TITUS
Armenian NT (Zohrab Bible)
Part No. 76
Previous part

Chapter: 8  
(Ը՜)


Passage: 5-4 
Verse: 1   Link to gnt   Իսկ Յիսուս գնաց ի լեառն ձիթենեաց։

Verse: 2   Link to gnt   Ընդ առաւօտսն դարձեալ եկն ի տաճարն. եւ գայր առ նա ամենայն ժողովուրդն, եւ ուսուցանէր զնոսա·

Verse: 3   Link to gnt   Ածին քահանայապետքն եւ փարիսեցիք՝ կին մի ըմբռնեալ ի շնութեան. եւ կացուցեալ զնա առաջի.

Verse: 4   Link to gnt   Ասեն. կինս այս ըմբեռնեալ՝ ինքն յայտնապէս շնացեալ է։

Verse: 5   Link to gnt   Եւ յօրէնսն Մովսէս մեզ պատուիրեաց զայսպիսիս քարկոծել. արդ դու զինչ ասես վասն դորա։

Verse: 6   Link to gnt   Զայս ասէին՝ փորձելով զնա, զի ունիցին ամբաստանութիւն զնմանէ։ Իսկ Յիսուս ի խոնարհ հայելով գրէր մատամբն յերկրի։

Verse: 7   Link to gnt   Իսկ իբրեւ ստիպեցին հարցանելով ցնա, հայեցեալ ի վեր՝ ասէ ցնոսա. անմեղն ի ձէնջ, նախ՝ նա ընկեսցէ քար ի վերայ դորա։

Verse: 8   Link to gnt   Եւ դարձեալ ի խոնարհ նայելով՝ գրէր յերկրի։

Verse: 9   Link to gnt   Եւ լուեալ՝ ելանէին մի ըստ միոջէ՝ սկսեալ յառաջնոցն մինչեւ ի վերջինսն եւ մնաց միայն Յիսուս, եւ կինն՝ կայր առաջի նորա։

Verse: 10   Link to gnt   Պատասխանի ետ Յիսուս, եւ ասէ ցնա. կին դու՝ ուր են ոչ ոք զքեզ դատապարտեաց։

Verse: 11   Link to gnt   Եւ ասէ. ոչ տէր։ Եւ ասէ Յիսուս. եւ ոչ ես դատապարտեմ զքեզ. երթ՝ յայսմհետէ՝ մի մեղանչեր։

Verse: 12   Link to gnt   Դարձեալ խօսեցաւ ընդ նոսա Յիսուս՝ եւ ասէ. ես եմ լոյս աշխարհի. որ գայ զկնի իմ՝ ընդ խաւար մի գնասցէ. այլ ընկալցի զլոյսն կենաց։

Verse: 13   Link to gnt   Ասեն ցնա Փարիսեցիքն. դու վասն անձին քոյ վկայես, եւ վկայութիւն քո չէ ճշմարիտ։

Verse: 14   Link to gnt   Պատասխանի ետ Յիսուս՝ եւ ասէ ցնոսա. թէպէտ եւ ես վկայեմ վասն անձին իմոյ՝ վկայութիւն իմ ճշմարիտ է. զի գիտեմ ուստի եկի՝ եւ յո երթամ. բայց դուք ոչ գիտէք ուստի գամ՝ կամ յո երթամ։

Verse: 15   Link to gnt   Դուք ըստ մարմնոյ դատիք. ես ոչ դատիմ եւ ոչ զոք։

Verse: 16   Link to gnt   Թէպէտ եւ դատիմ եւս զոք՝ դատաստանն իմ ճշմարիտ է. զի չեմ միայն, այլ ես՝ եւ որ առաքեացն զիս հայր։

Verse: 17   Link to gnt   Եւ յօրէնսն իսկ ձեր գրեալ է, թէ երկուց մարդոց վկայութիւն ճշմարիտ է։

Verse: 18   Link to gnt   Ես եմ որ վկայեմ վասն իմ. եւ վկայէ վասն իմ որ առաքեացն զիս հայր։

Verse: 19   Link to gnt   Ասէին ցնա. ուր է հայր քո։ Պատասխանի ետ Յիսուս՝ եւ ասէ ցնա. ոչ զիս գիտէք՝ եւ ոչ զհայրն իմ. եթէ զիս գիտէիք՝ եւ զհայրն իմ թերեւս գիտէիք։

Verse: 20   Link to gnt   Զայս բանս խօսեցաւ Յիսուս ընդ նոսա ի տան գանձին, յորժամ ուսուցանէր ի տաճարի անդ. եւ ոչ ոք կալաւ զնա, զի չեւ եւս հասեալ էր ժամ նորա։

