TITUS
Avestan Corpus
Part No. 113
Previous part

Chapter: 19 
Paragraph: 1 
Verse: a    apāxtarat̰.1 haca. naēmāt̰.
Verse: b    apāxtaraēibiiō. haca. naēmaēibiiō.
Verse: c       fraduuarat̰. aŋrō. mainiiuš. pouru.mahrkō.
Verse: d          daēuuanąm. daēuuō:
Verse: e    uiti. dauuata.2 hō.
Verse: f       yō. duždā̊. aŋrō. mainiiuš. pouru.mahrkō:
Verse: g    druxš.3 upa.duuāra.4
Verse: h       mərəṇciŋuha.5 aṣ̌āum. zaraϑuštra:6
Verse: i    druxš. hē. pairi.duuarat̰.
Verse: j       būiti. daēuuō.
Verse: k       iϑiiejō. marṣ̌aonəm. dauuažā̊.7

Paragraph: 2 
Verse: a    zaraϑuštrō.1 ahunəm. vairīm. frasrāuuaiiat̰:2


Verse: Q1a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1c    xšaϑrəmcā. ahurāi.ā.   yim. drigubiiō. dadat̰. vāstārəm.::


Verse: b    āpō. vaŋuhīš.4 frāiiazaēta.5 vaŋhuiiā̊. dāitiiaiiā̊.
Verse: c       daēnąm. māzdaiiasnīm. fraorənaēta:6
Verse: d    druxš. hē. stərətō.7 apa. duuarat̰.
Verse: e       būiti. daēuuō.
Verse: f       iϑiiejō.8 marṣ̌aonəm. dauuažā̊.9

Paragraph: 3 
Verse: a    druxš. hē. paiti.dauuata:
Verse: b    skutara. aŋra.1 mainiiō.
Verse: c    nōit̰. hē. aoṣ̌ō. pairi.vaēnāmi.2
Verse: d       spitamāi.3 zaraϑuštrāi.3
Verse: e    pouru.xvarənaŋhō.4 aṣ̌auua. zaraϑuštrō:
Verse: f    zaraϑuštrō.5 manaŋhō. pairi.vaēnāt̰:6
Verse: g    daēuua.7 mē. druuaṇtō. duždā̊ŋhō. aoṣ̌əm.8 hąm.pərəsəṇte.

Paragraph: 4 
Verse: a    usəhištat̰.1 zaraϑuštrō.
Verse: b    fraṣ̌usat̰.2 zaraϑuštrō.
Verse: c       asarətō. aka. manaŋha.3
Verse: d       xruždiia.4 t̰baēṣ̌ō.parštanąm.
Verse: e       asānō. zasta.5 drazimnō.6
Verse: f          katō.masaŋhō.7 həṇti.
Verse: g       aṣ̌auua. zaraϑuštrō.
Verse: h       viṇdəmnō.8
Verse: i          daϑuṣ̌ō. ahurāi. mazdāi:
Verse: j    kuua. hē.9 dražahe. aiŋ́hā̊.10 zəmō.
Verse: k       yat̰. paϑanaiiā̊.11 skarənaiiā̊.12 dūraēpāraiiā̊.
Verse: l          drəjiia.13 paiti.14 zbarahi.15 nmānahe. pouruṣ̌aspahe.

Paragraph: 5 
Verse: a    uzuuaēδaiiat̰.1 zaraϑuštrō. aŋrəm. mainiiūm:2
Verse: b    dužda. aŋra.3 mainiiō.
Verse: c    janāni. dąma. daēuuō.dātəm.
Verse: d    janāni. nasuš. daēuuō.dātəm.
Verse: e    janāni. pairikąm. yąm. xnąϑaiti.4
Verse: f       yahmāi. us.zaiiāite.5 saoš́iiąs.6 vərəϑraja.
Verse: g          haca. apat̰. kąsaoiiāt̰.7 uṣ̌astarat̰.
Verse: h          haca. naēmāt̰. uṣ̌astaraēibiiō.
Verse: i          haca. naēmaēibiiō.

