TITUS
Novum Testamentum graece
Part No. 175
Previous part

Chapter: 5 
Verse: 1    γίνεσϑε οὖν μιμηταὶ τοῦ ϑεοῦ, ὡς τέκνα ἀγαπητά,
Verse: 2    καὶ περιπατεῖτε ἐν ἀγάπῃ, καϑὼς καὶ ὁ Χριστὸς ἠγάπησεν ἡμᾶς καὶ παρέδωκεν ἑαυτὸν ὑπὲρ ἡμῶν προσϕορὰν καὶ ϑυσίαν τῷ ϑεῷ εἰς ὀσμὴν εὐωδίας.
Verse: 3    πορνεία δὲ καὶ ἀκαϑαρσία πᾶσα ἢ πλεονεξία μηδὲ ὀνομαζέσϑω ἐν ὑμῖν, καϑὼς πρέπει ἁγίοις,
Verse: 4    καὶ αἰσχρότης καὶ μωρολογία ἢ εὐτραπελία, ἃ οὐκ ἀνῆκεν, ἀλλὰ μᾶλλον εὐχαριστία.
Verse: 5    τοῦτο γὰρ ἴστε γινώσκοντες ὅτι πᾶς πόρνος ἢ ἀκάϑαρτος ἢ πλεονέκτης, ὅ ἐστιν εἰδωλολάτρης, οὐκ ἔχει κληρονομίαν ἐν τῇ βασιλείᾳ τοῦ Χριστοῦ καὶ ϑεοῦ.
Verse: 6    Μηδεὶς ὑμᾶς ἀπατάτω κενοῖς λόγοις, διὰ ταῦτα γὰρ ἔρχεται ἡ ὀργὴ τοῦ ϑεοῦ ἐπὶ τοὺς υἱοὺς τῆς ἀπειϑείας.
Verse: 7    μὴ οὖν γίνεσϑε συμμέτοχοι αὐτῶν·
Verse: 8    ἦτε γάρ ποτε σκότος, νῦν δὲ ϕῶς ἐν κυρίῳ· ὡς τέκνα ϕωτὸς περιπατεῖτε
Verse: 9    ὁ γὰρ καρπὸς τοῦ ϕωτὸς ἐν πάσῃ ἀγαϑωσύνῃ καὶ δικαιοσύνῃ καὶ ἀληϑείᾳ
Verse: 10    δοκιμάζοντες τί ἐστιν εὐάρεστον τῷ κυρίῳ·
Verse: 11    καὶ μὴ συγκοινωνεῖτε τοῖς ἔργοις τοῖς ἀκάρποις τοῦ σκότους, μᾶλλον δὲ καὶ ἐλέγχετε,
Verse: 12    τὰ γὰρ κρυϕῇ γινόμενα ὑπ' αὐτῶν αἰσχρόν ἐστιν καὶ λέγειν·
Verse: 13    τὰ δὲ πάντα ἐλεγχόμενα ὑπὸ τοῦ ϕωτὸς ϕανεροῦται,
Verse: 14    πᾶν γὰρ τὸ ϕανερούμενον ϕῶς ἐστιν. διὸ λέγει, ῎Εγειρε, ὁ καϑεύδων, καὶ ἀνάστα ἐκ τῶν νεκρῶν, καὶ ἐπιϕαύσει σοι ὁ Χριστός.
Verse: 15    Βλέπετε οὖν ἀκριβῶς πῶς περιπατεῖτε, μὴ ὡς ἄσοϕοι ἀλλ' ὡς σοϕοί,
Verse: 16    ἐξαγοραζόμενοι τὸν καιρόν, ὅτι αἱ ἡμέραι πονηραί εἰσιν.
Verse: 17    διὰ τοῦτο μὴ γίνεσϑε ἄϕρονες, ἀλλὰ συνίετε τί τὸ ϑέλημα τοῦ κυρίου.
