ამას იტყჳს უფალი, ისმინენ<ი>თ სიტყუანი ესე დიაკეულთა ბასანისათა, რომელნი ხართ მთასა სამარიაჲსასა, რომელნი ჰმძლავრობთ გლახაკთა, და დასთრგუნავთ დავრდომილთა, რომელნი იტყჳედ უფალთა მათთა; მომეცით ჩუენ ღჳნოჲ, რაჲთა ვსუათ.
ფუცავს უფალი უფალი წმიდათა მისთა, რამეთუ ესერა დღენი მოვლენან თქუენ ზედა, და მოგიყვანნე თქუენ საჭურველებითა, და თქუენთანანი იგი სიავებად ქუეშე შესაგზებელად დაასხნენ.
და შეგიყვანნენ Page of ms. J: B8r თქუენ შიშუელნი წინაშე ერთი ერთისა, და განსცჳვეთ თქუენ/ მთასა მას რემანისასა, იტყჳს უფალი.
რამეთუ შეხუედით ბეთელდ, და უშჯულოჲ ჰქმენით, და გალგალას განამრავლეთ უღმრთოებაჲ, და მოიღეთ განთიად მსხუერპლი თქუენი მესამესა დღესა ათეული თქუენი.
და აღმოიკითხეს გარეშე შჯული, და აუწ<ყ>ოდეს აღსაარებასა; მიუთხართ, რამეთუ ესე შეიყუარეს ძეთა ისრაჱლისათა, იტყჳს უფალი ღმერთი.
და მე მოგცე თქუენ მოლბობაჲ კბილთაჲ ყოველთა შინა ქალაქთა თქუენთა, და ნაკლულევანებაჲ პურისაჲ და ყოველთა ადგილთა თქუენთა, და არა მოიქეცით ჩემდა, იტყჳს უფალი.
და მე დავაყენე თქუენგან წჳმაჲ უწინარჱს სამისა თჳსა სდულისაჲსა, და ვაწჳმო ერთსა ზედა ქალაქსა, და ერთსა ზედა ქალაქსა არა ვაწჳმო. ნაწილი ერთი დილტოდის, და ნაწილსა ზედა, რომელსა <არა> ვაწჳმო, განჴმეს.
და შეკრბენ ორნი და სამნი ერთსა ქალაქსა სუმად წყლისა, და ვერ განძღენ, და არა მოიქეცით ჩემდა, იტყჳს უფალი.
დაგც<ნ>ე თქუენ მჴურვალებითა და გუინითა. განამრავლეთ მტილები თქუენი და ვენაჴები თქუენი, და ლეღოვანი თქუენი და ზეთის-ხილოვანი თქუენი შეჭამა ჭიამან, და არცა ესრეთ მოიქეცით ჩემდა, იტყჳს უფალი.
მოვავლინე თქუენდა სიკუდილი გზასა მას ეგჳპტისასა, მოვსრენ მახჳლითა ჭაბუკნი თქუენნი, ტყუენვით ცხენები თქუენი, და აღმოვიყვანე ცეცხლითა ბანაკი თქუენი რისხვითა თქუენითა, და არცა ესრჱთ მოიქეცით ჩემდა, იტყჳს უფალი.
დაგაქციენ თქუენ, ვითარცა დააქცია ღმერთმან სოდომაჲ და გომორაჲ, და იქმნენით ვითარცა მუგუზნი გამოტაცებულნი ცეცხლისაგან, და არცა ესრეთ მოიქეცით ჩემდა, იტყჳს უფალი.
ამისთჳს ესრეთ გიყო შენ ისრაჱლ, გარნა Page of ms. J: B8v რამეთუ ესრეთ გიყო შენ; განემზადე ხადიდ/ ღმრთისა შენისა ისრაჱლ.
რამეთუ მე ესერა განვამტკიცო ქუხილი, და დავჰბადო სული, და მიუთხრა კაცთა ცხებული მისი. შევქმენ ცისკარი და ნისლი და შევიდე სიმაღლესა ქუეყანისასა, უფალი ღმერთი ყოვლისა-მპყრობელი სახელი მისი.:
