TITUS
Armenian NT (Zohrab Bible)
Part No. 13
Previous part

Chapter: 13  
(Ժ՜Գ)


Section: 24  
Passage: 4-5 
Verse: 1   Link to gnt   Յաւուր յայնմիկ ելեալ Յիսուս ի տանէն՝ նստէր առ ծովեզերն։

Verse: 2   Link to gnt   Եւ ժողովեցան առ նա ժողովուրդք բազումք, մինչեւ մտանել նմա ի նաւն՝ եւ նստել. եւ ամենայն ժողովուրդն կայր առ ծովեզերբն։

Verse: 3   Link to gnt   Եւ խօսէր ընդ նոսա բազումս առակօք, եւ ասէր։

Verse: 4   Link to gnt   Ահա ել սերմանահան սերմանել. եւ ի սերմանելն իւրում, էր որ անկաւ առ ճանապարհաւ, եւ եկն թռչուն երկնից՝ եւ եկեր զնա։

Verse: 5   Link to gnt   Եւ այլն անկաւ յապառաժի, ուր ոչ գոյր հող բազում, եւ վաղվաղակի բուսաւ, առ ի չգոյէ հիւթոյ երկրին՝

Verse: 6   Link to gnt   Ի ծագել արեւուն տապացաւ, եւ զի ոչ գոյին արմատք՝ չորացաւ։

Verse: 7   Link to gnt   Եւ այլն անկաւ ի մէջ փշոց, եւ ելին փուշքն եւ հեղձուցին զնա։

Verse: 8   Link to gnt   Եւ այլն անկաւ յերկիր բարի, եւ տայր պտուղ. էր՝ որ հարիւրաւոր, եւ էր՝ որ վաթսնաւոր, եւ էր՝ որ երեսնաւոր։

Verse: 9   Link to gnt   Որ ունիցի ականջս լսելոյ՝ լուիցէ։

Verse: 10   Link to gnt   Եւ մատուցեալ աշակերտքն ասեն ցնա. ընդէր առակօք խօսիս ընդ նոսա։

Verse: 11   Link to gnt   Նա պատասխանի ետ եւ ասէ ցնոսա. քանզի ձեզ տուեալ է գիտել զխորհուրդս արքայութեանն երկնից, եւ նոցա չէ տուեալ։

Verse: 12   Link to gnt   Զի ոյր գուցէ՝ տացի նմա եւ յաւելցի. եւ ոյր ոչն գուցէ՝ եւ զոր ունիցին բարձի ի նմանէ։

Verse: 13   Link to gnt   Վասն այնորիկ առակօք խօսիմ ընդ նոսա. զի տեսանեն՝ եւ ոչ տեսանեն, եւ լսեն՝ եւ ոչ լսեն, եւ ոչ առնուն ի միտ։

Verse: 14   Link to gnt   Եւ կատարի առ նոսա մարգարէութիւնն եսայայ՝ որ ասէ. լսելով լուիջիք՝ եւ մի իմասջիք. տեսանելով տեսջիք՝ եւ մի տեսջիք։

Verse: 15   Link to gnt   Զի թանձրացաւ սիրտ ժողովրդեանս այսորիկ, եւ ակընջօք իւրեանց ծանունս լուան. եւ զաչս իւրեանց կափուցին, զի մի երբէք տեսցեն աչօք՝ եւ ակնջօք լուիցեն՝ եւ սրտիւքն իմասցեն, եւ դարձցին՝ եւ բժշկեցից զնոսա։

Verse: 16   Link to gnt   Բայց ձեր երանի է աչացդ՝ զի տեսանեն, եւ ակընջաց ձերոց՝ զի լսեն։

Verse: 17   Link to gnt   Ամէն ասեմ ձեզ. զի բազում մարգարէք եւ արդարք ցանկացան տեսանել զոր տեսանէրդ՝ եւ ոչ տեսին, եւ լսել զոր լսէքդ՝ եւ ոչ լուան։

Verse: 18   Link to gnt   Եւ արդ՝ լուարուք դուք զառակ սերմանացանին։

Verse: 19   Link to gnt   Յամենայնէ՝ որ լսէ զբանն արքայութեան՝ եւ ոչ առնու ի միտ, գայ չարն՝ եւ յափշտակէ զսերմանեալն ի սիրտ նորա. այն է՝ որ առ ճանապարհաւն սերմանեցաւ։

Verse: 20   Link to gnt   Եւ որ յապառաժին սերմանեցաւ՝ այն է, որ իբրեւ լսէ զբանն, եւ վաղվաղակի խնդութեամբ ընդունի զնա։