Verse: 18    καὶ μὴ μεϑύσκεσϑε οἴνῳ, ἐν ᾧ ἐστιν ἀσωτία, ἀλλὰ πληροῦσϑε ἐν πνεύματι,
Verse: 19    λαλοῦντες ἑαυτοῖς [ἐν] ψαλμοῖς καὶ ὕμνοις καὶ ᾠδαῖς πνευματικαῖς, ᾄδοντες καὶ ψάλλοντες τῇ καρδίᾳ ὑμῶν τῷ κυρίῳ,
Verse: 20    εὐχαριστοῦντες πάντοτε ὑπὲρ πάντων ἐν ὀνόματι τοῦ κυρίου ἡμῶν ᾽Ιησοῦ Χριστοῦ τῷ ϑεῷ καὶ πατρί,
Verse: 21    ὑποτασσόμενοι ἀλλήλοις ἐν ϕόβῳ Χριστοῦ.
Verse: 22    Αἱ γυναῖκες τοῖς ἰδίοις ἀνδράσιν ὡς τῷ κυρίῳ,
Verse: 23    ὅτι ἀνήρ ἐστιν κεϕαλὴ τῆς γυναικὸς ὡς καὶ ὁ Χριστὸς κεϕαλὴ τῆς ἐκκλησίας, αὐτὸς σωτὴρ τοῦ σώματος.
Verse: 24    ἀλλὰ ὡς ἡ ἐκκλησία ὑποτάσσεται τῷ Χριστῷ, οὕτως καὶ αἱ γυναῖκες τοῖς ἀνδράσιν ἐν παντί.
Verse: 25    Οἱ ἄνδρες, ἀγαπᾶτε τὰς γυναῖκας, καϑὼς καὶ ὁ Χριστὸς ἠγάπησεν τὴν ἐκκλησίαν καὶ ἑαυτὸν παρέδωκεν ὑπὲρ αὐτῆς,
Verse: 26    ἵνα αὐτὴν ἁγιάσῃ καϑαρίσας τῷ λουτρῷ τοῦ ὕδατος ἐν ῥήματι,
Verse: 27    ἵνα παραστήσῃ αὐτὸς ἑαυτῷ ἔνδοξον τὴν ἐκκλησίαν, μὴ ἔχουσαν σπίλον ἢ ῥυτίδα ἤ τι τῶν τοιούτων, ἀλλ' ἵνα ᾖ ἁγία καὶ ἄμωμος.
Verse: 28    οὕτως ὀϕείλουσιν καὶ οἱ ἄνδρες ἀγαπᾶν τὰς ἑαυτῶν γυναῖκας ὡς τὰ ἑαυτῶν σώματα. ὁ ἀγαπῶν τὴν ἑαυτοῦ γυναῖκα ἑαυτὸν ἀγαπᾷ,
Verse: 29    οὐδεὶς γάρ ποτε τὴν ἑαυτοῦ σάρκα ἐμίσησεν, ἀλλὰ ἐκτρέϕει καὶ ϑάλπει αὐτήν, καϑὼς καὶ ὁ Χριστὸς τὴν ἐκκλησίαν,
Verse: 30    ὅτι μέλη ἐσμὲν τοῦ σώματος αὐτοῦ.
Verse: 31    ἀντὶ τούτου καταλείψει ἄνϑρωπος τὸν πατέρα καὶ τὴν μητέρα καὶ προσκολληϑήσεται πρὸς τὴν γυναῖκα αὐτοῦ, καὶ ἔσονται οἱ δύο εἰς σάρκα μίαν.
Verse: 32    τὸ μυστήριον τοῦτο μέγα ἐστίν, ἐγὼ δὲ λέγω εἰς Χριστὸν καὶ εἰς τὴν ἐκκλησίαν.
Verse: 33    πλὴν καὶ ὑμεῖς οἱ καϑ' ἕνα ἕκαστος τὴν ἑαυτοῦ γυναῖκα οὕτως ἀγαπάτω ὡς ἑαυτόν, ἡ δὲ γυνὴ ἵνα ϕοβῆται τὸν ἄνδρα.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.