TITUS
Novum Testamentum graece
Part No. 128
Previous part

Chapter: 9 
Verse: 1    ᾽Αλήϑειαν λέγω ἐν Χριστῷ, οὐ ψεύδομαι, συμμαρτυρούσης μοι τῆς συνειδήσεώς μου ἐν πνεύματι ἁγίῳ,
Verse: 2    ὅτι λύπη μοί ἐστιν μεγάλη καὶ ἀδιάλειπτος ὀδύνη τῇ καρδίᾳ μου.
Verse: 3    ηὐχόμην γὰρ ἀνάϑεμα εἶναι αὐτὸς ἐγὼ ἀπὸ τοῦ Χριστοῦ ὑπὲρ τῶν ἀδελϕῶν μου τῶν συγγενῶν μου κατὰ σάρκα,
Verse: 4    οἵτινές εἰσιν ᾽Ισραηλῖται, ὧν ἡ υἱοϑεσία καὶ ἡ δόξα καὶ αἱ διαϑῆκαι καὶ ἡ νομοϑεσία καὶ ἡ λατρεία καὶ αἱ ἐπαγγελίαι,
Verse: 5    ὧν οἱ πατέρες, καὶ ἐξ ὧν ὁ Χριστὸς τὸ κατὰ σάρκα· ὁ ὢν ἐπὶ πάντων ϑεὸς εὐλογητὸς εἰς τοὺς αἰῶνας, ἀμήν.
Verse: 6    Οὐχ οἷον δὲ ὅτι ἐκπέπτωκεν ὁ λόγος τοῦ ϑεοῦ. οὐ γὰρ πάντες οἱ ἐξ ᾽Ισραήλ, οὗτοι ᾽Ισραήλ·
Verse: 7    οὐδ' ὅτι εἰσὶν σπέρμα ᾽Αβραάμ, πάντες τέκνα, ἀλλ', ᾽Εν ᾽Ισαὰκ κληϑήσεταί σοι σπέρμα.
Verse: 8    τοῦτ' ἔστιν, οὐ τὰ τέκνα τῆς σαρκὸς ταῦτα τέκνα τοῦ ϑεοῦ, ἀλλὰ τὰ τέκνα τῆς ἐπαγγελίας λογίζεται εἰς σπέρμα·
Verse: 9    ἐπαγγελίας γὰρ ὁ λόγος οὗτος, Κατὰ τὸν καιρὸν τοῦτον ἐλεύσομαι καὶ ἔσται τῇ Σάρρᾳ υἱός.
Verse: 10    οὐ μόνον δέ, ἀλλὰ καὶ ῾Ρεβέκκα ἐξ ἑνὸς κοίτην ἔχουσα, ᾽Ισαὰκ τοῦ πατρὸς ἡμῶν·
Verse: 11    μήπω γὰρ γεννηϑέντων μηδὲ πραξάντων τι ἀγαϑὸν ἢ ϕαῦλον, ἵνα ἡ κατ' ἐκλογὴν πρόϑεσις τοῦ ϑεοῦ μένῃ,
Verse: 12    οὐκ ἐξ ἔργων ἀλλ' ἐκ τοῦ καλοῦντος, ἐρρέϑη αὐτῇ ὅτι ῾Ο μείζων δουλεύσει τῷ ἐλάσσονι·
Verse: 13    καϑὼς γέγραπται, Τὸν ᾽Ιακὼβ ἠγάπησα, τὸν δὲ ᾽Ησαῦ ἐμίσησα.
Verse: 14    Τί οὖν ἐροῦμεν; μὴ ἀδικία παρὰ τῷ ϑεῷ; μὴ γένοιτο·
Verse: 15    τῷ Μωϋσεῖ γὰρ λέγει, ᾽Ελεήσω ὃν ἂν ἐλεῶ, καὶ οἰκτιρήσω ὃν ἂν οἰκτίρω.
Verse: 16    ἄρα οὖν οὐ τοῦ ϑέλοντος οὐδὲ τοῦ τρέχοντος, ἀλλὰ τοῦ ἐλεῶντος ϑεοῦ.
Verse: 17    λέγει γὰρ ἡ γραϕὴ τῷ Φαραὼ ὅτι Εἰς αὐτὸ τοῦτο ἐξήγειρά σε ὅπως ἐνδείξωμαι ἐν σοὶ τὴν δύναμίν μου, καὶ ὅπως διαγγελῇ τὸ ὄνομά μου ἐν πάσῃ τῇ γῇ.
