TITUS
Novum Testamentum graece
Part No. 139
Previous part

Chapter: 4 
Verse: 1    Οὕτως ἡμᾶς λογιζέσϑω ἄνϑρωπος ὡς ὑπηρέτας Χριστοῦ καὶ οἰκονόμους μυστηρίων ϑεοῦ.
Verse: 2    ὧδε λοιπὸν ζητεῖται ἐν τοῖς οἰκονόμοις ἵνα πιστός τις εὑρεϑῇ.
Verse: 3    ἐμοὶ δὲ εἰς ἐλάχιστόν ἐστιν ἵνα ὑϕ' ὑμῶν ἀνακριϑῶ ἢ ὑπὸ ἀνϑρωπίνης ἡμέρας· ἀλλ' οὐδὲ ἐμαυτὸν ἀνακρίνω·
Verse: 4    οὐδὲν γὰρ ἐμαυτῷ σύνοιδα, ἀλλ' οὐκ ἐν τούτῳ δεδικαίωμαι, ὁ δὲ ἀνακρίνων με κύριός ἐστιν.
Verse: 5    ὥστε μὴ πρὸ καιροῦ τι κρίνετε, ἕως ἂν ἔλϑῃ ὁ κύριος, ὃς καὶ ϕωτίσει τὰ κρυπτὰ τοῦ σκότους καὶ ϕανερώσει τὰς βουλὰς τῶν καρδιῶν· καὶ τότε ὁ ἔπαινος γενήσεται ἑκάστῳ ἀπὸ τοῦ ϑεοῦ.
Verse: 6    Ταῦτα δέ, ἀδελϕοί, μετεσχημάτισα εἰς ἐμαυτὸν καὶ ᾽Απολλῶν δι' ὑμᾶς, ἵνα ἐν ἡμῖν μάϑητε τὸ Μὴ ὑπὲρ ἃ γέγραπται, ἵνα μὴ εἷς ὑπὲρ τοῦ ἑνὸς ϕυσιοῦσϑε κατὰ τοῦ ἑτέρου.
Verse: 7    τίς γάρ σε διακρίνει; τί δὲ ἔχεις ὃ οὐκ ἔλαβες; εἰ δὲ καὶ ἔλαβες, τί καυχᾶσαι ὡς μὴ λαβών;
Verse: 8    ἤδη κεκορεσμένοι ἐστέ· ἤδη ἐπλουτήσατε· χωρὶς ἡμῶν ἐβασιλεύσατε· καὶ ὄϕελόν γε ἐβασιλεύσατε, ἵνα καὶ ἡμεῖς ὑμῖν συμβασιλεύσωμεν.
Verse: 9    δοκῶ γάρ, ὁ ϑεὸς ἡμᾶς τοὺς ἀποστόλους ἐσχάτους ἀπέδειξεν ὡς ἐπιϑανατίους, ὅτι ϑέατρον ἐγενήϑημεν τῷ κόσμῳ καὶ ἀγγέλοις καὶ ἀνϑρώποις.
Verse: 10    ἡμεῖς μωροὶ διὰ Χριστόν, ὑμεῖς δὲ ϕρόνιμοι ἐν Χριστῷ· ἡμεῖς ἀσϑενεῖς, ὑμεῖς δὲ ἰσχυροί· ὑμεῖς ἔνδοξοι, ἡμεῖς δὲ ἄτιμοι.
Verse: 11    ἄχρι τῆς ἄρτι ὥρας καὶ πεινῶμεν καὶ διψῶμεν καὶ γυμνιτεύομεν καὶ κολαϕιζόμεϑα καὶ ἀστατοῦμεν
Verse: 12    καὶ κοπιῶμεν ἐργαζόμενοι ταῖς ἰδίαις χερσίν· λοιδορούμενοι εὐλογοῦμεν, διωκόμενοι ἀνεχόμεϑα,
Verse: 13    δυσϕημούμενοι παρακαλοῦμεν· ὡς περικαϑάρματα τοῦ κόσμου ἐγενήϑημεν, πάντων περίψημα, ἕως ἄρτι.
Verse: 14    Οὐκ ἐντρέπων ὑμᾶς γράϕω ταῦτα, ἀλλ' ὡς τέκνα μου ἀγαπητὰ νουϑετῶν·
Verse: 15    ἐὰν γὰρ μυρίους παιδαγωγοὺς ἔχητε ἐν Χριστῷ, ἀλλ' οὐ πολλοὺς πατέρας, ἐν γὰρ Χριστῷ ᾽Ιησοῦ διὰ τοῦ εὐαγγελίου ἐγὼ ὑμᾶς ἐγέννησα.
Verse: 16    παρακαλῶ οὖν ὑμᾶς, μιμηταί μου γίνεσϑε.
Verse: 17    διὰ τοῦτο ἔπεμψα ὑμῖν Τιμόϑεον, ὅς ἐστίν μου τέκνον ἀγαπητὸν καὶ πιστὸν ἐν κυρίῳ, ὃς ὑμᾶς ἀναμνήσει τὰς ὁδούς μου τὰς ἐν Χριστῷ [᾽Ιησοῦ], καϑὼς πανταχοῦ ἐν πάσῃ ἐκκλησίᾳ διδάσκω.
Verse: 18    ὡς μὴ ἐρχομένου δέ μου πρὸς ὑμᾶς ἐϕυσιώϑησάν τινες·
Verse: 19    ἐλεύσομαι δὲ ταχέως πρὸς ὑμᾶς, ἐὰν ὁ κύριος ϑελήσῃ, καὶ γνώσομαι οὐ τὸν λόγον τῶν πεϕυσιωμένων ἀλλὰ τὴν δύναμιν,
Verse: 20    οὐ γὰρ ἐν λόγῳ ἡ βασιλεία τοῦ ϑεοῦ ἀλλ' ἐν δυνάμει.
Verse: 21    τί ϑέλετε; ἐν ῥάβδῳ ἔλϑω πρὸς ὑμᾶς, ἢ ἐν ἀγάπῃ πνεύματί τε πραύτητος;

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.