Verse: 21   Link to gnt   Բայց քանզի ոչ ունի արմատս յինքեան, այլ առ ժամանակ մի է. ի լինել նեղութեան եւ հալածանաց վասն բանին՝ վաղվաղակի գայթագղին։

Verse: 22   Link to gnt   Իսկ որ ի մէջ փշոցն սերմանեցաւ, այն է՝ որ իբրեւ լսէ զբանն, եւ հոգք աշխարհիս եւ պատրանք մեծութեան հեղձուցանեն զբանն, եւ լինի անպտուղ։

Verse: 23   Link to gnt   Իսկ որ յերկիրն բարի սերմանեցաւ, այն է՝ որ իբրեւ լսէ զբանն՝ եւ ի միշտ առնու, եւ տայ զպտուղ, է՝ որ հարիւր, եւ է որ վաթսուն. եւ է՝ որ երեսուն։ Որ ունիցի ականջս լսելոյ՝ լուիցէ։

Passage: 4-6 
Verse: 24   Link to gnt   Առակ արկ առ նոսա՝ եւ ասէ։ Նմանեցաւ արքայութիւն երկնից՝ առն որ սերմանիցէ սերմն բարի սերմն բարի յագարակի իւրում։

Verse: 25   Link to gnt   եւ ի քուն լինել մարդկան, եկն թշնամի նորա. եւ ցանեաց ի վերայ որոմն ի մէջ ցորենոյն՝ եւ գնաց։

Verse: 26   Link to gnt   եւ իբրեւ բուսաւ խոտն՝ եւ արար պտուղ, ապա երեւեցաւ եւ որոմն։

Verse: 27   Link to gnt   Մատուցեալ ծառայք տանուտեառնն ասեն ցնա. տէր, ոչ սերմն բարի սերմանեցեր յագարակին քում. արդ՝ ուստի ունիցի զորոմն։

Verse: 28   Link to gnt   Եւ նա ասէ ցնոսա. այր թշնամի արար զայն. ասեն ցնա ծառայքն. կամիս զի երթիցուք քաղիսցուք զայն ի բաց։

Verse: 29   Link to gnt   Եւ նա ասէ ցնոսա.մի. գուցէ մինչ քաղիցէք զորոմնն, եւ զցորեանն ընդ նմին ի բաց խլէք։

Verse: 30   Link to gnt   թոյլ տուք երկոցունց աճել ի միասին մինչեւ ի հունձս, եւ ի ժամանակի հնձոց ասացից ցհնձօղսն. քաղեցէք նախ զորոմնդ, եւ կապեցէք զայդ ի խրձունս առ ի յայրել. եւ զցորեանն ժողովեցէք ի շտեմարանս իմ։

Verse: 31   Link to gnt   Այլ առակ արկ առ նոսա՝ եւ ասէ. նմանէ արքայութիւն երկնից հատոյ մանանխոյ. զոր առեալ մարդոյ՝ սերմանեաց յագարակի իւրում։

Verse: 32   Link to gnt   որ փոքր է քան զամենայն սերմանիս. եւ յորժամ աճիցէ, մեծ է քան զամենայն բանջարս. եւ լինի ծառ՝ մինչեւ գալ թռչնոց երկնիցեւ հանգչել յոստս նորա։

Verse: 33   Link to gnt   Այլ առակ խօսեցաւ ընդ նոսա՝ եւ ասէ նման է արքայութիւն երկնից խմորոյ. զոր առեալ կնոջ թագոյց ի գրիւս երիս ալեր՝ մինչեւ ամենայն խմորեցաւ։

Verse: 34   Link to gnt   Զայս ամենայն խօսեցաւ Յիսուս առակօք ընդ ժուովուրդսն. եւ առանց առակի ոչինչ խօսէր ընդ նոսա։

Verse: 35   Link to gnt   Զի լցցի ասացեալն ի մարգարէէ. բացից առակօք զբերան իմ. բղխեցից զծածկեալսն ի սկզբանէ աշխարհի։

Passage: 4-7 
Verse: 36   Link to gnt   Յայնժամ թողեալ Յիսուսի զժողովուրդսն՝ եկն ի տուն. մատեան առ նա աշակերտքն՝ եւ ասեն, մեկնեա մեզ զառակ որոմանցն ագարակի։

Verse: 37   Link to gnt   Նա պատասխանի ետ՝ եւ ասէ ցնոսա. որ սերմանէ սերմն բարի՝ է որդի մարդոյ։

