TITUS
Vetus Testamentum iberice: codd. Oshki & Jerusalem
Part No. 284
Previous part

Chapter: 35  
Verse: 1   Link to mcat Link to sept   იხარებდ უდაბნოჲ ესე წყურიელი, და მხიარულ იყავნ, უდაბნოჲ ეგე, და ყუაოდენ ვითარცა შროშანი ყუაოდის,

Verse: 2   Link to mcat Link to sept   
და აღმოსცენდეს, და მხიარულ იყვნენ, უდაბნონი იგი იორდანისანი. და დიდებაჲ ლიბანისაჲ მოეცა მას, და პატივი კარმელისაჲ, და ერმან ჩემმან იხილოს დიდებაჲ უფლისაჲ და სიმაღლჱ ღმრთისაჲ.

Verse: 3   Link to mcat Link to sept   
განძლიერდით ჴელნი დაშთომილნი, და მუჴლნი დაჴსნილნი ნუგეშინის-ეცით.

Verse: 4   Link to mcat Link to sept   
და არქუთ სულ-მოკლეთა გონებითა: განძლიერდით, ნუ გეშინინ. აჰა ესერა ღმერთი ჩუენი საშჯელსა მოაგებს, და კუალად აგოს. თავადი მოვიდეს, და მიჴსნნეს ჩუენ.

Verse: 5   Link to mcat Link to sept   
მაშინ აღეხუნენ თუალნი ბრმათანი, და ყურთა ყრუთა ესმოდის. Page of ms. J: A66v 

Verse: 6   Link to mcat Link to sept   
მაშინ ხლდებოდის მკელობელი ვითარცა ირემი, და განემარ/ტოს ენაჲ ბრგუნვილი.

Verse: 7   Link to mcat Link to sept   
რამეთუ გამოეცა უდაბნოსა წყალი, და მდინარჱ ქუეყანასა წყურიელსა. და იყოს ურწყული იგი მწყურნებად, და ქუეყანასა წყურიელსა წყაროჲ წყალთაჲ იყოს. მუნ იყოს სიხარული მფრინველთაჲ, და საყოფელი ურჩხულთაჲ, და ლერწამი, და მწყურნები.

Verse: 8   Link to mcat Link to sept   
და იყოს მუნ გზაჲ განწმედილი, და გზა წმიდა ეწოდოს მას. არა წარვიდეს მიერ არა-წმიდაჲ, არცა იყოს მუნ გზაჲ არა-წმიდებისაჲ. ხოლო განბნეულნი იგი ვიდოდიან მის მიერ, და არა შესცთენ.

Verse: 9   Link to mcat Link to sept   
და არა იყოს მუნ ლომი, და არცა მჴეცთა ბოროტთაგანი აღვიდეს მას, და არცა იპოვოს მუნ. არამედ ვიდოდიან მას შინა ჴსნილნი იგი,

Verse: 10   Link to mcat Link to sept   
და შეკრებულნი უფლისა მიერ, და მოიქცენ და მოვიდენ სიონდ სიხარულით და მხიარულებით. და სიხარული საუკუნოჲ თავსა ზედა მათსა, რამეთუ თავსა ზედა მათსა ქებაჲ, და მხიარულებაჲ და სიხარული ეწიოს მათ. ივლტოდა სალმობაჲ, მწუხარებაჲ, და სულთქუმაჲ.

Next part



This text is part of the TITUS edition of Vetus Testamentum iberice: codd. Oshki & Jerusalem.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.