Passage: 5-5 
Verse: 21   Link to gnt   Ասէ դարձեալ ցնոսա Յիսուս. ես երթամ, եւ խնդրիցէք զիս. եւ ի մեղս ձեր մեռանիջիք. զի ուր եսն երթամ, դուք ոչ կարէք գալ։

Verse: 22   Link to gnt   Ասէին Հրէայքն. միթէ զիւրովին երթայցէ. զի ասէ՝ թէ ուր եսն երթամ դուք ոչ կարէք գալ։

Verse: 23   Link to gnt   Եւ ասէ ցնոսա. դուք ի ներքուստ աստի էք, եւ ես՝ ի վերուստ անտի եմ. դուք՝ յաշխարհէ աստի էք, ես չեմ յայսմ աշխարհէ։

Verse: 24   Link to gnt   Բայց ասացի ձեզ՝ թէ ի մեղս ձեր մեռանիցիք։ Զի թէ ոչ հաւատայցէք թէ ես եմ, մեռանիցիք ի մեղս ձեր։

Verse: 25   Link to gnt   Ասեն ցնա. դու ով ես։ ասէ ցնոսա Յիսուս. նախ՝ զի եւ խօսիմս իսկ ընդ ձեզ։

Verse: 26   Link to gnt   Բազում ինչ ունիմ վասն ձեր խօսել եւ դատել. այլ որ առաքեացն զիս՝ ճշմարիտ է։ Եւ ես զոր լուայն ի նմանէ՝ զայն խօսիմ յաշխարհի։

Verse: 27   Link to gnt   Եւ ոչ գիտացին՝ թէ զհօրէ ասէր ցնոսա։

Verse: 28   Link to gnt   Ասէ ցնոսա Յիսուս. յորժամ բարձրացուցանիցէք զորդի մարդոյ, յայնժամ գիտասջիք՝ թէ ես եմ. եւ յանձնէ իմմէ ինչ ոչ առնեմ, այլ որպէս ուսոյց զիս հայրն իմ, զայն խօսիմ։

Verse: 29   Link to gnt   Եւ որ առաքեացն զիս ընդ իս է. ոչ եթող զիս միայն, զի ես զհաճոյս նորա առնեմ հանապազ։

Verse: 30   Link to gnt   Իբրեւ զայս խօսեցաւ, բազումք հաւատացին ի նա։

Passage: 5-6 
Verse: 31   Link to gnt   Եւ ասէր Յիսուս առ Հրէայսն հաւատացեալս. եթէ դուք կացջիք ի բանի իմում, ճշմարիտ աշակերտք իմ էք.

Verse: 32   Link to gnt   Ծանիջիք զճշմարտութիւնն, եւ ճշմարտութիւնն ազատեսցէ զձեզ։

Verse: 33   Link to gnt   Պատասխանի ետուն նմա՝ եւ ասեն. զաւակ Աբրահամու եմք, եւ ոչ ումեք երբէք ծառայեցաք. զիարդ ասես եթէ ազատք լինիջիք։

Verse: 34   Link to gnt   Պատասխանի ետ նոցա Յիսուս ամէն ամէն ասեմ ձեզ. թէ ամենայն որ առնէ զմեղս՝ ծառայ է մեղաց։

Verse: 35   Link to gnt   Եւ ծառայն՝ ոչ յաւիտեան կայ ի տան, իսկ որդին ի յաւիտեան կայ։

Verse: 36   Link to gnt   Իսկ արդ՝ եթէ որդին զձեզ ազատեցուսցէ, ճշմարիտ ազատ լինիջիք։

Verse: 37   Link to gnt   Գիտեմ զի զաւակ Աբրահամու էք, այլ խնդրէք սպանանել զիս. զի բանին իմոյ չիք տեղի ի ձեզ։

Verse: 38   Link to gnt   Ես՝ զոր տեսի առ հօր իմում՝ խօսիմ. եւ դուք՝ զոր լուաք ի հօրէն ձերմէ՝ առնէք։

Verse: 39   Link to gnt   Պատասխանի ետուն նմա՝ եւ ասեն. Հայր մեր՝ Աբրահամ է։ Ասէ ցնոսա Յիսուս. եթէ որդիք Աբրահամու էիք՝ զգործսն Աբրահամու գործէիք։

Verse: 40   Link to gnt   Այլ այժմիկ խնդրէք սպանանել զիս. զայր մի որ ձեզ զճշմարտութիւնն խօսեցայ՝ զոր լուայ ի հօրէ իմմէ. զայդ՝ Աբրահամ ոչ արար.

