TITUS
Armenian NT (Zohrab Bible)
Part No. 2
Previous part

Chapter: 2 
(Բ՜)


Section: 1 
Verse: 1   Link to gnt   Եւ ի ծնանելն Յիսուսի ի Բեթղահէմ հրէաստանիյաւուրս հերովդի արքային։ Ահա մոգք յարեւելից եկին յերուսաղէմ,

Verse: 2   Link to gnt   
եւ ասեն. ուր է որ ծնաւ արքայն հրէից. զի տեսաք զաստղն նորա յարեւելս, եւ եկաք երկիր պագանել նմա։

Verse: 3   Link to gnt   
Եւ իբրեւ լուաւ արքայ հերովդէս՝ խռովեցաւ, եւ ամենայն երուսաղէմ ընդ նմա։

Verse: 4   Link to gnt   
եւ ժողովեալ զամենայն քահանայապետսն եւ զդպիրս ժողովրդեանն, հարցանէր ի նոցանէ թէ ուր ծնանիցի Քրիստոսն։

Verse: 5   Link to gnt   
Եւ նոքա ասեն ցնա, ի բեթղահէմ հրէաստանի։ Զի այսպէս գրեալ է ի ձեռն մարգարէին։

Verse: 6   Link to gnt   
Եւ դու Բեթղահէմ երկիր յուդայ՝ ոչինչ կրտսեր ես յիշխանս յուդայ. ի քէն ելցէ ինձ իշխան, որ հովուեսցէ զժողովուրդ իմ զիսրայէլ

Verse: 7   Link to gnt   
Յայնժամ հերովդէս գաղտ կոչեաց զմոգսն, եւ ստուգեաց ի նոսանէ զժամանակն աստեղն երեւելոյ։

Verse: 8   Link to gnt   
եւ արձեակեալ զնոսա ի բեթղահէմ, ասէ, գնացէք ստուգեցէք վասն մանկանն, եւ յորժամ գտանիցէք՝ ազդ արասջիք ինձ, զի եւ ես եկեալ երկիր պագից նմա։

Verse: 9   Link to gnt   
Եւ նոքա իբրեւ լուան ի թագաւորէն՝ գնացին. եւ ահա աստղն զոր տեսին յարեւելս՝ առաջնորդեաց նոցա, մինչեւ եկեալ եկաց ի վերայ ուր էր մանուկն։

Verse: 10   Link to gnt   
Իբրեւ տեսին զաստղն, խնդացին յոյժ ուրախութիւն մեծ։

Verse: 11   Link to gnt   
Եւ իբրեւ մտին ի տուն, տեսին զմանուկն հանդերձ մարիամաւ մարբն իւրով, եւ անկեալ երկիր պագանեցին նմա. եւ բարձեալ զգանձս իւրեանց՝ մատուցին նմա պատարագս՝ ոսկի. եւ կնդրուկ, եւ զմուռս։

Verse: 12   Link to gnt   
Եւ հրաման առեալ ի տեսլեան, չդառնալ անդրէն առ հերովդէս, ընդ այլ ճանապարհ գնացին յաշխարհս իւրեանց։

Verse: 13   Link to gnt   
Եւ իբրեւ գնացին նոքա անտի, ահա հրեշտակ տեառն երեւէր ի տեսլեան յովսէփու, եւ ասէր. արի առ զմանուկդ՝ եւ զմայր իւր՝ եւ փախիր յեգիպտոս, եւ անդ լինիջիր՝ ցորժամ ասացից քեզ. քանզի ի խնդիր է հերովդէս կորուսանել զմանուկդ։

Verse: 14   Link to gnt   
Եւ նա յարուցեալ առ զմանուկն եւ զմայր իւր գիշերի՝ եւ գնաց յեգիպտոս, եւ անդ լինէր մինչեւ ցվախճան հերովդի։

Verse: 15   Link to gnt   
Զի լցցի ասացեալն ի տեառնէ ի ձեռն մարգարէին որ ասէ. յեգիպտոսէ կոչեցից զորդի իմ։

Section: 2 
Verse: 16   Link to gnt   
Յայնժամ իբրեւ ետես հերովդէս թէ խաբեցաւ ի մոգուց անտի, բարկացաւ յոյժ. եւ առաքեաց կոտորեաց զամենայն մանուկս որ էին ի բեթղահէմ եւ յամենայն սահմանս նորա՝ յերկեմենից եւ ի խոնարհ, ըստ ժամանակին զոր ստուգեաց ի մոգուցն։

Verse: 17   Link to gnt   
Յայնժամ կատարեցաւ ասացեալն ի ձեռն երեմիայ մարգարէի որ ասէ.

Verse: 18   Link to gnt   
Ձայն գուժեաց ի հռամայ, ողբումն եւ լալումն եւ աշխարումն յոյժ. հռաքէլ լայր զորդիս իւր. եւ ոչ կամէր մխիթարել՝ զի ոչ էին։

Verse: 19   Link to gnt   
Եւ ի վախճանելն հերովդի, ահա հրեշտակ տեառն ի տեսլեան երեւէր յովսեփայ յեգիպտոս,

Verse: 20   Link to gnt   
եւ ասէր. արի առ զմանուկդ եւ զմայր իւր, եւ գնայ յերկիրն իսրայէլի. զի մեռան որ խնդրէին զանձն մանկանդ։

Verse: 21   Link to gnt   
Եւ նա յարուցեալ առ զմանուկն եւ զմայրն նորա, եւ եկն յերկիրն իսրայէլի։

Verse: 22   Link to gnt   
Եւ իբրեւ լուաւ եթէ արքեղտոս թագաւորեաց հրէաստանի փոխանակ հերովդի հօրն իւրոյ, երկեաւ երթալ անդր. եւ հրաման առեալ ի տեսլեան, գնաց ի կողմանս գալիլեացւոց։

Verse: 23   Link to gnt   
եւ եկեալ բնակեցաւ ի քաղաքին՝ որ կոչէր նազարեթ. զի լցցի բան մարգարէին, թէ նազովրեցի կոչեսցի։



Next part



This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.