TITUS
Armenian NT (Zohrab Bible)
Part No. 40
Previous part

Chapter: 12  
(Ժ՜Բ)


Section: 36  
Verse: 1   Link to gnt   Եւ սկսաւ խօսել ընդ նոսա առակօք՝ եւ ասել։ Այր մի՝ տնկեաց այգի, եւ ած շուրջ զնովաւ ցանգ, եւ գուբ հնծան փորեաց եւ շինեաց աշտարակ, եւ ետ զնա մշակս՝ եւ գնաց ի տար աշխարհ։

Verse: 2   Link to gnt   Եւ առաքեաց առ մշակսն ի ժամանակի ծառայ մի, զի ի մշակաց անտի առցէ ի պտղոյ այգւոյն։

Verse: 3   Link to gnt   Եւ նոցա կալեալ՝ գահ հարին զնա, եւ արձակեցին ունայն,

Verse: 4   Link to gnt   Դարձեալ առաքեաց այլ ծառայս, եւ զնա կառափնատեցին՝ եւ արձակեցին անարգեալ։

Verse: 5   Link to gnt   Եւ դարձեալ՝ այլ առաքեաց, եւ զնա սպանին։ եւ զբազումս այլս, զոմանս՝ հարկանէին, եւ զոմանս՝ սպանանէին։

Verse: 6   Link to gnt   Ապա՝ որդի մի էր իւր սիրելի. զնա առաքեաց առ նոսա յետոյ, եւ ասէ. թերեւս ամաչեսցեն յորդւոյ աստի իմմէ։

Verse: 7   Link to gnt   Իսկ մշակքն իբրեւ տեսին զնա զի գայր, ասեն ցմիմեանս. սա է ժառանգն. եկայք սպանցուք զսա, եւ մեր լիցի ժառանգութիւնն։

Verse: 8   Link to gnt   Եւ կալեալ զնա՝ սպանին, եւ հանին արտաքոյ այգւոյն։

Verse: 9   Link to gnt   Արդ՝ զինչ արասցէ տէր այգւոյն։ եկեսցէ եւ կորուսցէ զմշակսն, եւ տացէ զայգին ի ձեռսն այլոց։

Verse: 10   Link to gnt   Եւ ոչ զգիրն զայն՝ իցէ ընթերցեալ ձեր, թէ զվէմն զոր անարգեցին շինօղքն, նա եղեւ գլուխ անկեան։

Verse: 11   Link to gnt   Ի տեառնէ եղեւ այս. եւ է՝ սքանչելի յաչս մեր։

Verse: 12   Link to gnt   Եւ խնդրէին զնա ունել. եւ երկեան ի ժողովրդենէ անտի, զի գիտացին՝ թէ առ նոսա ասաց զառակն. եւ թողին զնա եւ գնացին։

Section: 37  
Verse: 13   Link to gnt   Եւ առաքեն առ նա զոմանս ի փարիսեցւոց անտի՝ եւ ի հերովդիանոսաց, զի զնա որսասցեն բանիւ։

Verse: 14   Link to gnt   Եւ նոքա եկեալ՝ հարցանէին զնա նենգութեամբ՝ եւ ասէին. վարդապետ՝ գիտեմք զի ճշմարիտ ես, եւ ոչ ինչ փոյթ է քեզ զումեքէ. զի ոչ հայիս յերեսս մարդկան, այլ ճշմարտութեամբ զճանապարհն Աստուծոյ ուսուցանես. արդ՝ ասա մեզ, արժան է հարկ տալ կայսեր՝ եթէ ոչ. տացո՞ւք՝ թէ ո́չ տացուք։

Verse: 15   Link to gnt   Եւ Յիսուս գիտաց զկեղծաւորութիւն նոցա. ասէ ցնոսա. զի փորձէք զիս կեղծաւորք. բերէք ինձ դահեկան մի զի տեսից։

Verse: 16   Link to gnt   Եւ նոքա բերին։ եւ ասէ ցնոսա ոյր տՋԶ̣ պատկերս այս՝ կամ գիր։ եւ նոքա ասեն ցնա. կայսեր։

Verse: 17   Link to gnt   Պատասխանի ետ Յիսուս՝ եւ ասէ ցնոսա. երթայք տուք՝ զկայսեր, կայսեր, եւ զԱստուծոյ՝ Աստուծոյ։ եւ զարմացան ընդ նա։

Verse: 18   Link to gnt   Գան առ նա սադուկեցիքն որ ասեն՝ թէ չիք յարութիւն. հարցանէին ցնա՝ եւ ասէին։

Section: 38  
Passage: 7-4 
Verse: 19   Link to gnt   Վարդապետ՝ մովսէս գրեաց մեզ. եթէ ուրուք եղբայր մեռանիցի եւ թողուցու կին, եւ որդի ոչ թողուցու. զի առցէ եղբայր նորա զկինն նորա, եւ յարուսցէ զաւակ եղբօր իւրում։

Verse: 20   Link to gnt   Արդ՝ եղբայրք եւթն էին առ մեզ. առաջինն առ կին՝ եւ մեռաւ, եւ ոչ եթող զաւակ։

Verse: 21   Link to gnt   Եւ երկրորդն առ զնոյն եւ մեռաւ, եւ ոչ նա եթող զաւակ, նոյնպէս եւ երրորդն առ զնոյն.

