იდომელთა ზედა. და შენ, ძეო კაცისაო, წინაწარმეტყუელებდ მთათა მიმართ ისრაჱლისათა, და არქუ მთათა მათ ისრაჱლისათა; ისმინეთ სიტყუაჲ უფლისაჲ.
ამას იტყჳს უფალი უფალი; ამისთჳს რამეთუ თქუა მტერმან შენ ზედა, ვაშა, ოჴერ საუკუნე სამკჳდრებელ ჩუენდა იქმნა.
ამისთჳს წინაწარმეტყუელებდ და თქუ; ამას იტყჳს ადონაჲ უფალი; ამისთჳს რამეთუ შეურაცხ-იქმნენით თქუენ, და საძულელ გარემოთაგან თქუენთა, რაჲთამცა იყვენით თქუენ საბრძანებელ ნეშტთა მათ წარმართთა, და იქმნენით სასიტყუელ ენათა და საყუედრელ წარმართთა, ამისთჳს, მთანო ისრაჱლისანო, ისმინეთ სიტყუაჲ უფლისაჲ.
ამას იტყჳს უფალი მთათა და ბორცუთა და ღელეთა და ჴევთა და მოოჴრებულთა და განრყუნილთა და ქალაქთა მაგათ დატევებულთა, რომელნი იქმნნეს წარტყუენულ და სათრგუნველ ყოველთაგან ნეშტთა მათ წარმართთა გარემოთა მათთა.
ამისთჳს ამას იტყჳს ადონაჲ უფალი; უკუეთუ არაჲ ცეცხლითა გულის-წყრომისა ჩემისაჲთა ვეტყოდე ნეშტთა მათ წარმართთასა და იდუმიასა ზედა ყოველსა, რამეთუ დაიპყრეს ქუეყანაჲ ჩემი თავისა თჳსისა სამკჳდრებელად მოცხრომით, შეურაცხ-ყვნეს სულნი განრყუნად ტყუენვითა.
ამისთჳს წინაწარმეტყუელებდ ქუეყანისა მიმართ ისრაჱლისა, და არქუ მთათა და ბორცუთა და ღელეთა და ჴევთა. ამას იტყჳს უფალი, აჰა ეგერა მე შურითა ჩემითა და გულის-წყრომითა ჩემითა ვიტყოდე ყუედრებისა მის წილ წარმართთაჲსა, რომელ მიიღეთ თქუენ.
ამისთჳს აღვიღო ჴელი ჩემი წარმართთა ზედა, რომელნი არიან გარემო თქუენსა, და მიიღონ მათ შეურაცხებაჲ თჳსი.
ხოლო თქუენ, მთანო ისრაჱლისანო, ყურძენი თქუენი და ნაყოფი თქუენი შეჭამოს ერმან ჩემმან, რამეთუ მოახლებულ არიან მოსლვად;/
Page of ms. J: B97r რამეთუ აჰა ესერა მე თქუენ ზედა, რამეთუ მოხედვა <ვ>ყო თქუენ ზედა, <და> მოიქმნნეთ.
და განვამრავლნე თქუენ ზედა კაცნი, ყოველი სახლი ისრაჱლისაჲ სრულიად, და დაეშჱნნენ ქალაქნი და მოოჴრებულნი იგი აღეშჱნნენ.
და განვამრავლნე თქუენ ზედა კაცნი და საცხოვარნი, და დაგამკჳდრნე თქუენ ვითარცა იგი პირველ იყვენით, და კეთილსა გიყოფდე თქუენ ვითარცა იგი უწინარჱს და სცნათ რამეთუ მე ვარ უფალი,
და ვშვნე თქუენ ზედა კაცნი, ერი ჩემი ისრაჱლი, და დაგიმკჳდრნენ თქუენ, და იყვნეთ თქუენ მათა სამკჳდრებელად, და არღარა იყვნეთ თქუენ უშვილო მათგან.
ამას იტყჳს ადონაჲ უფალი; ამისთჳს რამეთუ გრქუეს შენ, შემჭამელი კაცთაჲ ხარ შენ, და უშვილო იქმენ შენ თესლებისაგან,
ამისთჳს კაცთა არღარა შჭამდე შენ, და ნათესავნი არა უშვილო ჰყვნე და მერმე, იტყჳს უფალი უფალი.
ვითარმედ არღარა ისმეს თქუენ ზედა მერმე შეურაცხებაჲ წარმართთაჲ, და ყუედრებაჲ ერთაჲ არღარა მოიღოთ, იტყჳს ადონაჲ უფალი.
და იყო სიტყუაჲ უფლისაჲ ჩემდა მომართ, და თქუა.
ძეო კაცისაო, სახლი ისრაჱლისაჲ დაემკჳდრა ქუეყანასა მათსა, და შეაბინეს იგი გზითა მათითა, და კერპებითა მათითა, და არა-წმიდებითა მათითა, და არა-წმიდებისა-ებრ დედაკაცისა გამოჯდომილისა იქმნა გზაჲ მათი წინაშე ჩემსა.
და მივავლინე გულის-წყრომაჲ ჩემი მათ ზედა,
და განვსთესენ იგინი წარმართთა შორის, და განვაქრიენ იგინი სოფლებსა შორის, და გზისა მათისა-ებრ და ცოდვისა მათისა-ებრ ვსაჯნე იგინი.
