TITUS
Armenian NT (Zohrab Bible)
Part No. 66
Previous part

Chapter: 22  
(Ի՜Բ)


Section: 76 
Verse: 1   Link to gnt   Մերձեցաւ տօն բաղարջակերացն՝ որ կոչէր Պասքա։

Verse: 2   Link to gnt   Եւ խնդրէին քահանայապետքն եւ դպիրք՝ թէ որպէս սպանանիցեն զնա. բայց երկնչէին ի ժողովրդենէ անտի։

Verse: 3   Link to gnt   Ապա եմուտ սատանայ ի Յուդա ի կոչեցեալն Իսկարիովտացի, որ էր ի թուոյ երկոտասանիցն։

Verse: 4   Link to gnt   Չոգաւ եդ բանս ընդ քահանայապետսն՝ եւ ընդ դպիրս, եւ ընդ իշխանս ժողովրդեանն, զի մատնեսցէ զնա նոցա։

Verse: 5   Link to gnt   Եւ խնդացին, եւ խոստացան տալ նմա արծաթ.

Verse: 6   Link to gnt   Եւ յանձն առ՝ եւ խնդրէր պարապ մատնել զնա նոցա՝ մեկուսի յամբոխէն։

Verse: 7   Link to gnt   Եկն օր բաղարջակերացն, յորում օրէն էր զենուլ զՊասեքն։

Verse: 8   Link to gnt   Եւ առաքեաց զՊետրոս, եւ զՅովհաննէս եւ ասէ. երթայք պատրաստեցէք մեզ զՊասեքն զի կերիցուք։

Verse: 9   Link to gnt   Եւ նոքա ասեն. ուր կամիս զի պատրաստեսցուք։

Verse: 10   Link to gnt   Եւ ասէ ցնոսա. ահա՝ իբրեւ մտանիցէք ի քաղաքն, պատահեսցէ ձեզ այր մի բարձեալ սափոր ջրոյ. երթիջիք զհետ նորա ի տունն յոր մտանիցէ.

Verse: 11   Link to gnt   Եւ ասասջիք ցտանուտէր տանն. վարդապետ ասէ քեզ. ուր են վանքն իմ, յորում զՊասեքն ուտիցեմ աշակերտօքս հանդերձ։

Verse: 12   Link to gnt   Եւ նա ցուցցէ ձեզ վերնատուն մի մեծ զարդարեալ, եւ անդ պատրաստեսջիք։

Verse: 13   Link to gnt   Եւ գնացեալ գտին որպէս եւ ասացն նոցա եւ պատրաստեցին զՊասեքն։

Verse: 14   Link to gnt   Եե իբրեւ ժամ եղեւ բազմեցաւ, եւ երկոտասան առաքեալքն ընդ նմա։

Verse: 15   Link to gnt   Եւ ասէ ցնոսա. Ցանկալով ցանկացայ զայս Պասեք ուտել ընդ ձեզ՝ մինչչեւ չարչարեալ իցեմ։

Verse: 16   Link to gnt   Բայց ասեմ ձեզ, թէ ոչ եւս կերայց ի սմանէ, մինչեւ լցցի յարքայութեան Աստուծոյ։

Verse: 17   Link to gnt   Եւ ընկալեալ բաժակ՝ գոհացաւ եւ ասէ. առէք զայդ՝ եւ բաժանեցէք ի ձեզ։

Verse: 18   Link to gnt   Ասեմ ձեզ, թէ յայսմ հետէ՝ ոչ արբից ի բերոյ որթոյ, մինչեւ եկեսցէ արքայութիւն Աստուծոյ։

Verse: 19   Link to gnt   Եւ առեալ հաց, գոհացաւ, եբեկ եւ ետ նոցա՝ եւ ասէ. այս է մարմին իմ, որ վասն բազմաց տուեալ. զայս արասջիք առ իմոյ յիշատակի։

Verse: 20   Link to gnt   Նոյնպէս եւ զբաժակն յետ ընթրեացն առ՝ եւ ասէ. այս բաժակ է նոր ուխտ՝ իմով արեամբ վասն ձեր հեղելոյ։

Verse: 21   Link to gnt   Բայց աւասիկ՝ ձեռն մատնչի իմոյ ընդ իս ի սեղանս։

Verse: 22   Link to gnt   Եւ որդի մարդոյ ըստ սահմանելոյն երթայ, բայց՝ վայ մարդոյն այնմիկ յոյր ձեռն մատնիցի։

Verse: 23   Link to gnt   Եւ նոքա սկսան խնդրել ընդ միմեանս, թէ ով է ի նոցանէ՝ որ զայն գործելոց իցէ։

Section: 77 
Verse: 24   Link to gnt   Եղեւ՝ եւ հակառակութիւն ի մէջ նոցա, թէ ով ի նոցանէ համարիցի մեծ։

Verse: 25   Link to gnt   Եւ նա՝ ասէ ցնոսա. թագաւորք ազգաց տիրեն նոցա, եւ որ իշխենն նոցա՝ բարերարք կոչին.

