TITUS
Armenian NT (Zohrab Bible)
Part No. 43
Previous part

Chapter: 15  
(Ժ՜Ե)


Verse: 1   Link to gnt   Եւ վաղվաղակի ընդ առաւօտն խորհուրդ արարեալ քահանայապետիցն՝ հանդերձ ծերովքն եւ դպրօք՝ եւ ամենայն ատեանն կապեցին զՅիսուս եւ տարան մատնեցին պիղատոսի։

Verse: 2   Link to gnt   Եւ հարց զնա պեղատիս՝ եւ ասէ. դու ես թագաւորն հրէից։ նա՝ պատասխանի ետ նմա եւ ասէ՝ դու ասես։

Verse: 3   Link to gnt   Եւ չարախօսէին զնմանէ յոյժ քահանայապետքն. եւ նա՝ ոչինչ տայր պատասխանի։

Verse: 4   Link to gnt   Իսկ պեղատոս դարձեալ հարցանէր զնա. ոչինչ տաս պատասխանի, տես քանի ամբաստանեն զքէն։

Verse: 5   Link to gnt   Եւ Յիսուս այնուհետեւ՝ ոչինչ ետ պատասխանի, մինչեւ զարմանալ յոյժ պիղատոսի։

Verse: 6   Link to gnt   Բայց ըստ տօնի՝ արձակէր նոցա զմի ոք զկապեալ, զոր ինքեանք խնդրէին։

Verse: 7   Link to gnt   Եւ էր որում անուն էր բարաբբա՝ կապեալ ընդ խռովիչսն, որոց ի խռովելն՝ այր մի սպանեալ էր։

Verse: 8   Link to gnt   Ի ձայն բարձր սկսաւ աղաղակել ամբոխն՝ եւ խնդրել որպէս սովոր էր, զի արձակեսցէ նոցա զբարաբբայն։

Verse: 9   Link to gnt   Պատասխանի ետ պեղատոսն եւ ասէ ցնոսա։ կամիք զի արձակեցից ձեզ զարքայն հրէից։

Verse: 10   Link to gnt   Քանզի գիտէր՝ թէ առ նախանձու մատնեցին զնա քահանայապետքն։

Verse: 11   Link to gnt   Որք եւ զամբոխն հաւանեցուցին՝ զի արձակեսցէ նոցա զբարաբբայն։

Verse: 12   Link to gnt   Դարձեալ պատասխանի ետ պեղատոս՝ եւ ասէ ցնոսա. իսկ զինչ կամիք թէ արարից զարքայն հրէից։

Verse: 13   Link to gnt   Եւ նոքա դարձեալ աղաղակէին՝ յուզեալք ի քահանայապետիցն, ի խաչ հան զդա։

Verse: 14   Link to gnt   Ասէ ցնոսա պեղատոս. զինչ ինչ չար արարեալ իցէ դորա։ Եւ նոքա առաւել եւս աղաղակէին եւ ասէին, ի խաչ հան զդա։

Verse: 15   Link to gnt   Իսկ պեղատոս՝ իբրեւ զմիտս կամեցաւ հաճել զամբոխին, արձակեաց նոցա զբարաբբայն. եւ զՅիսուս գան հարեալ՝ ետ ի ձեռս զի ի խաչ ելանիցէ։

Verse: 16   Link to gnt   Եւ զինուորքն տարան զնա ի ներքս ի գաւիթն՝ ուր հրապարակն էր. եւ կոչեն միանգամայն զամենայն զգունդն.

Verse: 17   Link to gnt   Եւ զգեցուցանեն նմա քղամիդ կարմիր եւ ծիրանիս, եւ եդին ի գլուխ նորա պսակ արարեալ ի փշոց։

Verse: 18   Link to gnt   Եւ սկսան ողջոյն տալ նմա՝ եւ ասել. ողջ եր արքայդ հրէից։

Verse: 19   Link to gnt   Եւ ծեծէին զգլուխն եղեգամբ, եւ թգանէին ընդ երեսս, եւ ի ծունր իջեալ երկիր պագանէին նմա։

Verse: 20   Link to gnt   Եւ իբրեւ կատակեցին զնա, մերկացուցին զքղամիդն եւ զծիրանիս, եւ զգեցուցին նմա զիւր հանդերձ. եւ ածին արտաքս զի ի խաչ հանցեն զնա։

Verse: 21   Link to gnt   Եւ ունէին պահակ զսիմովն կիւրենացի՝ որ ընս այն անցանէր եկեալ յագարակէ, զհայր աղէքսանդրի եւ ռուփայ, զի բարձցէ զխաչափայտն նորա։

Verse: 22   Link to gnt   Եւ ածեն զնա՝ ի գողգոթա տեղի մի, որ թարգմանի՝ տեղի կառափելոյ։

Verse: 23   Link to gnt   Եւ տային նմա գինի զըմռսեալ, եւ նա ոչ առ. եւ հանեն զնա ի խաչ։

Verse: 24   Link to gnt   Եւ բաժանեցին զհանդերձս նորա, արկեալ վիճակս ի վերայ՝ թէ ո զինչ առնուցու։

