TITUS
Armenian NT (Zohrab Bible)
Part No. 32
Previous part

Chapter: 4  
(Դ՜)


Passage: 3-5 
Verse: 1   Link to gnt   Դարձեալ սկսաւ ուսուցանել առ ծովեզերբն. եւ խռնեցան զնովաւ ժողովուրդք բազումք, մինչեւ ի նաւ մտանել նմա, եւ նստել ի ծովուն. եւ ամենայն ժողովուրդքն զծովեզերբն՝ զցամաքն ունէին։

Verse: 2   Link to gnt   Եւ ուսուցանէր զնոսա առակօք բազում ինչ։ Եւ ասէր նոցա ի վարդապետութեան իւրում։

Section: 9  
Verse: 3   Link to gnt   Լսէք ահաւասիկ ել սերմանօղ սերմանել։

Verse: 4   Link to gnt   Եւ եղեւ ի սերմանելն, ոմն անկաւ առ ճանապարհաւ, եւ եկն թռչուն եւ եկեր զնա։

Verse: 5   Link to gnt   Եւ այլն անկաւ յապառաժի՝ ուր ոչ գոյր հող բազում. եւ վաղվաղակի բուսաւ։ քանզի ոչ գոյր հիւթ երկրին,

Verse: 6   Link to gnt   Եւ յորժամ ծագեաց արեւ՝ ջեռաւ, եւ զի ոչ գոյին արմատք՝ ցամաքեցաւ։

Verse: 7   Link to gnt   Եւ այլն անկաւ ի մէջ փշոց. ելին փուշքն եւ հեղձուցին զնա, եւ պտուղ ոչ ետ։

Verse: 8   Link to gnt   Եւ այլն անկաւ յերկիր բարւոք,. եւ ելեալ աճեցեալ տայր պտուղ, եւ բերէր ընդ միոյ՝ երեսուն, եւ ընդ միոյ՝ վաթսուն, եւ ընդ միոյ՝ հարեւր։

Verse: 9   Link to gnt   Եւ ասէր. որ ունիցի ականջս լսելոյ լուիցէ։

Passage: 3-6 
Verse: 10   Link to gnt   Եւ իբրեւ եղեւ առանձինն, հարցին ցնա որ զնովաւն էին աշակերտօքն հանդերձ՝ զառակսն։

Verse: 11   Link to gnt   Եւ ասէ ցնոսա. ձեզ տուեալ է գիտել զխորհուրդս արքայութեան Աստուծոյ։ Բայց նոցա որ արտաքինքն են՝ ամենայն ինչ առակօք լինի։

Verse: 12   Link to gnt   Զի տեսանելով տեսցեն՝ մի տեսցեն, լսելով լուիցեն՝ եւ մի իմասցին. զի մի երբէք դարձցին՝ եւ թողցի նոցա։

Verse: 13   Link to gnt   Եւ ասէ ցնոսա. ոչ գիտէք զառակս զայս, եւ զիարդ զամենայն առակսն գիտիցէք։

Verse: 14   Link to gnt   Որ սերմանէն՝ զբանն սերմանէ։

Verse: 15   Link to gnt   Եւ նոքա են որ առ ճանապարհաւն, ուր բանն սերմանի. եւ յորժամ լսեն զնա, գայ սատանայ՝ եւ հանէ զբանն սերմանեալ ի սիրտս նոցա։

Verse: 16   Link to gnt   Եւ նոքա են որ յապառաժին սերմանեցան. որք յորժամ լսիցեն զբանն, վաղվաղակի խնդութեամբ ընդունին։

Verse: 17   Link to gnt   Եւ զի ոչ ունին արմատս յանձինս, այլ առ ժամանակ մի են. ապա ի հասանել նեղութեան կամ հալածման վասն բանին, վաղվաղակի գայթագղին։

Verse: 18   Link to gnt   Իսկ որ ի մէջ փշոցն սերմանեցան, նոքա են՝ որ իբրեւ զբանն լսեն,

Verse: 19   Link to gnt   եւ հոգք աշխարհիս, եւ պատրանք մեծութեան մտանեն եւ հեղձուցանեն զբանն՝ եւ անպտուղ լինի։

Verse: 20   Link to gnt   Եւ նոքա են որ յերկիրն բարւոք սերմանեցան, որք լսեն զբանն՝ եւ ընդունին, եւ տան պտուղ, ընդ միոյ՝ երեսուն, եւ ընդ միոյ՝ վաթսուն, եւ ընդ միոյ՝ Հարեւր։

