TITUS
Novum Testamentum graece
Part No. 147
Previous part

Chapter: 12 
Verse: 1    Περὶ δὲ τῶν πνευματικῶν, ἀδελϕοί, οὐ ϑέλω ὑμᾶς ἀγνοεῖν.
Verse: 2    Οἴδατε ὅτι ὅτε ἔϑνη ἦτε πρὸς τὰ εἴδωλα τὰ ἄϕωνα ὡς ἂν ἤγεσϑε ἀπαγόμενοι.
Verse: 3    διὸ γνωρίζω ὑμῖν ὅτι οὐδεὶς ἐν πνεύματι ϑεοῦ λαλῶν λέγει, ᾽Ανάϑεμα ᾽Ιησοῦς, καὶ οὐδεὶς δύναται εἰπεῖν, Κύριος ᾽Ιησοῦς, εἰ μὴ ἐν πνεύματι ἁγίῳ.
Verse: 4    Διαιρέσεις δὲ χαρισμάτων εἰσίν, τὸ δὲ αὐτὸ πνεῦμα·
Verse: 5    καὶ διαιρέσεις διακονιῶν εἰσιν, καὶ ὁ αὐτὸς κύριος·
Verse: 6    καὶ διαιρέσεις ἐνεργημάτων εἰσίν, ὁ δὲ αὐτὸς ϑεός, ὁ ἐνεργῶν τὰ πάντα ἐν πᾶσιν.
Verse: 7    ἑκάστῳ δὲ δίδοται ἡ ϕανέρωσις τοῦ πνεύματος πρὸς τὸ συμϕέρον.
Verse: 8    ᾧ μὲν γὰρ διὰ τοῦ πνεύματος δίδοται λόγος σοϕίας, ἄλλῳ δὲ λόγος γνώσεως κατὰ τὸ αὐτὸ πνεῦμα,
Verse: 9    ἑτέρῳ πίστις ἐν τῷ αὐτῷ πνεύματι, ἄλλῳ δὲ χαρίσματα ἰαμάτων ἐν τῷ ἑνὶ πνεύματι,
Verse: 10    ἄλλῳ δὲ ἐνεργήματα δυνάμεων, ἄλλῳ [δὲ] προϕητεία, ἄλλῳ [δὲ] διακρίσεις πνευμάτων, ἑτέρῳ γένη γλωσσῶν, ἄλλῳ δὲ ἑρμηνεία γλωσσῶν·
Verse: 11    πάντα δὲ ταῦτα ἐνεργεῖ τὸ ἓν καὶ τὸ αὐτὸ πνεῦμα, διαιροῦν ἰδίᾳ ἑκάστῳ καϑὼς βούλεται.
Verse: 12    Καϑάπερ γὰρ τὸ σῶμα ἕν ἐστιν καὶ μέλη πολλὰ ἔχει, πάντα δὲ τὰ μέλη τοῦ σώματος πολλὰ ὄντα ἕν ἐστιν σῶμα, οὕτως καὶ ὁ Χριστός·
Verse: 13    καὶ γὰρ ἐν ἑνὶ πνεύματι ἡμεῖς πάντες εἰς ἓν σῶμα ἐβαπτίσϑημεν, εἴτε ᾽Ιουδαῖοι εἴτε ῞Ελληνες, εἴτε δοῦλοι εἴτε ἐλεύϑεροι, καὶ πάντες ἓν πνεῦμα ἐποτίσϑημεν.
Verse: 14    καὶ γὰρ τὸ σῶμα οὐκ ἔστιν ἓν μέλος ἀλλὰ πολλά.
