TITUS
Armenian NT (Zohrab Bible)
Part No. 47
Previous part

Chapter: 3  
(Գ՜)


Section: 5 
Verse: 1   Link to gnt   Ի հինգետասաներորդի ամի տէրութեանն Տիբերեայ կայսեր, ի դատաւորութեան Հրեաստանի Պիղատոսի Պոնտացւոյ, եւ ի չորրորդպետութեան Գալիլեացւոց Հերովդի, եւ ի Փիլիպոսի եղբօր նորա չորրորդպետութեան ի Տուրացւոց եւ ի Տրաքոնացւոց աշխարհին, եւ ի չորրորդպետութեան Լիսանեայ Աբիլենացւոյ.

Verse: 2   Link to gnt   ի քահանայապետութեան Անայի եւ Կայիափայ. եղեւ բան Աստուծոյ ի վերայ Յովհաննու որդւոյ Զաքարիայ՝ յանապատի անդ։

Verse: 3   Link to gnt   Եւ եկն յամենայն կողմն Յորդանանու, քարոզել մկրտութիւն ապաշխարութեան ի թողութիւն մեղաց։

Verse: 4   Link to gnt   Որպէս եւ գրեալ է ի գիրս պատգամաց Եսայայ մարգարէի. ձայն բարբառոյ յանապատի. պատրաստ արարէք զճանապարհ տեառն, եւ ուղիղ արարէք զշաւիղս նորա։

Verse: 5   Link to gnt   Ամենայն ձորք լցցին, եւ ամենայն լերինք եւ բլուրք՝ խոնարհեսցին. եւ եղիցին դժուարինքն ի դիւրինս, եւ առապարքն՝ ի հարթ ճանապարհս.

Verse: 6   Link to gnt   Եւ տեսցէ ամենայն մարմին զփրկութիւն Աստուծոյ։

Verse: 7   Link to gnt   Եւ ասէր ցժողովուրդսն ելեալս մկրտել ի նմանէ. ծնունդք իժից ո ցոյց ձեզ փախչել ի բարկութենէն որ գալոց է։

Verse: 8   Link to gnt   Արարէք այսուհետեւ պտուղս արժանիս ապաշխարհութեան։ Եւ մի սկսանիցէք ասել՝ եթէ ունիմք հայր զԱբրահամ. զայս ասեմ ձեզ, եթէ կարօղ է Աստուած ի քարանցս յայսցանէ յարուցանել որդիս Աբրահամու։

Verse: 9   Link to gnt   Բայց ահաւասիկ տապար առ արմին ծառոց կայ։ ամենայն ծառ որ ոչ առնէ զպտուղ բարւոք, հատանի եւ ի հուր արկանի։

Section: 6 
Verse: 10   Link to gnt   Հարցանէին զնա ժողովուրդքն եւ ասէին. իսկ արդ զինչ գործեսցուք։

Verse: 11   Link to gnt   Պատասխանի ետ՝ եւ ասէ ցնոսա. ոյր իցեն՝ երկու հանդերձք՝ տացէ զմին այնմ ոյր ոչ գուցէ. եւ ոյր կայցէ կերակուր՝ նոյնպէս արասցէ։

Verse: 12   Link to gnt   Եկին եւ մաքսաւորք մկրտել, եւ ասեն ցնա. վարդապետ՝ զինչ գործեսցուք։

Verse: 13   Link to gnt   Եւ նա՝ ասէ ցնոսա. մի ինչ աւելի քան զհրամայեալսն ձեզ առնիցէք։

Verse: 14   Link to gnt   Հարցանէին զնա եւ զինուորքն՝ եւ ասէին. եւ մեք զինչ գործեսցուք։ ասէ ցնոսա. մի զոք խուիցէք՝ եւ մի զոք զրպարտիցէք. շատ լիցին ձեզ թոշակքն ձեր։

Verse: 15   Link to gnt   Մինչ ակն ունէր ժողովուրդն, եւ խորհէին ամենեքեան ի սիրտս իւրեանց վասն Յովհաննու՝ միթէ՝ սա իցէ Քրիստոսն։

Verse: 16   Link to gnt   Պատասխանի ետ ամենեցուն՝ եւ ասէ. ես մկրտեմ զձեզ ջրով. բայց գայ զօրագոյն քան զիս, զորոյ չեմ բաւական բառնալ զկօշիկս. նա մկրտեսցէ զձեզ հոգւով սրբով եւ հրով։