Paragraph: 6 
Verse: a    paiti. ahmāi. adauuata.
Verse: b       duždāmō. aŋrō. mainiiuš:
Verse: c    mā. mē. dąma.1 mərəṇcaŋuha.2
Verse: d       aṣ̌āum. zaraϑuštra:3
Verse: e    tūm.4 ahi.5 pouruṣ̌aspahe. puϑrō.
Verse: f       barəϑriiāt̰.6 haca. zāuuiši.7
Verse: g    apa.stauuaŋuha. vaŋuhīm. daēnąm. māzdaiiasnīm.
Verse: h       viṇdāi.8 yānəm.
Verse: i          yaϑa. vindat̰.9 vaδaγanō. daiŋ́hupaitiš.10

Paragraph: 7 
Verse: a    paiti.1 ahmāi. auuaṣ̌ata.2
Verse: b       yō. spitāmō. zaraϑuštrō:
Verse: c    nōit̰. hē. apa.stauuāne.3 vaŋuhīm. daēnąm. māzdaiiasnīm.
Verse: d       nōit̰. astaca.4 nōit̰. uštānəmca.
Verse: e       nōit̰. baoδasca. vīuruuīsiiāt̰.5

Paragraph: 8 
Verse: a    paiti. ahmāi. adauuata.
Verse: b       duždāmō. aŋrō. mainiiuš:
Verse: c    kahe. vaca. vanāi.1
Verse: d    kahe. vaca. apa.yasāi.2
Verse: e       kana. zaiia. hukərətā̊ŋhō.
Verse: f          mana. dąma. aŋrō.mainiiuš.

Paragraph: 9 
Verse: a    paiti. ahmāi. auuaṣ̌ata.1
Verse: b       yō. spitāmō. zaraϑuštrō:
Verse: c    hāuuanaca. taštaca.
Verse: d    haomaca. vaca.2 mazdō.fraoxta.3
Verse: e       mana. zaiia. asti. vahištəm.
Verse: f    ana. vaca. vanāni.4
Verse: g    ana. vaca. apa.yasāne.5
Verse: h       ana. zaiia. hukərətā̊ŋhō.
Verse: i          āi. dužda. aŋra. mainiiō:
Verse: j    daϑat̰. spəṇtō. mainiiuš.
Verse: k       daϑat̰. zrūne.6 akarane.
Verse: l    fradaϑən. aməṣ̌ā̊.7 spəṇta.7
Verse: m       huxṣ̌aϑra.8 huδā̊ŋhō.

Paragraph: 10 
Verse: a    zaraϑuštrō. ahunəm. vairīm. frasrāuuaiiat̰:


Verse: Q1a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1c    xšaϑrəmcā. ahurāi.ā.   yim. drigubiiō. dadat̰. vāstārəm.::


Verse: b    frāmraot̰. aṣ̌auua. zaraϑuštrō:


{~ Y. 44,1a}
Verse: Q2a    tat̰. ϑβā. pərəsā.   arš.1 mē.2 vaoca.3 ahura.3


Paragraph: 11 
Verse: a    pərəsat̰. zaraϑuštrō. ahurəm. mazdąm:
Verse: b    ahura. mazda.
Verse: c       mainiiō. spə̄ništa.
Verse: d       dātarə. gaēϑanąm. astuuaitinąm. aṣ̌āum.
Verse: e    drəjiia.1 paiti. zbarahe.2
Verse: f       ahurāi. mazdāi.
Verse: g       vaŋhauue. vohu.maite.3
Verse: h             ā̊ŋhānō.
Verse: i       aṣ̌āi. vahištāi.
Verse: j       xṣ̌aϑrāi. vairiiāi.
Verse: k       spəṇtaiiāi. ārmatə̄e.4

Paragraph: 12 
Verse: a    kuϑa. hīš.1 azəm. kərənauuāni.2
Verse: b       haca. auuaŋhāt̰.3 drujat̰.
Verse: c       haca. dužda. aŋra.4 mainiiō.
Verse: d    kuϑa. hąm.raēϑβəm.
Verse: e    kuϑa. paiti.raēϑβəm.
Verse: f    kuϑa. nasuš. apaiiasāne.5
Verse: g       haca. auuaŋhāt̰.3 vīsat̰.6 yat̰. māzdaiiasnōit̰.7
Verse: h    kuϑa. narəm. aṣ̌auuanəm. yaoždaϑāni.8
Verse: i    kuϑa. nāirikąm. aṣ̌aonīm. yaoždāϑrəm. barāni.9

