ჵ მწყემსნო, რომელნი განაბნევთ და წარსწყმედთ ცხოვართა საძოვრისაგან ჩემისა, თქუა უფალმან;
ამისთჳს ესრე იტყჳს უფალი ღმერთი ისრაჱლისაჲ მწყემსთა ზედა <ერისა ჩემისათა>. თქუენ განაბნიენით ცხოვარნი ჩემნი, და განაშორენ<ი>თ იგინი, და უგულებელ-ჰყვენ<ი>თ იგინი, აჰა ესერა მე შური ვიძიო თქუენგან მსგავსად უკეთურებისა სლვისა თქუენისა, თქუა უფალმან.
და მე შევიწყნარნე ნეშტნი ერისა ჩემისანი ყოვლისაგან ქუეყანისა, სადაცა განვიშოვრენ მე იგინი მუნ, და დავადგინნე იგინი საძოვარსა ზედა მათსა, და აღორძნდენ და განმრავლდენ.
და აღუდგინნე მათ მწყემსნი, რომელნი მწყსიდენ მათ, და არღარა ეშინოდის მერმე არცა შეძრწუნდენ, იტყჳს უფალი.
ესერა დღენი მოვლენან, იტყჳს უფალი, და აღუდგინო დავითს აღმოსავალი მართალი, და მეუფებდეს მეუფჱ მართალი; <და> ცნას და ყოს განკითხვაჲ, და სიმართლჱ ქუეყანასა ზედა.
დღეთა მისთა ცხოვნდეს იუდაჲ, და ისრაჱლმან დაიმკჳდროს სასოებით; Page of ms. J: A122v და ესე სახ<ე>ლები მათი, რომელ დასდვ/ას მათ უფალმან, იოსედეკიმ იგი, წინაწარმეტყუელთა შორის.
ამისთჳს ესერა დღენი მოვლენან, იტყჳს უფალი, და არღარა თქუან; ცხოველ არს უფალი, რომელმან აღმოიყვანნა ძენი ისრაჱლისანი ქუეყანით ეგჳპტით.
არამედ ცხოველ არს უფალი, რომელმან აღმომ იყვანა და მოიყვანა ნათესავი სახლისა ისრაჱლისაჲ ქუეყანით ჩრდილოჲთ, და ყოველთაგან სოფელთა, სადაცა განვაბნიენ იგინი. და კუალად ვაგნე იგინი, და დაეშჱნნენ ქუეყანასა მათსა.
წინაწარმეტყუელთათჳს. განტყდა გული ჩემი ჩემ თანა, და შეიძრნეს ყოველნი ძუალნი ჩემნი, ვიქმენ მე ვითარცა მამაკაცი განკაფული, და ვითარცა კაცი შეპყრობილი ღჳნითა პირისაგან უფლისა და პირისაგან შუენიერებისა დიდებისა მისისა.
რამეთუ მრუშებითა აღივსო ქუეყანაჲ, და პირისაგან მათისა იგლოვდა ქუეყანაჲ. განჴმეს საძოვარნი უდაბნოჲს<ა>ნი, და იყოს სრბაჲ მათი უკეთურ და ძლიერებაჲ მათი არა რაჲ.
რამეთუ მღდელნი და წინაწარმეტყუელნი შეიბილწნეს, და სახლსა შინა ჩემსა ვიხილე უკეთურებაჲ მათი, თქუა უფალმან.
ამისთჳს ექმენინ მათ გზაჲ მათი საძრომელ ნისლსა შინა, და შეუბრკუმენ, და დაეცნედ მას შინა, რამეთუ მოვავლინო მათ ზედა ძჳრი წელსა მას მოძიებისა მათისასა.
და შორის წინაწარმეტყუელთა სამარიაჲსათა ვიხილენ უშჯულოებანი; წინაწარმეტყუელებდეს სახელად ჩემდა ბაალის გამო, და აცთუნეს ერი ჩემი ისრაჱლი.
და შორის წინაწარმეტყუელთა იჱრუსალემისათა ვიხილე საზარელი, მრუშებდეს და ვიდოდეს სიცრუვით, და შეეწეოდეს ჴელთა ბოროტთა, რაჲთამცა არა მოაქცია კაცად-კაცადმან გზისაგან თჳსისა უკეთურისა, და მექმნ<ნ>ეს მე ყოველნი ვითარცა სოდომეთი, და მკჳდრნი მისნი ვითარცა გომორთაჲ.
ამისთჳს ესრე იტყჳს უფალი ძალთაჲ წინაწარმეტყუელთა ზედა, ესე<რა> ვაჭამო მათ სალმობაჲ, და ვასუა მათ წყალი მწარჱ, რამეთუ წინაწარმეტყუელთაგან იჱრუსალემისათა გამოჴდა სიბილწე ყოველსა ქუეყანასა.
ესრე იტყჳს უფალი ყოვლისა-მპყრობელი, ნუ ისმენთ სიტყუათა წინაწარმეტყუელთასა, რომელნი იგი წინაწარმეტყუელებენ ცუდსა, ხილვასა Page of ms. J: A123r გულისა მათისა უკეთუ/რისასა იტყჳან, და არა პირისაგან უფლისა.
ეტყჳან განშორებელთა სიტყუათა უფლისა გან; მშჳდობა იყოს <თქუენდა, და ყოველთა მავალთა ნებათა შინა მათთა ყოველთა მავალთა> საცთურითა გულისა თჳსისაჲთა ჰრქუეს, არა მოვიდეს თქუენ ზედა ბოროტი.
რამეთუ ვინ დადგა სამყაროსა უფლისასა, და იხილვიდა სიტყუასა მისსა, ანუ ვინ მიეახლა, და ესმა ყურთა მისთა.
აჰა ესერა ძრვაჲ უფლისა მიერ და რისხვაჲ გამოვალს შესაძრველად; ერთბამად მოვიდეს უღმრთოთა ზედა.
და არა მიიქცეს რისხვაჲ უფლისაჲ, ვიდრემდის ყოს და ვიდრემდის დაამტკიცნეს მან ყოველნი მოსრულნი გულისა თჳსისანი. აღსასრულსა დღეთასა გულის-ჴმა-ყვნენ იგინი.
არა მივავლინებდ წინაწარმეტყუელთა, და იგინი რბიოდეს, არა ვეტყოდე მათ, და იგინი წინაწარმეტყუელებდეს.
და თუმცა დადგეს ქუეშჱ სამყაროსა ჩემსა, და ესმეს სიტყუანი ჩემნი, ასწავებდესმცა ერსა ჩემსა, და მოაქცევდეს მათ გზისაგან მათისა ბოროტისა და უკეთურისაგან სლვისა მათისა,
ღმერთი მახლობელი მე ვარ, იტყჳს უფალი, და არა ღმერთი შორიელი.
ანუ და-მე-იმალოს კაცი სამარხველსა, და მე არა ვიხილო, თქუა უფალმან; ანუ არა ცაჲ და ქუეყანაჲ მე აღმივსიეს, თქუა უფალმან.
მესმა რასა იტყჳან წინაწარმეტყუელნი, რომელსა წინაწარმეტყუელებენ სახელად ჩემდა ცრუდ, და იტყჳან, მეჩუენა მე ჩუენებაჲ.
ვიდრემდე იყოს გულსა წინაწარმეტყუელთასა, რომელნი წინაწარმეტყუელებენ სიცრუვესა, და წინაწარმეტყუელებასა მათსა ნებასა გულისა მათისასა
რომელნი ზრახვენ დავიწყებად ერისა ჩემისა შჯულსა ჩემსა ჩუენებითა მათითა, რომელსა მიუთხრობს კაცად-კაცადი მოყუასსა თჳსსა, ვითარცა დაივიწყეს მამათა მათთა სახელი ჩემი ბაალისგან.