Verse: 26   Link to gnt   Այլ դուք՝ ոչ այնպէս. այլ որ մեծն է ի ձեզ՝ եղիցի իբրեւ զկրտսերն, եւ առաջնորդն իբրեւ զսպասաւորն։

Verse: 27   Link to gnt   Ով է մեծ, բազմեալն՝ եթէ սպասաւորն. ոչ ապաքէն՝ բազմեալն. բայց ես եմ ի միջի ձերում իբրեւ սպասաւոր։

Verse: 28   Link to gnt   Եւ դուք էք՝ որ ցանգ կայիք ընդ իս ի փորձութիւնս իմ.

Verse: 29   Link to gnt   Եւ ես ուխտեմ ձեզ՝ որպէս եւ հայր իմ ուխտեաց ինձ զարքայութիւն.

Verse: 30   Link to gnt   Զի ուտիցէք եւ ըմպիցէք ի սեղան իմ յարքայութեանն իմում. եւ նստիցիք յերկոտասան աթոռ՝ դատել զերկոտասան ազգ իսրայէլի։

Section: 78 
Verse: 31   Link to gnt   Եւ ասէ Տէր. Սիմովն Սիմովն. ահա՝ սատանայ խնդրեաց զքեզ խարբալել իբրեւ զցորեան.

Verse: 32   Link to gnt   Այլ ես աղաչեցի վասն քո՝ զի մի պակասեսցեն հաւատք քո։ Եւ դու երբեմն դարձցիս՝ եւ հաստատեսցես զեղբարս քո։

Verse: 33   Link to gnt   Եւ նա՝ ասէ ցնա. Տէր՝ ընդ քեզ պատրաստ եմ եւ ի բանտ եւ ի մահ երթալ։

Verse: 34   Link to gnt   Եւ նա՝ ասէ ցնա. ասեմ քեզ Պետրէ՝ չիցէ այսօր հաւու խօսեալ, մինչեւ երիցս ուրասցիս զիս չգիտել։

Verse: 35   Link to gnt   Եւ ասէ ցնոսա. յորժամ առաքեցի զձեզ առանց քսակի եւ մախաղի եւ կօշկաց, միթէ՝ կարօտացայք իմիք։

Verse: 36   Link to gnt   Եւ նոքա ասեն. եւ ոչ իմիք։ Ապա՝ ասէ. այլ այժմ որ ունի քսակ՝ բարձցէ, նոյնպէս եւ մախաղ. եւ որ ոչն ունիցի, վաճառեսցէ զձորձս իւր՝ եւ գնեսցէ իւր սուսեր։

Verse: 37   Link to gnt   Բայց ասեմ ձեզ. զի այս եւս որ գրեալ է՝ պարտ է՝ զի կատարեսցի յիս, թէ ընդ անօրէնս համարեցաւ. զի որ վասն իմ ինչ է՝ վճարեալ է։

Verse: 38   Link to gnt   Եւ նոքա ասեն. տէր՝ ահաւասիկ են աստ երկու սուրք։ եւ նա ասէ ցնոսա. բաւական են։

Verse: 39   Link to gnt   Եւ ելեալ գնաց ըստ սովորութեանն ի լեառն Ձիթենեաց. գնացին զհետ նորա եւ աշակերտքն։

Verse: 40   Link to gnt   Իբրեւ եհաս ի տեղին՝ ասէ ցնոսա. յաղօթս կացէք չմտանել ի փորձութիւն։

Verse: 41   Link to gnt   Եւ ինքն մեկնեցաւ ի նոցանէ իբրեւ քարընկէց մի, եդ ծունր՝ կայր յաղօթս,

Verse: 42   Link to gnt   Եւ ասէր, Հայր Եթէ կամիս՝ անցո զբաժակս զայս յինէն. բայց ոչ իմ կամք՝ այլ քոյդ լիցին։

Verse: 43   Link to gnt   Եւ երեւեցաւ նմա հրեշտակ յերկնից՝ եւ զօրացուցանէր զնա. եւ էր ի տագնապի, եւ մտադիւրութեամբ եւս կայր յաղօթս։

Verse: 44   Link to gnt   Եւ հոսէին ի նմանէ քրտունք իբրեւ զկայլակս արեան՝ ոլոռն ոլոռն հեղեալ ի յերկիր։

Verse: 45   Link to gnt   Եւ յարուցեալ յաղօթիցն, եկն առ աշակերտսն՝ եգիտ զնոսա ի քուն ի տրտմութենէն։

Verse: 46   Link to gnt   Եւ ասէ ցնոսա. զի ննջէք, արիք կացէք յաղօթս՝ զի մի մտանիցէք ի փորձութիւն։

Verse: 47   Link to gnt   Եւ մինչ դեռ խօսէր, ահաւասիկ ամբոխ. եւ որ կոչէրն Յուդա՝ մի յերկոտասանիցն առաջնորդէր նոցա։ Իբրեւ մերձեցաւ առ Յիսուս՝ համբուրեաց զնա. քանզի զայն նշան տուեալ էր նոցա. թէ ընդ որում ես համբուրեցից՝ նա է. զնա ունիցիք։