Paragraph: 13 
Verse: a    āat̰. mraot̰. ahurō. mazdā̊:
Verse: b    nizbaiiaŋuha. tū.1 zaraϑuštra.
Verse: c       vaŋuhīm. daēnąm. māzdaiiasnīm.
Verse: d    nizbaiiaŋuha. tū.1 zaraϑuštra.
Verse: e    auuaēn.2 aməṣ̌ā̊.3 spəṇta.3
Verse: f       auui.4 haptō.karṣ̌uuairīm. ząm.
Verse: g    nizbaiiaŋuha. tū. zaraϑuštra.
Verse: h       ϑβāṣ̌ahe. xvaδātahe.
Verse: i       zruuānahe. akaranahe.5
Verse: j       vaiiaoš.6 uparō.kairiiehe.
Verse: k    nizbaiiaŋuha. tū. zaraϑuštra.
Verse: l       vātō. taxmō. mazdaδātō.
Verse: m       spəṇta. srūra.
Verse: n          duγδa. ahurahe. mazdā̊:

Paragraph: 14 
Verse: a    nizbaiiaŋuha. tū. zaraϑuštra.
Verse: b       frauuaṣ̌iš.1 mana. yat̰. ahurahe. mazdā̊.
Verse: c       auuąm. yąm. mazištąmca. vahištąmca.
Verse: d       sraēštąmca. xraoždištąmca.2
Verse: e       xraϑβištąmca. hukərəptəmąmca.
Verse: f       aṣ̌āt̰. apanōtəmąmca.
Verse: g       3yeŋ́he. uruua. mąϑrō. spəṇtō:
Verse: h    xvatō.3 nizbaiiaŋuha.4 zaraϑuštra.
Verse: i       imat̰. dąma. yat̰. ahurahe. mazdā̊.

Paragraph: 15 
Verse: a    vaxṣ̌əm.1 mē. asąsat̰. zaraϑuštrō:
Verse: b    nizbaiiemi.2 ahurō. mazdā̊.
Verse: c       aṣ̌auua. dąma. dātəm.3
Verse: d    nizbaiiemi. miϑrəm.
Verse: e       vouru.gaoiiaoitīm. huzaēnəm.
Verse: f       xvarənaŋuhastəməm.4 zaiianąm.
Verse: g       vərəϑrauuastəməm. zaiianąm.
Verse: h    nizbaiiemi. sraoṣ̌əm. aṣ̌īm. huraoδəm.
Verse: i       snaiϑiš. zastaiia.5 dražimnō.6
Verse: j          kamərəδe. paiti. daēuuanąm.

Paragraph: 16 
Verse: a    nizbaiiemi. mąϑrō. spəṇtō. yō. aš.xvarənā̊.1
Verse: b    nizbaiiemi. ϑβāṣ̌ahe. xvaδātahe.
Verse: c       zruuānahe. akaranahe.2
Verse: d       vaiiaoš. uparō.kairiiehe.
Verse: e    nizbaiiemi. vātō. taxmō. mazdaδātō.
Verse: f       spəṇta.3 srūra.
Verse: g          duγδa.4 ahurahe. mazdā̊.
Verse: h    nizbaiiemi. vaŋuhīm. daēnąm. mazdaiiasnīm5.
Verse: i       dātəm. vīdōiiūm.6 zaraϑuštra.7

Paragraph: 17 
Verse: a    pərəsat̰. zaraϑuštrō. ahurəm. mazdąm:
Verse: b    dātō. vaŋhən.1 ahura. mazda.
Verse: c    kana. yasna. yazāne.2
Verse: d    kana. yasna. frāiiazāne.2
Verse: e       imat̰. dąma. yat̰. ahurahe. mazdā̊.

Paragraph: 18 
Verse: a    āat̰. mraot̰. ahurō. mazdā̊:
Verse: b    uruuaranąm. uruϑmiianąm.1 auua.jasāhi.2
Verse: c             spitama. zaraϑuštra.
Verse: d          srīra. urusta. amauuaiti.
Verse: e       imat̰. vacō. framrū:3
Verse: f    nəmō. uruuaire.4 vaŋuhi.5 mazdaδāte.6 aṣ̌aone.7

Verse: Q1a    aṣ̌əm. vohū. vahištəm. astī::
Verse: Q1b    uštā. astī. uštā. ahmāi.
Verse: Q1c    hiiat̰. aṣ̌āi. vahištāi. aṣ̌əm.:: (yak. bār.)

