buzurxo,
    Izi źomoxun č̣eġala näfäsene qaydi xena č̣urevkon šoṭoġo.
    İzi ǰomoxun c'eğala nəfəsene qaydi xena c'urevkon şot'oğo.

Verse: 19    Izi äyitäne pi Šoṭin Iaḳovaxun baki näsilä,
   İzi əyitəne pi Şot'in İak'ovaxun baki nəsilə,
    Izi ḳanunxo q̇a ämirxone ṗaṗesṗi israilluġo.
    İzi k'anunxo q'a əmirxone p'ap'esp'i israilluğo.

Verse: 20    Q̣eräz mani milläteynaḳe bey moṭoġo?
   Q'erəz mani milləteynak'e bey mot'oğo?
    Sal xavar tene bu šoṭoġoy Buxaʒ́uġoy ḳanunxoxun!
    Sal xavar tene bu şot'oğoy Buxačuğoy k'anunxoxun!
   \ "Q̣ONƷ́UĠO halalq̇an baki" upanan!
   \ "Q'ONČUĞO halalq'an baki" upanan!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.