Verse: 22   Link to gnt   Եւ եւթնեքեան իսկ։ եւ ոչ թողին զաւակ. յետ ամենեցուն՝ մեռաւ եւ կինն։

Verse: 23   Link to gnt   Արդ ի յարութեանն յորժամ յառնիցեն. ոյր ի նոցանէ լինիցի կինն, զի եւթնեքեան կալան զնա կին։

Verse: 24   Link to gnt   Պատասխանի ետ Յիսուս՝ եւ ասէ ցնոսա. ոչ վասն այդորիկ իսկ մոլորեալ էք. զի ոչդ գիտէք զգիրս՝ եւ ոչ զզօրութիւն Աստուծոյ։

Verse: 25   Link to gnt   Զի յորժամ ի մեռելոց յարիցեն. ոչ արք՝ կանայս առնեն, եւ ոչ կանայք՝ արանց լինին։ այլ իբրեւ զհրեշտակս իցեն՝ որ յերկինսն են։

Verse: 26   Link to gnt   Այլ վասն յարութեան մեռելոց զի յառնեն. ոչ իցէ ընթերցեալ ձեր ի գիրսն մովսիսի, ի մորենւոջն որպէս ասաց ցնա Աստուած. ես եմ ասէ՝ Աստուած աբրահամու, եւ Աստուած իսահակայ, եւ Աստուած Յակովբայ։

Verse: 27   Link to gnt   Եւ ոչ է Աստուած մեռելոց՝ այլ կենդանեաց։ եւ արդ դուք՝ յոյժ մոլորեալք էք։

Section: 39  
Verse: 28   Link to gnt   Եւ մատուցեալ մի ոմն ի դպրացն լսէր նոցա մինչ վիճէինն. իբրեւ ետես թէ բարւոք ետ նոցա զպատասխանին, եհարց ցնա՝ եւ ասէ. որ պատուիրան է առաջին։

Verse: 29   Link to gnt   Եւ Յիսուս՝ ասէ ցնա. առաջին քան՝ զամենայն՝ լուր իսրայէլ՝ տէր Աստուած մեր՝ տէր մի է։

Verse: 30   Link to gnt   Եւ սիրեսցես զտէր Աստուած քո յամենայն սրտէ քումմէ, եւ յամենայն անձնէ քումմէ, եւ յամենայն մտաց քոց, եւ յամենայն զօրութենէ քումմէ։ այս է առաջին պատուիրան։

Verse: 31   Link to gnt   Եւ երկրորդն՝ նման սմին. սիրեսցես զընկեր քո՝ իբրեւ զանձն քո։ մեծ քան զսոսա այլ՝ պատուիրան ոչ գոյ։

Verse: 32   Link to gnt   Եւ ասէ ցնա դպիրն. բարւոք է վարդապետ. ճշմարտութեամբ ասացեր՝ թէ մի է Աստուած, եւ ոչ գոյ այլ՝ բաց ի նմանէ։

Verse: 33   Link to gnt   Եւ սիրելն զնա՝ զամենայն սրտէ, եւ զամենայն զօրութենէ, եւ յամենայն մտաց. եւ սիրելն զընկերն իբրեւ զանձն, առաւել է քան զողջակէզս եւ զզոհս։

Verse: 34   Link to gnt   Եւ տեսեալ Յիսուսի թէ իմաստութեամբ ետ զպատասխանին՝ ասէ ցնա. չես հեռի յարքայութենէ Աստուծոյ։ եւ ոչ եւս ոք իշխէր ինչ հարցանել զնա։

Section: 40  
Passage: 7-5 
Verse: 35   Link to gnt   Պատասխանի ետ Յիսուս եւ ասէ, մինչ ուսուցանէր ի տաճարին. զիարդ ասեն դպիրքն, թէ Քրիստոսն որդի դաւթի է։

Verse: 36   Link to gnt   Եւ ինքն դաւիթ հոգւովն սրբով ասէ. ասաց տէր ցտէր իմ, նիստ ընդ աջմէ իմմէ՝ մինչեւ եդից զթշնամիս քո պատուանդան որից քոց։

Verse: 37   Link to gnt   արդ՝ եթէ ինքն իսկ դաւիթ զնա տէր կոչէ՝ զիարդ իցէ որդի նորա։ Եւ բազում ժողովուրդ լսէր նմա քաղցրութեամբ։

Verse: 38   Link to gnt   Եւ ասէր ուսուցանելով ի վարդապետութեան իւրում։ զգոյշ լերուք ի դպրաց անտի՝ որ կամին ի հանդերձս երեւելիս շրջել. զնախողջոյնս խնդրել ի հրապարակս.

Verse: 39   Link to gnt   Եւ զնախաթոռս ի ժողովուրդս, եւ զգահագլուխս յընթրիս։

Verse: 40   Link to gnt   Որ ուտեն զտունս այրեաց, պատճառանօք յերկարեալ զաղօթս, զի աւելի եւս դատաստանս ընկալցին։

Section: 41  
Verse: 41   Link to gnt   Կայր Յիսուս ընդդէմ գանձանակին, տեսանէր զիարդ ժողովուրդն արկանէր պղինձ ի գանձանակն. եւ բազում մեծատունք՝ արկին բազում ինչ։

Verse: 42   Link to gnt   Եկն այրի մի՝ եւ արկ երկուս լումայս, որ է նաքարակիտ մի։

Verse: 43   Link to gnt   Եւ կոչեցեալ առ ինքն զաշակերսն իւր՝ ասէ ցնոսա. ամէն ասեմ ձեզ, զի այրին այն տառապեալ՝ շատ արկ քան զամենեսեան որ արկին ի գանձանակն։

Verse: 44   Link to gnt   Քանզի ամենեքին՝ յաւելորդաց իւրեանց արկին. այլ նա՝ ի չքաւորութենէ իւրմէ զամենայն ինչ զոր ունէր՝ արկ գոյիւ չափ զկեանս իւր։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.