Paragraph: 19 
Verse: a    barəsma. hē. uzbāraiiat̰.1
Verse: b       aēṣ̌ō.drājō. yauuō.fraϑō.2
Verse: c    mā. hē. barəsma.
Verse: d       pairi.kərətəm.3 pairi.kərəṇtīš.4
Verse: e          narō. aŋhən. aṣ̌auuanō.
Verse: f             hāuuōiia.5 zasta. niiāsəmnō.6
Verse: g          yazəmnō.7 ahurəm. mazdąm.
Verse: h          yazəmnō.7 aməṣ̌ə̄. spəṇtə̄.8
Verse: i          haomasca. zāiriš.9 bərəzō.10
Verse: j          srīrā̊sca. vohu. manō.
Verse: k          rātaca.11 vaŋuhi. mazdaδāta.
Verse: l             aṣ̌aone.12 vahištō.13

Paragraph: 20 
Verse: a    pərəsat̰. zaraϑuštrō. ahurəm. mazdąm:
Verse: b    vīspō.vīδuuā̊.1 ahura. mazda.
Verse: c    axvafnō. ahi.2
Verse: d       abaŋhō.3 tūm.
Verse: e          yō. ahurō. mazdā̊:
Verse: f    vohu. manō. hąm.raēϑβaiieiti.
Verse: g    vohu. manō. paiti.raēϑβaiieiti.
Verse: h       haca. auuaŋhāt̰.4 tanuuat̰.
Verse: i          yat̰. daēuuō.jataiiā̊.5
Verse: j    daēuua. hąm.raēϑβaiieiti.6
Verse: k    buuat̰.7 vohu. manō. yaoždātō.

Paragraph: 21 
Verse: a    āat̰. mraot̰. ahurō. mazdā̊:
Verse: b    gaomaēzəm. aiiasōiš. zaraϑuštra.
Verse: c       gaom.1 pairi. uxṣ̌ānəm.2
Verse: d          bixəδrəm.3 dāitiiō.kərətəm.4
Verse: e    yaoždāt̰a. frabarōiš.
Verse: f       ząm. paiti. ahuraδātąm.
Verse: g    pairi.karṣ̌əm. pairi.karṣ̌ōit̰.5
Verse: h       aēṣ̌ō. nā. yō. yaoždāϑriiō.

Paragraph: 22 
Verse: a    satəm. aṣ̌ō.stūitinąm.1 upastuuōiš.2
Verse: b    biϑuuat̰.3 ahunəm. vairīm. frasrāuuaiiōiš:4
Verse: c    catura.5 frasnana.6 frasnaiiōit̰.7
Verse: d       gaomaēzəm. gauua. dātaiiā̊.8
Verse: e       biš. āpəm. mazdaδātaiiā̊.

Paragraph: 23 
Verse: a    yaoždāta. bun.1 vohu. manō.
Verse: b    yaoždāta. bun.1 maš́iiō.
Verse: c    uzgəuruuaiiāt̰.2 vohu. manō.
Verse: d       hāuuōiia. bāzuuō. daṣ̌inaca.
Verse: e       daṣ̌ina. bāzuuō. hāuuaiiaca:
Verse: f    āat̰. vohu. manō. nidaiδīš.3
Verse: g       sūrō.ϑβarštanąm.4 raocaŋhąm.
Verse: h          yat̰. hē. 5stārąm. baγō.dātanąm.6 aiβi.5 raocaiiā̊ṇte.7
Verse: i             vīspəm. ā. ahmāt̰.
Verse: j                yat̰. hē. nauua. xṣ̌afna. sacā̊ṇte.