Verse: 38   Link to gnt   եւ ագարակն աշխարհս է։ սերմն բարի՝ նոքա են, որ որդիքն արքայութեան են. իսկ որոմնն որդիք չարին են։

Verse: 39   Link to gnt   Եւ թշնամին որ վարեաց զայն՝ սատանայ է։ եւ հունձքն կատարած աշխարհիս է. եւ հնձօղքն՝ հրեշտակք են։

Verse: 40   Link to gnt   Որպէս ժողովի որոմնն՝ եւ ի հուր այրի, այնպէս եղիցի ի կատարածի աշխարհիս։

Verse: 41   Link to gnt   առաքեսցէ որդի մարդոյ զհրեշտակս իւր, եւ ժողովեսցեն յարքայութենէ նորա զամենայն գայթգղութիւնս՝ եւ զայնոսիկ ոյք գործեն զանօրէնութիւն։

Verse: 42   Link to gnt   եւ արկցեն զնոսա ի հնոց հրոյ. անդ եղիցի լալ՝ եւ կրճել ատամանց։

Verse: 43   Link to gnt   Յայնժամ արդարքն ծագեսցին իբրեւ զարեգակն յարքայութեան երկնից։ որ ունիցի ականջս լսելոյ՝ լուիցէ։

Verse: 44   Link to gnt   Դարձեալ՝ նման է արքայութիւն երկնից գանձի ծածկելոյ յագարակի, զոր գտեալ մարդոյ՝ թագոյց. եւ ի խնդութենէ անտի երթայ վաճառէ զամենայն ինչ զոր ունի. եւ դնէ զագարակն զայն։

Verse: 45   Link to gnt   Դարձեալ նման է արքայութիւն երկնից առն վաճառականի, որ խնդրիցէ մարգարիտ՝ գեղեցիկս։

Verse: 46   Link to gnt   Եւ գտեալ մի պատուական մարգարիտ՝ երթայ վաճառեաց զամենայն ինչ զոր ունէր՝ եւ գնեաց զայն մարգարիտ։

Verse: 47   Link to gnt   Դարձեալ նման է արքայութիւն երկնից ուռկանի արկանելոյ ի ծով՝ եւ յամենայն ազգաց ժողովելոյ։

Verse: 48   Link to gnt   զոր՝ իբրեւ լցաւ, հանեալ ի ցամաք՝ եւ նստեալ ժողովեցին զբարին յամանս, եւ զխոտանն՝ ի բաց ընկեցին։

Verse: 49   Link to gnt   Այնպէս եղիցի ի կատարածի աշխարհիս. ելցեն հրեշտակք՝ եւ մեկնեսցեն զչարս ի միջոյ արդարոց։

Verse: 50   Link to gnt   եւ արկցեն զնոսա ի հնոց հրոյն. անդ եղիցի լալ եւ կրճել ատամանց։

Verse: 51   Link to gnt   Ասէ ցնոսա Յիսուս. իմացարուք զայս ամենայն. ասեն ցնա. այո տէր.

Verse: 52   Link to gnt   Եւ նա ասէ ցնոսա. վասն այսորիկ ամենայն դպիր աշակերտեալ արքայութեան երկնից, նման է առն տանուտեառն՝ որ հանէ ի գանձէ իւրմէ զնոր եւ զհին։

Passage: 5-1 
Verse: 53   Link to gnt   Եւ եղեւ իբրեւ կատարեաց Յիսուս զառակս զայսոսիկ՝ փոխեցաւ անտի։

Verse: 54   Link to gnt   Եւ եկեալ ի գաւառ իւր՝ ուսուցանէր զնոսա ի ժողովրդեանն նոցա։ մինչեւ զարմանալ նոցա՝ եւ ասել. սմա՝ ուստի իցէ այս իմաստութիւն եւ զօրութիւնք։

Verse: 55   Link to gnt   Ոչ սա է հիւսանն որդի. ոչ մայր սորա. կոչի մարիամ. եւ եղբարք սորա յակովբոս՝ եւ յովսէս՝ եւ սիմովն՝ եւ յուդայ։

Verse: 56   Link to gnt   Եւ քորք սորա ոչ ամենեքեան առ մեզ են. եւ արդ՝ ուստի է սմա այս ամենայն։

Verse: 57   Link to gnt   Եւ գայթագղէին ի նա։ Եւ Յիսուս ասէ ցնոսա. չիք մարգարէ անարդ՝ եթէ ոչ յիւրում գաւառի՝ եւ յիւրում տան։

Verse: 58   Link to gnt   Եւ ոչ արար անդ զօրութիւնս բազումս վասն անհաւատութեան նոցա։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.