და შევიდეს იგინი წარმართთა შორის, ვიდრე იგი შევიდეს, და შეაგინეს სახელი წმიდაჲ ჩემი. ამისთჳს რამეთუ ერქუა მათ ერი უფლისაჲ ესე. და გამოვიდეს იგინი ქუეყანით მათით,
და ვერიდე მათ სახელისა ჩემისათჳს წმიდისა, რომელი შეაგინა სახლმან ისრაჱლისამან წარმართთა შორის, ვიდრე იგი შევიდეს მუნ.
ამისთჳს არქუ სახლსა ისრაჱლისასა, ამას იტყჳს ადონაჲ უფალი; არა თქუენთჳს ვყო Page of ms. J: B97v მე, სახლო ისრაჱლისაო,/ არამედ სახელისა ჩემისათჳს წმიდისა, რომელი შეაგინეთ წარმართთა შორის, ვიდრე იგი შეხუედით მუნ.
და წმიდა ვყო სახელი ჩემი დიდი, რომელი შეიგინა წარმართთა შორის, და ცნან წარმართთა რამეთუ მე ვარ უფალი, რაჟამს განვწმიდნე მე თქუენ შორის წინაშე თუალთა მათთა.
და მოგიყვანნე თქუენ წარმართთაგან, და შეგკრიბნე თქუენ ყოვლისაგან ქუეყანისა, და შეგიყვანნე თქუენ ქუეყანასა თქუენსა.
და გასხურო თქუენ წყალი წმიდაჲ, და განსწმიდნეთ თქუენ ყოველთაგან არა-წმიდებათა თქუენთა, და ყოველთაგან კერპთა თქუენთა, და განგწმიდნე თქუენ.
და მოგცე თქუენ გული ახალი, და სული ახალი მოგცე თქუენ; და მოგიღო გული ქვისაჲ ჴორცისაგან თქუენისა, და მოგცე თქუენ გული ჴორციელი.
და მოგცე თქუენ ზედა სული ჩემი, და ვყო რაჲთა ბრძანებათა ჩემთა ხჳდოდით, და სამართალთა ჩემთა იმარხვიდეთ, და ჰყოფდეთ მათ.
და დაემკჳდრნეთ ქუეყანასა მას, რომელი მივეც მამათა თქუენთა, და იყვნეთ თქუენ ჩემდა ერად, და მე ვიყო თქუენდა ღმრთად.
და განგარინნე თქუენ ყოველთაგან არა-წმიდებათა თქუენთა, და მოუწოდი იფქლსა, და განვამრავლო იგი, და არა მოგცე თქუენ ზედა სიყმილი.
და განვამრავლო ხილი ხეთაჲ და ნაყოფი ველთაჲ, რაჲთა არღარა მოიღოთ მერმე ყუედრებაჲ სიყმილისაჲ წარმართთა შორის.
და მოიჴსენნეთ გზანი თქუენნი ბოროტნი, და სლვანი თქუენნი არა-კეთილნი, და მოიწყინოთ წინაშე პირსა მათსა უშჯულოებათა შინა თქუენთა.
არა თქუენთჳს ვყო მე, იტყჳს ადონაჲ უფალი. ცხად იყავნ თქუენდა, შეირცხჳნეთ და შეიკდიმეთ გზათაგან თქუენთა, სახლო ისრაჱლისაო.
ამას იტყჳს ადონა<ჲ> უფალი დღესა მას, რომელსა განგწმიდნე თქუენ ყოველთაგან უშჯულოებათა, და დავაშჱნნე ქალაქნი, და აღეშჱნნენ ოჴერნი.
და ქუეყანაჲ Page of ms. J: B98r განრყუნილი მოიქმნეს, ამისთჳს რამეთუ იყო იგი/ განრყუნილ წინაშე თუალთა ყოველთა თანა-წარმავალთასა, და თქჳან.
ქუეყანაჲ იგი განრყუნილი იქმნა ვითარცა მტილი საშუებელი, და ქალაქნი იგი ოჴერნი და განრყუნილ<ნ>ი და დარღუეულნი მოძნელებულ და მტკიცედ დაემკჳდრნეს.
და ცნან წარმართთა მათ, რაოდენნი დაშთომილ იყვნენ გარემო თქუენსა, რამეთუ მე ვარ უფალი, რომელმან აღვაშჱნენ დარღუეულნი, და დავჰნერგენ განრყუნილნი, მე უფალი ვიტყოდე და ვყავ.
ამას იტყჳს ადონაჲ უფალი; ესე და საძიებელ ვიყო სახლსა ისრაჱლისასა ყოფად მათა; განვამრავლნე მათ შორის ვითარცა ცხოვარნი კაცნი,
ვითარცა ცხოვარნი წმიდანი, ვითარცა ცხოვარნი იჱრუსალემისანი დღესასწაულთა მისთაჲ, ესრჱთ იყვნენ ქალაქნი იგი ოჴერნი, სავსე ვითარცა ცხოვრითა კაცთაჲთა, და ცნან რამეთუ მე ვარ უფალი.