Verse: 15    ἐὰν εἴπῃ ὁ πούς, ῞Οτι οὐκ εἰμὶ χείρ, οὐκ εἰμὶ ἐκ τοῦ σώματος, οὐ παρὰ τοῦτο οὐκ ἔστιν ἐκ τοῦ σώματος·
Verse: 16    καὶ ἐὰν εἴπῃ τὸ οὖς, ῞Οτι οὐκ εἰμὶ ὀϕϑαλμός, οὐκ εἰμὶ ἐκ τοῦ σώματος, οὐ παρὰ τοῦτο οὐκ ἔστιν ἐκ τοῦ σώματος·
Verse: 17    εἰ ὅλον τὸ σῶμα ὀϕϑαλμός, ποῦ ἡ ἀκοή; εἰ ὅλον ἀκοή, ποῦ ἡ ὄσϕρησις;
Verse: 18    νυνὶ δὲ ὁ ϑεὸς ἔϑετο τὰ μέλη, ἓν ἕκαστον αὐτῶν, ἐν τῷ σώματι καϑὼς ἠϑέλησεν.
Verse: 19    εἰ δὲ ἦν τὰ πάντα ἓν μέλος, ποῦ τὸ σῶμα;
Verse: 20    νῦν δὲ πολλὰ μὲν μέλη, ἓν δὲ σῶμα.
Verse: 21    οὐ δύναται δὲ ὁ ὀϕϑαλμὸς εἰπεῖν τῇ χειρί, Χρείαν σου οὐκ ἔχω, ἢ πάλιν ἡ κεϕαλὴ τοῖς ποσίν, Χρείαν ὑμῶν οὐκ ἔχω·
Verse: 22    ἀλλὰ πολλῷ μᾶλλον τὰ δοκοῦντα μέλη τοῦ σώματος ἀσϑενέστερα ὑπάρχειν ἀναγκαῖά ἐστιν,
Verse: 23    καὶ ἃ δοκοῦμεν ἀτιμότερα εἶναι τοῦ σώματος, τούτοις τιμὴν περισσοτέραν περιτίϑεμεν, καὶ τὰ ἀσχήμονα ἡμῶν εὐσχημοσύνην περισσοτέραν ἔχει,
Verse: 24    τὰ δὲ εὐσχήμονα ἡμῶν οὐ χρείαν ἔχει. ἀλλὰ ὁ ϑεὸς συνεκέρασεν τὸ σῶμα, τῷ ὑστερουμένῳ περισσοτέραν δοὺς τιμήν,
Verse: 25    ἵνα μὴ ᾖ σχίσμα ἐν τῷ σώματι, ἀλλὰ τὸ αὐτὸ ὑπὲρ ἀλλήλων μεριμνῶσιν τὰ μέλη.
Verse: 26    καὶ εἴτε πάσχει ἓν μέλος, συμπάσχει πάντα τὰ μέλη· εἴτε δοξάζεται ἓν μέλος, συγχαίρει πάντα τὰ μέλη.
Verse: 27    ῾Υμεῖς δέ ἐστε σῶμα Χριστοῦ καὶ μέλη ἐκ μέρους.
Verse: 28    καὶ οὓς μὲν ἔϑετο ὁ ϑεὸς ἐν τῇ ἐκκλησίᾳ πρῶτον ἀποστόλους, δεύτερον προϕήτας, τρίτον διδασκάλους, ἔπειτα δυνάμεις, ἔπειτα χαρίσματα ἰαμάτων, ἀντιλήμψεις, κυβερνήσεις, γένη γλωσσῶν.
Verse: 29    μὴ πάντες ἀπόστολοι; μὴ πάντες προϕῆται; μὴ πάντες διδάσκαλοι; μὴ πάντες δυνάμεις;
Verse: 30    μὴ πάντες χαρίσματα ἔχουσιν ἰαμάτων; μὴ πάντες γλώσσαις λαλοῦσιν; μὴ πάντες διερμηνεύουσιν;
Verse: 31    ζηλοῦτε δὲ τὰ χαρίσματα τὰ μείζονα.
   / Καὶ ἔτι καϑ' ὑπερβολὴν ὁδὸν ὑμῖν δείκνυμι.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.