Verse: 48   Link to gnt   Ասէ ցնա Յիսուս. Յուդա՝ համբուրելով մատնես զորդի Աստուծոյ։

Verse: 49   Link to gnt   Իբրեւ տեսին որ զնովաւն էին՝ որ ինչ եղեւն ասեն ցնա. Տէր հարցուք զնոսա սրով։

Verse: 50   Link to gnt   Եւ եհար մի ոմն ի նոցանէ զքահանայապետին ծառայ, եւ ի բաց եհան զաջոյ ունկն նորա։

Verse: 51   Link to gnt   Պատասխանի եւ Յիսուս՝ եւ ասէ. թոյլ տուր մինչեւ ցայդ վայր. եւ մատուցեալ յունկն բժշկեաց զնա։

Verse: 52   Link to gnt   Եւ ասէ ցեկեալսն ի վերայ նորա ցքահանայապետսն, եւ ցիշխանս տաճարին եւ ցծերսն. Իբրեւ ի վերայ աւազակի ելէք սուսերօք եւ բրօք։

Verse: 53   Link to gnt   Հանապազ ընդ ձեզ էի ի տաճարին, եւ ոչ ձգեցէք ձեռս յիս. այլ այս է ձեր ժամ, եւ իշխանութիւն խաւարի։

Verse: 54   Link to gnt   Եւ կալեալ զնա՝ ածին եւ մուծին ի տուն քահանայապետին։ Եւ Պետրոս երթայր զկնի նորա հեռագոյն։

Verse: 55   Link to gnt   Իբրեւ լուցին կրակ ի մէջ գաւթին՝ եւ նստան շուրջ, նստաւ եւ Պետրոս ի մէջ նոցա։

Verse: 56   Link to gnt   Ետես զնա աղախին ոմն՝ զի նստէր առ լոյսն. հայեցաւ ընդ նա՝ եւ ասէ. եւ սա ընդ նոսա էր որ ընդ նմայն էին։

Verse: 57   Link to gnt   Իսկ Պետրոս ուրացաւ եւ ասէ. ոչ գիտեմ զնա կին դու։

Verse: 58   Link to gnt   Եւ յետ սակաւ միոյ՝ այլ ոմն ետես զնա՝ եւ ասէ. եւ դու ի նոցանէ ես։ եւ Պետրոս ասէ. այր դու՝ չեմ ի նոցանէ։

Verse: 59   Link to gnt   Եւ Իբրեւ ժամ մի անց ի վերայ, այլ ոմն վիճէր եւ ասէր. ստոյգ եւ սա ընդ նմա էր, քանզի Գալիլեացի է։

Verse: 60   Link to gnt   Ասէ Պետրոս. այր դու՝ չգիտեմ զինչ խօսիսդ, եւ առժամայն մինչդեռ նա զայն ասէր, խօսեցաւ հաւ։

Verse: 61   Link to gnt   Դարձաւ տէր եւ հայեցաւ ի Պետրոս, եւ յիշեաց Պետրոս զբանն տեառն՝ զոր ասաց ցնա. Մինչչեւ հաւու խօսեալ իցէ, երիցս ուրասցիս՝ չգիտել զիս։

Verse: 62   Link to gnt   Եւ ելեալ արտաքս՝ ելաց դառնապէս։

Verse: 63   Link to gnt   Եւ արքն, որ պահէին զնա. այպն առնէին զնովաւ, եւ հարկանէին։

Verse: 64   Link to gnt   Ծածկէին զերեսս Նորա՝ եւ տանջէին. եւ հարցանէին ցնա՝ եւ ասէին. մարգարեաց՝ ով է որ եհարն զքեզ։

Verse: 65   Link to gnt   Եւ այլ բազում ինչ հայհոյութեամբ խօսէին ի նա։

Verse: 66   Link to gnt   Եւ իբրեւ այդ եղեւ, ժողովեցաւ ծերակոյտ ժողովրդեանն՝ քահանայապետքն եւ դպիրք, եւ հանին ածին զնա յատեանն իւրեանց՝ եւ ասեն, եթէ դու ես Քրիստոսն, ասա մեզ։

Verse: 67   Link to gnt   Ասէ ցնոսա. թէ ասացից ձեզ, սակայն ոչ հաւատայք.

Verse: 68   Link to gnt   Եւ Եթէ հարցից ինչ զձեզ՝ չտայք ինձ պատասխանի՝ կամ արձակիցէք։

Verse: 69   Link to gnt   Բայց յայսմ հետէ նստցի որդի մարդոյ ընդ աջմէ զօրութեանն Աստուծոյ։

Verse: 70   Link to gnt   Եւ ասեն ամենեքեան. ուրեմն դու ես որդին Աստուծոյ։ Եւ նա՝ ասէ ցնոսա. դուք ասէք թէ ես եմ։

Verse: 71   Link to gnt   Եւ նոքա ասեն. զինչ եւս պիտոյ է մեզ վկայութիւն, զի մեզէն իսկ լուաք ի բերանոյ դորա։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.