Verse: 17   Link to gnt   Որոյ հեծանոցն ի ձեռին իւրում սրբել զկալ իւր, եւ ժողովել զցորեանն ի շտեմարանս իւր, եւ զյարդն՝ այրեսցէ անշէջ հրով։

Verse: 18   Link to gnt   Բազում եւ այլ ինչ մխիթարութեամբ աւետարանէր ժողովրդեանն։

Verse: 19   Link to gnt   Բայց Հերովդէս չորրորդապետ յանդիմանեալ ի նմանէ վասն Հերովդիայ կնոջ եղբօր իւրոյ, եւ վասն ամենայն չարեացն զոր գործեաց Հերովդէս։

Verse: 20   Link to gnt   Յաւել եւ զայն եւս ի վերայ ամենայնի եւ եդ ի բանտի զՅովհաննէս։

Verse: 21   Link to gnt   Եւ եղեւ ի մկրտել ամենայն ժողովրդեանն, եւ ընդ Յիսուսի մկրտելն՝ եւ կալ յաղօթս, բանալ երկնից,

Verse: 22   Link to gnt   եւ իջանել հոգւոյն սրբոյ մարմնաւոր տեսլեամբ իբրեւ զաղաւնի ի վերայ նորա։ եւ գալ ձայն յերկնից՝ որ ասէր. դու ես որդի իմ սիրելի, ընդ քեզ հաճեցայ։

Verse: 23   Link to gnt   Եւ ինքն Յիսուս՝ էր ամաց իբրեւ երեսնից սկսեալ որոց որպէս կարծէր որդի Յովսեփայ։ Որ Յակովբայն. որ Հեղեայն. որ Մատաթեայն։

Verse: 24   Link to gnt   Որ Ղեւեայն. որ Մեղքեայն. որ Յաննեայն. որ Յովսեփեայ։

Verse: 25   Link to gnt   Որ Մատթեայն. որ Ամովսեայն. որ Նաւումայն. որ Էսղեայն. որ Նանդեայն.

Verse: 26   Link to gnt   Որ Մատթեայն. որ Մատաթեայն. որ Սեմեայն, որ Յովսեքեան. որ Յովդայն.

Verse: 27   Link to gnt   Որ Յովնանայն. որ Րեսայն. որ Զորաբաբելին. որ Սաղաթելին. որ Ներայն։

Verse: 28   Link to gnt   Որ Մեղքեայն. որ Ադդեայն. որ Կովսամայն. որ Ելմովդադայն, որ Երայն։

Verse: 29   Link to gnt   Որ Յեսուայն.որ Եղիազարայն. որ Յովրամայն որ Մատթայն. որ Զեւեայն։

Verse: 30   Link to gnt   Որ Սիմէովնին. որ Յուդային. որ Յովսեփայն. որ Յովնամայն. որ Էղէկիմայն։

Verse: 31   Link to gnt   Որ Մեզթեայն. որ Մէննայն. որ Մատաթայն որ Նաթանայն.որ Դաւթին.

Verse: 32   Link to gnt   Որ Յեսսեայն. որ Ովբեդայն. որ Բոոսայն. որ Սաղմանայն. որ Նատսովնին։

Verse: 33   Link to gnt   Որ Ամինագարայն. որ Տրամայն. որ Ադմեայն. որ Առնեայն. որ Էսրովմայն. որ Փարէսին. որ Յուդային։

Verse: 34   Link to gnt   Որ Յակոբայն. որ Իսահակայն. որ Աբրահամուն. որ Թառային. որ Նաքովրայն։

Verse: 35   Link to gnt   Որ Սերուքայն. որ Ռագաւայն. որ Փաղեկայն. որ Եբերայն. որ Սաղային։

Verse: 36   Link to gnt   Որ Կայնանայն. որ Արփաքսադայն. որ Սէմայն. որ Նոյին. որ Ղամէքայն։

Verse: 37   Link to gnt   Որ Մաթուսաղային. որ Ենոքայն. որ Յարդին. որ Մաղաղայելին. որ Կայնանայն։

Verse: 38   Link to gnt   Որ Էնովսայն. որ Սէթայն. որ Ադամայն. որ Աստուծոյն։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.