Verse: 41   Link to gnt   Դուք առնէք զգործս հօրն ձերոյ։ Ասեն ցնա. մեք ի պոռնկութենէ չեմք ծնեալ. մի է հայր մեր, Աստուած։

Verse: 42   Link to gnt   Ասէ ցնոսա Յիսուս. եթէ Աստուած էր հայր ձեր, սիրէիք արդեւք զիս, զի ես յԱստուծոյ ելի՝ եւ եկի. եւ ոչ եթէ յանձնէ ինչ եկի, այլ նա առաքեաց զիս։

Verse: 43   Link to gnt   Ընդէր զխօսս իմ ոչ գիտէք դուք. Վասն զի ոչ կարէք լսել զբանն իմ։

Verse: 44   Link to gnt   Դուք՝ ի հօրէ ի սատանայէ էք, եւ զցանկութիւնս հօրն ձերոյ կամիք առնել. զի նա մարդասպան էր ի սկզբանէ, եւ ի ճշմարտութեան ոչ եկաց. զի ոչ գոյ ճշմարտութիւն ի նմա. յորժամ խօսիցի սուտ՝ յիւրոց անտի խօսի. զի սուտ է եւ հայր նորա։

Verse: 45   Link to gnt   Իսկ ես՝ զի զճշմարտութիւն խօսիմ, ոչ հաւատայք ինձ։

Verse: 46   Link to gnt   Ո ոք ի ձէնջ յանդիմանեսցէ զիս վասն մեղաց. եթէ զճշմարիտն ասեմ, ընդէր ոչ հաւատայք ինձ։

Verse: 47   Link to gnt   Որ էն յԱստուծոյ, բանս Աստուած լսէ. եւ դուք վասն այնորիկ ոչ լսէք, զի չէք յԱստուծոյ։

Verse: 48   Link to gnt   Պատասխանի ետուն Հրէայքն՝ եւ ասեն ցնա. ոչ բարւոք ասեմք մեք՝ եթէ Սամարացի ես դու, եւ դեւ՝ գոյ ի քեզ։

Verse: 49   Link to gnt   Պատասխանի ետ Յիսուս՝ եւ ասէ. յիս դեւ՝ ոչ գոյ. այլ պատուեմ զհայր իմ, եւ դուք անարգէք զիս։

Verse: 50   Link to gnt   Ես՝ ոչ խնդրեմ զփառս իմ. է որ խնդրէն՝ եւ դատի։

Verse: 51   Link to gnt   Ամէն ամէն ասեմ ձեզ, եթէ ոք զբանն իմ պահեսցէ, զմահ մի տեսցէ ի յաւիտեան։

Verse: 52   Link to gnt   Ասեն ցնա Հրեայքն. արդ՝ գիտացաք թէ՝ դեւ գոյ ի քեզ. Աբրահամ մեռաւ եւ մարգարէքն, եւ դու ասես՝ եթէ ոք զբանն իմ պահեսցէ, մի ճաշակեսցէ զմահ ի յաւիտեան։

Verse: 53   Link to gnt   Միթէ՝ դու մեծ ինչ ոք իցես քան զհայրն մեր Աբրահամ որ մեռաւ եւ մարգարէքն մեռան. արդ՝ դու զով առնես զքեզ։

Verse: 54   Link to gnt   Պատասխանի ետ Յիսուս. եթէ ես փառաւորեմ զանձն իմ, փառքն իմ ոչինչ են. է հայր որ փառաւորէ զիս, զորմէ դուքն ասէք՝ թէ Աստուած մեր է.

Verse: 55   Link to gnt   Եւ ոչ ճանաչէք զնա։ Բայց ես գիտեմ զնա։ Եւ թէ ասեմ, թէ ոչ գիտեմ զնա, ձեզ նման սուտ լինիմ. այլ գիտեմ զնա, եւ զբան նորա պահեմ։

Verse: 56   Link to gnt   Աբրահամ հայր ձեր ցանկացաւ տեսանել զօր իմ, ետես՝ եւ ուրախ եղեւ։

Verse: 57   Link to gnt   Ասեն ցնա Հրեայքն. յիսուն ամ չեւ եւս է քո, եւ զԱբրահամ տեսեր։

Verse: 58   Link to gnt   Ասէ ցնոսա Յիսուս. ամէն ամէն ասեմ ձեզ. յառաջ քան զլինելն Աբրահամու եմ ես։

Verse: 59   Link to gnt   Վէմս առին Հրէայքն, զի արկցեն ի վերայ նորա. եւ Յիսուս խոյս ետ՝ եւ ել գնաց ի տաճարէ անտի։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.