Verse: 25   Link to gnt   Էր ժամ՝ երրորդ, եւ հանին զնա ի խաչ։

Verse: 26   Link to gnt   Եւ էր գիր վնասու նորա գրեալ, թէ թագաւոր է հրէից։

Verse: 27   Link to gnt   Եւ ընդ նմա հանին ի խաչ երկուս աւազակս, մի ընդ աջմէ եւ մի ընդ ահեկէ նորա։

Verse: 28   Link to gnt   Եւ լցաւ գիրն որ ասէ, թէ ընդ անօրէնս համարեցաւ։

Verse: 29   Link to gnt   Եւ որք անցանէինն հայհոյէին զնա՝ շարժեալ զգլուխս իւրեանց, եւ ասէին. վահ, որ քակէիր զտաճարն՝ զերիս աւուրս շինէիր.

Verse: 30   Link to gnt   Ապրեցո զանձն քո՝ եւ էջ ի խաչէդ։

Verse: 31   Link to gnt   Նոյնպէս եւ քահանայապետիցն այպն արարեալ՝ ընդ միմեանս հանդերձ դպրօքն՝ եւ ասէին. զայլս ապրեցոյց՝ զանձն ոչ կարասցէ ապրեցուցանել.

Verse: 32   Link to gnt   Քրիստոսդ արքայդ իսրայելի. իջցէ այժմ ի խաչէ այտի, զի տեսցուք եւ հաւատասցուք դմա։ Եւ որ ընդ նմա ի խաչն ելեալ էին՝ նախատէին զնա։

Verse: 33   Link to gnt   Եւ իբրեւ վեց ժամ եղեւ՝ խաւար կալաւ զամենայն երկիր մինչեւ ցինն ժամն։

Verse: 34   Link to gnt   Եւ յիններորդ ժամուն աղաղակեաց Յիսուս ի ձայն մեծ՝ եւ ասէ. եղի՝ եղի՝ ղամա սաբաքթանի. որ թարգմանի, Աստուած իմ, Աստուած իմ, ընդէր թողեր զիս։

Verse: 35   Link to gnt   Եւ ոմանք ի նոցանէ՝ որ շուրջն կային զնովաւ՝ իբրեւ լուան, ասէին՝ թէ զեղիա կարդայ։

Verse: 36   Link to gnt   Եւ ընթացեալ մի ոմն՝ ելից սպունգ մի քացախով, եւ հարեալ յեղեգան՝ տայր ըմպել նմա, եւ ասէ. թոյլ տուր, տեսցուք՝ գայ՝ եղիա իջուցանել զդա։

Verse: 37   Link to gnt   Եւ Յիսուս արձակեաց ձայն մեծ՝ եւ եհան զոգի։

Verse: 38   Link to gnt   Եւ վարագոյր տաճարին պատառեցաւ յերկուս՝ ի վերոստ մինչեւ ի խոնարհ։

Verse: 39   Link to gnt   Եւ տեսեալ հարիւրապետին որ կայր անդ՝ թէ աղաղակեաց եւ եհան զոգի, եւ ասէ. արդարեւ՝ այրս այս որդի Աստուծոյ էր։

Verse: 40   Link to gnt   Էին եւ կանայք որ հայէին ի հեռաստանէ. յորս էր մարիամ մագդաղենացի, եւ մարիամ յակովբու փոքրկան եւ յովսեայ մայրն, եւ սողովմէ։

Verse: 41   Link to gnt   Որք յորժամ էրն ի գալիլեա՝ զհետ շրջէին նորա, եւ պաշտէին զնա. եւ այլ բազում կանայք՝ որք ընդ նմա իսկ եկեալ էին յերուսաղէմ։

Section: 48 
Verse: 42   Link to gnt   Եւ իբրեւ երեկոյ եղեւ, քանզի ուրբաթ էր՝ որ շաբաթն մտանէր,

Verse: 43   Link to gnt   Եկեալ յովսէփ որ յարիմաթեայն էր. այր պարկեշտ, նախարար, որ եւ ինքն իսկ ակն ունէր արքայութեան Աստուծոյ. համարձակեցաւ եմուտ առ պեղատոս, եւ խնդրեաց զմարմինն Յիսուսի։

Verse: 44   Link to gnt   Եւ պեղատոս զարմացաւ, թէ այնչափ վաղ մեռաւ։ եւ կոչեցեալ առ ինքն զհարիւրապետն, եհարց զնա եւ ասէ, թէ արդարեւ՝ այնչափ վաղ մեռաւ։

Verse: 45   Link to gnt   Եւ իբրեւ ստուգեաց ի հարիւրապետէ անտի, շնորհեաց զմարմինն յովսեփայ։

Verse: 46   Link to gnt   Եւ Յովսէփ գնեաց կտաւ, եւ իջուցեալ զնա՝ պատեաց կտաւովն, եւ եդ ի գերեզմանին՝ զոր էր փորեալ ի վիմէ. եւ թաւալեցոյց վէմ մի դուռն գերեզմանին։

Verse: 47   Link to gnt   Իսկ մարիմա մագդաղենացի, եւ մարիամ յակովբայ եւ յովսեայ՝ տեսին զտեղին ուր եդաւ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.