Verse: 18    ἄρα οὖν ὃν ϑέλει ἐλεεῖ, ὃν δὲ ϑέλει σκληρύνει.
Verse: 19    ᾽Ερεῖς μοι οὖν, Τί [οὖν] ἔτι μέμϕεται; τῷ γὰρ βουλήματι αὐτοῦ τίς ἀνϑέστηκεν;
Verse: 20    ὦ ἄνϑρωπε, μενοῦνγε σὺ τίς εἶ ὁ ἀνταποκρινόμενος τῷ ϑεῷ; μὴ ἐρεῖ τὸ πλάσμα τῷ πλάσαντι,Τί με ἐποίησας οὕτως;
Verse: 21    ἢ οὐκ ἔχει ἐξουσίαν ὁ κεραμεὺς τοῦ πηλοῦ ἐκ τοῦ αὐτοῦ ϕυράματος ποιῆσαι ὃ μὲν εἰς τιμὴν σκεῦος, ὃ δὲ εἰς ἀτιμίαν;
Verse: 22    εἰ δὲ ϑέλων ὁ ϑεὸς ἐνδείξασϑαι τὴν ὀργὴν καὶ γνωρίσαι τὸ δυνατὸν αὐτοῦ ἤνεγκεν ἐν πολλῇ μακροϑυμίᾳ σκεύη ὀργῆς κατηρτισμένα εἰς ἀπώλειαν,
Verse: 23    καὶ ἵνα γνωρίσῃ τὸν πλοῦτον τῆς δόξης αὐτοῦ ἐπὶ σκεύη ἐλέους, ἃ προητοίμασεν εἰς δόξαν,
Verse: 24    οὓς καὶ ἐκάλεσεν ἡμᾶς οὐ μόνον ἐξ ᾽Ιουδαίων ἀλλὰ καὶ ἐξ ἐϑνῶν;
Verse: 25    ὡς καὶ ἐν τῷ ῾Ωσηὲ λέγει, Καλέσω τὸν οὐ λαόν μου λαόν μου καὶ τὴν οὐκ ἠγαπημένην ἠγαπημένην·
Verse: 26    καὶ ἔσται ἐν τῷ τόπῳ οὗ ἐρρέϑη αὐτοῖς, Οὐ λαός μου ὑμεῖς, ἐκεῖ κληϑήσονται υἱοὶ ϑεοῦ ζῶντος.
Verse: 27    ᾽Ησαίας δὲ κράζει ὑπὲρ τοῦ ᾽Ισραήλ, ᾽Εὰν ᾖ ὁ ἀριϑμὸς τῶν υἱῶν ᾽Ισραὴλ ὡς ἡ ἄμμος τῆς ϑαλάσσης, τὸ ὑπόλειμμα σωϑήσεται·
Verse: 28    λόγον γὰρ συντελῶν καὶ συντέμνων ποιήσει κύριος ἐπὶ τῆς γῆς.
Verse: 29    καὶ καϑὼς προείρηκεν ᾽Ησαίας, Εἰ μὴ κύριος Σαβαὼϑ ἐγκατέλιπεν ἡμῖν σπέρμα, ὡς Σόδομα ἂν ἐγενήϑημεν καὶ ὡς Γόμορρα ἂν ὡμοιώϑημεν.
Verse: 30    Τί οὖν ἐροῦμεν; ὅτι ἔϑνη τὰ μὴ διώκοντα δικαιοσύνην κατέλαβεν δικαιοσύνην, δικαιοσύνην δὲ τὴν ἐκ πίστεως·
Verse: 31    ᾽Ισραὴλ δὲ διώκων νόμον δικαιοσύνης εἰς νόμον οὐκ ἔϕϑασεν.
Verse: 32    διὰ τί; ὅτι οὐκ ἐκ πίστεως ἀλλ' ὡς ἐξ ἔργων· προσέκοψαν τῷ λίϑῳ τοῦ προσκόμματος,
Verse: 33    καϑὼς γέγραπται, ᾽Ιδοὺ τίϑημι ἐν Σιὼν λίϑον προσκόμματος καὶ πέτραν σκανδάλου, καὶ ὁ πιστεύων ἐπ' αὐτῷ οὐ καταισχυνϑήσεται.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.