ეტყოდა უფალი მოსეს და ჰრქუა:
ეტყოდე შენ ძეთა ისრაჱლისათა: მიიქცედ და განეწყვნედ იგინი წინაშე ღელესა, შოვრის მაგდალოსა და შოვრის ზღუასა მას, პირისპირ ბესეფონსა, წინაშე მათსა განეწყო ზღუად კერძო;
ჰრქუას ფარაო ერსა თჳსსა: შესცთეს ძენი ისრაჱლისანი ქუეყანასა მას, რამეთუ შეეყენნეს იგინი უდაბნოსა მას.
თქუა უფალმან: მე განვაფიცხო გული ფარაოჲსი და ღევნა-უყოს კუალსა მათსა. და ვიდიდო მე ფარაოჲს ზედა და ყოველსა ერსა მისსა და გულისხმა-ყონ ეგჳპტელთა, რამეთუ მე ვარ ღმერთი. და მათ ყვეს ეგრე.
უთხრეს მეფესა ეგჳპტისასა, ვითარმედ: ივლტოდა ერი იგი. და გარდაიქცა Page of ms. O: 92v გული ფარაოჲსი და მსახურთა მისთაჲ ერისა მის და თქუეს: რაჲ ესე ვყავთ, რამეთუ განუტევენით ძენი ისრაჱლისანი, რაჲთა არა გუმონებდენ ჩუენ?
აღაგო ფარაო ეტლები თჳსი და ყოველი ერი თჳსი წარიყვანა მის თანა.
აღიგო ექუსასი ეტლი რჩეული თჳსი და ყოველი ცხენები ეგჳპტისაჲ და ერისთავები ყოველსა ზედა.
და განაფიცხა უფალმან გული ფარაოჲსი, მეფისა ეგჳპტელთაჲსაჲ, და მსახურთა მისთაჲ და სდევდა შემდგომად ძეთა ისრაჱლისათა, ხოლო ძენი ისრაჱლისანი განვიდოდეს ჴელითა მტკიცითა.
და დევნა-უყვეს მეეგჳპტელთა მათ შემდგომად მათსა და პოვნეს იგინი ზღუასა მას ზედა დაბანაკებულნი და ყოველი ჰუნეები და ეტლები ფარაოჲსი და მჴედრები და ყოველი ერი მისი წიაღ ღელესა მას პირისპირ ბელსეფონსა.
და ფარაო მოვიდოდა. აღიხილნეს თუალნი თჳსნი ძეთა ისრაჱლისათა და იხილნეს ეგჳპტელთანიანი იგი, განწყობილ იყვნეს უკუანა კერძო მათსა. და შეეშინა ფრიად და ღაღადებდეს ძენი ისრაჱლისანი უფლისა მიმართ.
და ჰრქუეს მოსეს, ვითარმედ: არა იყოა ეგჳპტეს საფლავები, და გამომიყვანენ ჩუენ მოსიკუდიდ უდაბნოსა ზედა? რაჲ ესე მიყავ ჩუენ და გამომიყვანენ ჩუენ ეგჳპტით?
ანუ არა ესე სიტყუაჲ არსა, რომელსა გეტყოდეთ ჩუენ ეგჳპტეს და გარქუთ: მაცადე ჩუენ და ვჰმონე...