Paragraph: 24 
Verse: a    āat̰. pasca. nauua.xṣ̌aparāt̰.
Verse: b          āϑre. zaoϑrā̊.1 frabarōiš.2
Verse: c       xrūždranąm.3 aēsmanąm.
Verse: d          āϑre. frabarōiš.
Verse: e       4vohu.gaonanąm. baoiδinąm.5
Verse: f          āϑre. frabarōiš.4
Verse: g    vohu. manō. ā.baoδaiiaēta.6

Paragraph: 25 
Verse: a    yaoždāta. bun.1 vohu. manō.
Verse: b    yaoždāta. bun. maš́iiō.
Verse: c    uzgəuruuaiiāt̰.2 vohu. manō.
Verse: d       hāuuōiia.3 bāzuuō. daṣ̌inaca.
Verse: e       daṣ̌ina. bāzuuō. haoiiaca.4
Verse: f    frauuaocat̰. vohu. manō:
Verse: g       nəmō. ahurāi. mazdāi.
Verse: h       nəmō. aməṣ̌aēibiiō. spəṇtaēibiiō.
Verse: i       nəmō. aniiaēṣ̌ąm. aṣ̌aonąm.

Paragraph: 26 
Verse: a    pərəsat̰. zaraϑuštrō. ahurəm. mazdąm:
Verse: b    vīspō.vīδuuā̊.1 ahura. mazda.
Verse: c    haxṣ̌āne.2 narəm. aṣ̌auuanəm.
Verse: d    haxṣ̌āne.2 nāirikąm. aṣ̌aonīm.3
Verse: e    haxṣ̌āne.2
Verse: f       druuatąm. daēuuaiiasnanąm.
Verse: g       mərəzujītīm.4 maš́iiānąm.
Verse: h          ząm. ahuraδātąm. nipāraiiaṇta.
Verse: i       āpəm. taciṇtąm.5
Verse: j       yauuanąm. uruϑmąm.
Verse: k          aniiąm. hē. auuarətąm.6 nipāraiiaṇta:7
Verse: l    āat̰. mraot̰. ahurō. mazdā̊:
Verse: m    haxṣ̌aēša.8 aṣ̌āum. zaraϑuštra.

Paragraph: 27 
Verse: a    dātarə. gaēϑanąm. astuuaitinąm. aṣ̌āum.
Verse: b    kuua. tā. dāϑra. bauuaiṇti.
Verse: c    kuua. tā. dāϑra. pāraiieiṇti.1
Verse: d    kuua. tā. dāϑra. pairi.bauuaiṇti.2
Verse: e    kuua. tā. dāϑra. paiti. haṇjasəṇti.3
Verse: f       maš́iiō. astuuaiṇti.4 aŋhuuō.5
Verse: g          hauuāi.6 urune. para.daiδiiāt̰.7

Paragraph: 28 
Verse: a    āat̰. mraot̰. ahurō. mazdā̊:
Verse: b    pasca. para.iristahe.1 maš́iiehe.
Verse: c    pasca. frasaxtahe.2 maš́iiehe.
Verse: d    pasca. pairiϑnəm.3 dərəniṇti.4
Verse: e       daēuua.5 druuaṇtō. duždā̊ŋhō:
Verse: f    ϑritiiā̊. xṣ̌apō. vīusaiti.6
Verse: g       uṣ̌i.7 raocaiti.8
Verse: h    bāmiia.9 gairinąm. aṣ̌axvāϑranąm. āsənaoiti.10
Verse: i    miϑrəm. huzaēnəm.11 huuarəxṣ̌aētəm. uziiōraiti:12

Paragraph: 29 
Verse: a    vīzarəṣ̌ō.1 daēuuō. nąma.
Verse: b          spitama. zaraϑuštra.
Verse: c       uruuānəm. bastəm. vāδaiieiti.2
Verse: d          druuatąm.3 daēuuaiiasnanąm.
Verse: e          mərəzujītīm.4 maš́iiānąm:
Verse: f    paϑąm. zruuō.dātanam. jasaiti.5
Verse: g       yasca. druuaite.6
Verse: h       yasca. aṣ̌aone.7
Verse: i          cinuuat̰.pərətūm.8 mazdaδātąm.9
Verse: j    baoδasca. uruuānəmca. yātəm.
Verse: k       gaēϑanąm. paiti.jaiδiieiṇti.10
Verse: l          dātəm. astuuainti.11 aŋhuuō.

