აღჴდა მოსე არაბოთდ მოაბით მთასა მას ზედა ნაბაის, თხემსა ზედა ფასგასა, რომელ არს პირისპირ იერიქოსა. და უჩუენა უფალმან ქუეყანა იგი გალადისა ვიდრე დანადმდე,
და ყოველი ქუეყანა ლეფთალემისი და ყოველი Page of ms. E: 97V ქუეყანა ეფრემისი და მანასესი და ყოველი იგი ქუეყანა იუდასი ვიდრე დასასრულამდე ზღჳსა,
და ყოველი იგი ქუეყანა ნეფთალემისა და მანასესი, და ყოველი იგი ქუეყანა ნეფთალიმისა და ლიანასინისა და ყოველი ქუეყანა იუდასი ვიდრე დასასრულამდე ზღჳსა,
ყოველი იგი უდაბნო და ყოველი გარემო სოფლები, რომელი იყო ველთა მათ იერიქოსთა, ქალაქები დანაკისკუდოვანი ვიდრე სეგორადმდე.
ჰრქუა უფალმან მოსეს: ესე არს ქუეყანა იგი, რომელ ვეფუცე აბრაჰამს, ისაკს და იაკობს და ვარქუ, ვითარმედ: ნათესავსა შენსა მივსცე ეგე. აწ, ეგერა, გიჩუენე შენ. თუალთა შენთა იხილეს, ხოლო არა შეხჳღე შენ.
და მოკუდა მოსე, მონა ღმრთისა, ქუეყანასა მოაბისასა სიტყჳთა უფლისათა.
და დაჰფლეს იგი გეეზს, მახლობელად სახლსა მას ფოგორისსა. არავინ იცის საფლავი მისი მოდღე\ნდელად Page of ms. E: 98R დღედმდე.
იყო მოსე ვითარ ასოცის წლის, რაჟამს მოკუდა, და არა დაუბრყჳლდეს თუალნი მისნი და არცა იცვალა ქმნულება პირისა მისისა.
და დაიტირეს მოსე ძეთა მათ ისრაელისათა არაბოთს მოაბისასა, კიდესა იორდანისა მდინარისასა, პირისპირ იერიქოსა. და დაიტირეს იგი ოცდაათ დღე, და აღასრულნეს დღენი იგი ტირილისანი და გლოვისანი მოსესთჳს.
და ისო, ძე ნავესი, აღივსო სულითა სიბრძნისათა, რამეთუ მოსე დაასხნა ჴელნი მისნი მას ზედა, და ერჩდეს მას ყოველნი ძენი ისრაელისანი, და ყვეს, რაცა უბრძანა უფალმან მოსეს.
და არდარა აღდგა წინაწარმეტყუელი Page of ms. E: 98V შორის ისრაელსა მსგავსად მოსესსა, რომელი უფალსა შეესწავა პირისპირ
ყოვლითა მით სასწაულებითა და ნიშებითა, ვითარ-იგი მიავლინა უფალმან ყოფად სასწაულთა ქუეყანასა მას ეგჳპტისასა ფარაოს ზედა და ყოველთა მონათა მისთა და ყოველსა ქუეყანასა მისსა,
ჴელი მტკიცე და მკლავი მაღალი, რომელ ყო მოსე წინაშე ყოვლისა ისრაელისა.