Passage: 3-7 
Verse: 21   Link to gnt   Եւ ասէ ցնոսա. մի եթէ՝ գայ ճրագ զի ընդ գրուանաւ դնիցի, կամ ընդ մահճօք. ոչ ապաքէն ի վերայ աշտանակի դնիցի։

Verse: 22   Link to gnt   Զի չէ ինչ ի ծածուկ, որ թէ ոչ յայտնեսցի. եւ ոչ եղեւ ինչ գաղտնի, եթէ ոչ ի յայտ գայցէ։

Verse: 23   Link to gnt   Եթէ ոք ունիցի ականջս լսելոյ, լուիցէ։

Verse: 24   Link to gnt   Եւ ասէ ցնոսա. տեսէք զինչ լսէքդ, եւ յաւելցին ձեզ որոց լսէքդ. որով չափով չափէք՝ նովին չափեսցի ձեզ։

Verse: 25   Link to gnt   Որ ոք ունիցիտացի նմա. եւ որ ոչն ունիցի, եւ զոր ունին՝ բարձցի ի նմանէ։

Passage: 4-1 
Verse: 26   Link to gnt   Եւ ասէր. այսպէս է արքայութիւն Աստուծոյ. որպէս զի այր մի արկանիցէ սերմանիս յերկրի.

Verse: 27   Link to gnt   Եւ ննջիցէ, եւ յառնիցէ զցայգ եւ զցերեկ. եւ սերմանիքն բուսանիցին եւ աճիցեն. եւ նա ոչ գիտէ՝

Verse: 28   Link to gnt   թէ երկիրն ինքնին բերէ զպտուղ. նախ՝ զխոտն, եւ ապա՝ զհասկն, եւ ապա՝ ցորեան ատոք ի հասկին։

Verse: 29   Link to gnt   Այլ յորժամ տայցէ զպտուղն, վաղվաղակի առաքի մանգաղ. զի հասեալ են հունձք։

Verse: 30   Link to gnt   Եւ ասէր, ում նմանեցուսցուք զարքայութիւնն Աստուծոյ, կամ որով առակաւ՝ առակեսցուք զնա։

Verse: 31   Link to gnt   Որպէս հատն մանանխոյ՝ որ յորժամ սերմանիցի յերկրի, փոքրագոյն է քան զամենայն սերմանիս՝ որ են յերկրի։

Verse: 32   Link to gnt   Եւ յորժամ սերմանիցի, բուսանի եւ լինի մեծ քան զամենայն բանջար եւ արձակէ ոստս մեծամեծս, մինչեւ բաւական լինել ընդ հովանեաւ նորա թռչնոց երկնից բնակել։

Verse: 33   Link to gnt   Եւ այնպիսի առակօք խօսէր ընդ նոսա զբանն, որպէս կարօղ լինէին լսել.

Verse: 34   Link to gnt   Եւ առանց առակի ոչ ինչ խօսէր ընդ նոսա։ բայց առանձինն աշակերտացն իւրոց մեկնէր զամենայն։

Section: 10  
Passage: 4-2 
Verse: 35   Link to gnt   Եւ ասէ ցնոսա յաւուր յայնմիկ՝ իբրեւ ընդ երեկս լինէր. եկայք անցցուք յայն կողմն։

Verse: 36   Link to gnt   Թողուն զժողովուրդն, եւ առնուն զնա նաւաւն հանդերձ, եւ զայլ եւս նաւսն որ էին ընդ նմա։

Verse: 37   Link to gnt   Եւ լինէր մրրիկ մեծ հողմոյ, եւ զալիսն ի նաւն զեղոյր մինչ գրե թէ լի իսկ լինել։

Verse: 38   Link to gnt   Եւ ինքն ննջէր ի խելս նաւին՝ ի վերայ բարձի։ Զարթուցանէին զնա՝ եւ ասէին. վարդապետ ոչինչ քեզ փոյթ, զի կորնչիմք աւասիկ։

Verse: 39   Link to gnt   Եւ զարթուցեալ սաստեաց հողմոյն, եւ ծովուն՝ ասէ. դադարեա կարկեաց։ եւ դադարեաց հողմն, եւ եղեւ խաղաղութիւն մեծ։

Verse: 40   Link to gnt   Եւ ասէ ցնոսա. ընդէր այդպէս վատասիրտք էք, չեւ եւս ունիք հաւատս։ եւ երկեան երկեւղ մեծ, եւ ասէին ցմիմեանս. ո ոք արդեւք իցէ սա, զի եւ հողմ եւ ծով հնազանդին սմա։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.