Paragraph: 30 
Verse: a    hāu.1 srīra. kərəta.2 taxma. huraoδa. jasaiti.3
Verse: b       spānauuaiti.4 niuuauuaiti.5 pasuuaiti.6
Verse: c       yaoxštauuaiti.7 hunarauuaiti:

Verse: d    [hā.8 druuatąm. aγəm. uruuānō.
Verse: e       təmō.huua.9 nizarṣ̌aite:10]

Verse: f    hā. aṣ̌āunąm.11 uruuānō.
Verse: g          tarasca. harąm. bərəzaitīm. āsənaoiti.12
Verse: h       tarō. cinuuatō.13 pərətūm. vīδāraiieiti.14
Verse: i          haētō. mainiiauuanąm. yazatanąm.

Paragraph: 31 
Verse: a    usəhištat̰.1 vohu. manō.
Verse: b       haca. gātuuō. zaraniiō.kərətō.2
Verse: c    frauuaocat̰. vohu. manō:
Verse: d    kaδa. nō. iδa. aṣ̌āum. agatō.
Verse: e       iϑiiejaŋhatat̰.3 haca. aŋhaot̰.
Verse: f       aiϑiiajaŋhəm.4 ahūm. ā.

Paragraph: 32 
Verse: a    xṣ̌nūtō. aṣ̌aonąm.1 uruuānō. pāraiieiṇti.2
Verse: b       auui. ahurahe. mazdā̊.
Verse: c       auui. aməṣ̌anam. spəṇtanąm.
Verse: d       auui. gātuuō.3 zaraniiō.kərətō.4
Verse: e       5auui. garō. nmānəm.5
Verse: f          maēϑanəm.6 ahurahe. mazdā̊.
Verse: g          maēϑanəm.6 aməṣ̌anąm. spəṇtanąm.
Verse: h          maēϑanəm. aniiaēṣ̌ąm. aṣ̌aonąm.

Paragraph: 33 
Verse: a    yaoždāϑriiō. aṣ̌auua.
Verse: b       pasca. para.iristīm.1
Verse: c          daēuua.2 druuaṇtō. duždā̊ŋhō.
Verse: d             baoδəm. auuaϑa. fratərəsəṇti.3
Verse: e                yaϑa. maēṣ̌i.4 vəhrkauuaiti.
Verse: f                   vəhrkat̰.5 haca. fratarəsaiti.6

Paragraph: 34 
Verse: a    narō. aṣ̌auuanō. hąm.bauuaiṇti.
Verse: b    nairiiō. saŋhō. hąm.bauuaiti.1
Verse: c       aštō.2 mazdā̊. ahurahe.
Verse: d    mrūiδi. nairiiō. saŋhō:
Verse: e    xvatō.3 nizbaiiaŋuha. zaraϑuštra.
Verse: f       imat̰. dąma. yat̰. ahurahe. mazdā̊.4

Paragraph: 35 
Verse: a    vaxṣ̌əm.1 mē. asąsat̰.2 zaraϑuštrō:
Verse: b    nizbaiiemi. ahurō. mazdā̊. aṣ̌auua. dāmi.dātəm.3
Verse: c    nizbaiiemi. ząm.4 ahuraδātąm.
Verse: d       āpəm. mazdaδātąm.
Verse: e       uruuarąm.5 aṣ̌aonīm.6
Verse: f    nizbaiiemi. zraiiō. vourukaṣ̌əm.
Verse: g    nizbaiiemi. asmanəm. xvanuuaṇtəm.7
Verse: h    nizbaiiemi. anaγra. raocā̊. xvaδātā̊.

Paragraph: 36 
Verse: a    nizbaiiemi. vahištəm. ahūm. aṣ̌aonąm.
Verse: b       raocaŋhəm. vīspō.xvāϑrəm.
Verse: c    nizbaiiemi. garō. nmānəm.
Verse: d       maēϑanəm. ahurahe. mazdā̊.
Verse: e       maēϑanəm. aməṣ̌anąm. spəṇtanąm.
Verse: f       maēϑanəm. aniiaēṣ̌ąm. aṣ̌aonąm.
Verse: g    nizbaiiemi. misuuānahe. gātuuahe.1 xvaδātahe.
Verse: h       cinuuat̰.pərətūm. mazdaδātąm.

Paragraph: 37 
Verse: a    nizbaiiemi. saokąm. vaŋuhīm. vouru.dōiϑrąm.1
Verse: b    nizbaiiemi. uγrā̊. aṣ̌āunąm.2 frauuaṣ̌aiiō.
Verse: c       vīspā̊. dāmąn.3 sauuaŋuhaitiš.4
Verse: d    nizbaiiemi. vərəϑraγnəm. ahuraδātəm.
Verse: e       barō.xvarənō. mazdaδātəm.
Verse: f    nizbaiiemi. tištrīm. stārəm.
Verse: g       raēuuaṇtəm. xvarənaŋuhaṇtəm.5
Verse: h       gə̄uš. kəhrpa. zaraniiō.srauuahe.

Paragraph: 38 
Verse: a    nizbaiiemi. gāϑābiiō. spəṇtābiiō.
Verse: b       ratuxṣ̌aϑrābiiō. aṣ̌aonibiiō.
Verse: c    nizbaiiemi. ahunauuaitiiā̊. gāϑaiiā̊.
Verse: d    nizbaiiemi. uštauuaitiiā̊. gāϑaiiā̊.
Verse: e    nizbaiiemi. spəṇtā.mainiiə̄uš.1 gāϑaiiā̊.
Verse: f    nizbaiiemi. vohuxṣ̌aϑraiiā̊.2 gāϑaiiā̊.
Verse: g    nizbaiiemi. vahištōištōiš.3 gāϑaiiā̊.

Paragraph: 39 
Verse: a    nizbaiiemi. auuat̰. karṣ̌uuarə.
Verse: b       yat̰. arəzahe. sauuahe.
Verse: c    nizbaiiemi. auuat̰. karṣ̌uuarə.
Verse: d       yat̰. fradaδafṣ̌u. vīdaδafṣ̌u.
Verse: e    nizbaiiemi. 1auuat̰. karṣ̌uuarə.
Verse: f       yat̰.1 vouru.barəšti.2 vouru.jarəšti.
Verse: g    nizbaiiemi. imat̰.3 karṣ̌uuarə.
Verse: h       yat̰. xvaniraϑəm.4 bāmīm.
Verse: i    nizbaiiemi. haētuməṇtəm.5
Verse: j       raēuuaṇtəm. xvarənaŋuhaṇtəm.
Verse: k    nizbaiiemi. aṣ̌ōiš. vaŋhuiiā̊.6
Verse: l       [cistōiš. vaŋhuiiā̊.]
Verse: m    nizbaiiemi. razištaiiā̊. cistaiiā̊.
Verse: n    7nizbaiiemi. xvarənō. airiianąm. dax́iiunąm.7
Verse: o    nizbaiiemi. xvarənō. yimāi. xṣ̌aētāi. huuąϑβāi.

Paragraph: 40 
Verse: a    yaštō. xṣ̌nūtō. friϑō.1 paiti.zaṇtō. sraoṣ̌ō. aṣ̌iiō.
Verse: b       huraoδō. vərəϑraja. sraoṣ̌ō. aṣ̌iiō:
Verse: c    āϑre. zaoϑrā̊.2 frabarōiš.
Verse: d       xrūždranąm.3 aēsmanąm. āϑre. frabarōiš.
Verse: e       vohu.gaonanąm. baoiδinąm. āϑre. frabarōiš.
Verse: f    ātrəm. vāzištəm. frāiiazaēša.
Verse: g       daēum.4 janəm.5 spəṇjaγrīm:6
Verse: h    xvāsta. xvarəϑā̊.7 frabarōiš.
Verse: i       pərənąm.8 viγžāraiieiṇtīm.9

Paragraph: 41 
Verse: a    sraoṣ̌ō. aṣ̌iiō.1 frāiiazaēša:
Verse: b    sraoṣ̌ō. aṣ̌iiō.2
Verse: c       daēum.3 kuṇdəm.
Verse: d       baŋhəm.4 vībaŋhəm.5
Verse: e          auua.janiiāt̰.
Verse: f    drujaskanąm.6 hąm.pataiti.
Verse: g       druuatąm. daēuuaiiasnanąm.
Verse: h       mərəzujītīm.7 maš́iiānąm.

Verse: i    [nazdištā̊.8 daiŋ́hāuuō.9 yaoždāϑriiāt̰.10 haca.
Verse: j       frakaire.11 frakərənaot̰.
Verse: k       vāstre.12 vərəziiōit̰.
Verse: l          pasuš.xvarəϑəm.
Verse: m       gauue. xvarəϑəm.]

Paragraph: 42 
Verse: a    nizbaiiemi. karō. masiiō. upāpō.
Verse: b       būne.1 jafranąm. vairiianąm.
Verse: c    nizbaiiemi. mərəzu.2 pouruuō.xvaδātō.3
Verse: d       yūiδištō. mainiuuā̊.4 dāmąn.5
Verse: e    nizbaiiemi. hapta. srauuō. bāmiia.6
Verse: f       huuā̊ŋhō.7 puϑrā̊ŋhō. pusā̊ŋhō.8 bauuaiṇti.

Paragraph: 43 
Verse: a    fradauuata. vīdauuata.
Verse: b    framaniiata. vīmaniiata.
Verse: c       aŋrō. mainiiuš. pouru.mahrkō.
Verse: d       daēuuanąm. daēuuō. iṇdrō.1
Verse: e       daēuuō. saoru.2
Verse: f       daēuuō. nā̊ŋhaiϑəm.3
Verse: g       daēuuō. tauruui.4 zairica.
Verse: h       aēṣ̌əməm. xruuī.drūm.
Verse: i       akataṣ̌əm.5 daēum.6
Verse: j       ziiąm.7 daēuuō.dātəm.
Verse: k       iϑiiejō.8 marṣ̌aonəm.
Verse: l       zauruua. duždąfəδrō.9 kərənaoiti:
Verse: m       būiti. daēuuō.
Verse: n       driβiš. daēuuō.
Verse: o       daiβiš.10 daēuuō.
Verse: p       kasuuīš.11 daēuuō.
Verse: q       paitiṣ̌ō.12 daēuuō.
Verse: r          daēuuanąm. daēuuōtəmō.

Paragraph: 44 
Verse: a    daēuuō. uiti. dauuata.1 hō.
Verse: b       yō. duždā̊. aŋrō. mainiiuš. pouru.mahrkō:
Verse: c    cim.2 hąm.bərəϑa.3 hąm.bāraiiama.4
Verse: d       daēuua.5 druuaṇtō. duždā̊ŋhō.
Verse: e          arəzūrahe.6 paiti. kamərəδəm.

Paragraph: 45 
Verse: a    aduuarəṇta. adāuṇta.1
Verse: b       daēuua. druuaṇtō. duždā̊ŋhō.
Verse: c    2uruϑəṣ̌ta. adāuṇta.
Verse: d       daēuua. druuaṇtō. duždā̊ŋhō.2
Verse: e    aγąm. daoϑrīm.3 dāuṇta.4
Verse: f       daēuua. druuaṇtō. duždā̊ṇhō:
Verse: g    iməm. nō. hąm.bərəϑa.5 hąm.bāraiiama.6
Verse: h       arəzūrahe.7 paiti. kamərəϑəm.

Paragraph: 46 
Verse: a    zātō. bē.1 yō.2 aṣ̌auua. zaraϑuštrō.
Verse: b       nmānahe. pouruṣ̌aspahe.
Verse: c    kuua. hē. aoṣ̌ō. viṇdāma.3
Verse: d       hāu. daēuuanąm. snaϑō.
Verse: e       hāu. daēuuanąm. paitiiārō.
Verse: f       hāu. druxš. vīdruxš:
Verse: g    niiā̊ṇcō.4 daēuuaiiāzō.
Verse: h       nasuš. daēuuō.dātō.
Verse: i       draogō.5 miϑaoxtō.

Paragraph: 47 
Verse: a    adāuṇta.1 aduuarəṇta.2
Verse: b       daēuua. druuaṇtō. duždā̊ŋhō.
Verse: c          būnəm.3 aŋhə̄uš. təmaŋhahe.
Verse: d             yat̰. ərəγatō. daoždaŋuhahe.4

Verse: Q1a    aṣ̌əm. vohū. vahištəm. astī::
Verse: Q1b    uštā. astī. uštā. ahmāi.
Verse: Q1c    hiiat̰. aṣ̌āi. vahištāi. aṣ̌əm.::


Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.