წინაწარმეტყუელი, რომლისა თანა არს ჩუენებაჲ, წართქუნ ჩუენებაჲ თჳსი; და რომლისა თანა სიტყუაჲ ჩემი არს, წართქუნ სიტყუაჲ ჩემი ჭეშმარიტად. რაჲ არს ბზჱ იფქლისა თანა, ეგრეცა სიტყუანი ჩემნი, თქუა უფალმან.
აჰა ესერა სიტყუანი ჩემნი ვითარცა ცეცხლი მოტყინარჱ, იტყჳს უფალი, და ვითარცა წერაქჳ, რომელმან განკუეთის კლდჱ,
აჰა ესერა მე წინაწარმეტყუელთა მიმართ, იტყჳს უფალი, რომელნი Page of ms. J: A123v იპარვენ სიტყუათა/ ჩემთა თითოეულად მოყუსისა თჳსისაგან.
აჰა ესერა მე წინაწარმეტყუელთა მიმართ, თქუა უფალმან, რომელნი გამოიღებენ წინაწარმეტყუელებასა ენათასა, და შეიქმან ტყუვილით საუცრებასა, და ჰრულის რული მათი.
აჰა ესერა მე წინაწარმეტყუელთა მიმართ, რომელნი წინაწარმეტყუელებდეს ჩუენებათა ცრუთა, თქუა უფალმან, და უთხრობდეს მათ, და აცთუნეს ერი ჩემი ტყუვილითა მათითა და სიცრუვითა მათითა, და მე არა მივავლინენ იგინი არცა ვამცენ მათ, და სარგებელი <ა>რაჲ არგონ ერსა ამას, თქუა უფალმან.
და თუ გკითხოს შენ ერმან ანუ მღდელმან ანუ წინაწარმეტყუელმან, რაჲ არს იგავი უფლისაჲ, და ჰრქუა მათ; თქუენ ხართ იგავნი უფლისანი, და დაგამჴუნე თქუენ, თქუა უფალმან.
წინაწარმეტყუელმან და მღდელმან და ერმან, რომელთაცა თქუან იგავი ესე უფლისაჲ, ვიძიო შური მის კაცისაგან და სახლისაგან მისისა.
რამეთუ ჰრქჳს კაცად-კაცადმან მოყუასსა თჳსსა და კაცად-კაცადმან ძმასა თჳსსა, რაჲ მოგიგო უფალმან, და რაჲ თქუა უფალმან.
და იგავსა უფლისასა ნუ სახელს-დებთ, რამეთუ იგავად უფლისად ექმნეს მას კაცსა სიტყუაჲ თჳსი, და გარდააქციენ<ი>თ სიტყუანი ღმრთისა ცხოვ, ელისანი უფლისა ძალთაჲსაჲ ღმრთისა ჩუენისაჲ.
ესრეთ ჰრქუათ წინაწარმეტყუელთა; რაჲ მოგიგო უფალმან, და რაჲ გრქუა უფალმან; და იგავად უფლისა ნუ იტყჳთ,
ამისთჳს ესრე იტყჳს უფალი; რამეთუ სთქჳთ სიტყუაჲ ესე, იგავი უფლისაჲ, მივავლინე თქუენდა, და ვთქუ; არა სთქუათ იგავად უფლისად,
ამისთჳს ესერა მე მოგიხუნე თქუენ იგავითა, და დაგამჴუნე თქუენ, და ქალაქი რომელ მოგეც თქუენ და მამათა თქუენთა პირისაგან ჩემისა.
და მოვავლინო თქუენ ზედა ყუედრებაჲ საუკუნოჲ, და გინებაჲ საუკუნე, რომელ არა დაივიწყოს.
[!] ამისთჳს ესერა დღენი მოვლენან, იტყჳს უფალი, და არღარა თქუან მერმე, ვითარმედ ცხოველ არს უფალი, რომელმან აღმოიყვანნა ძენი ისრაჱლისანი ქუეყანით ეგჳპტით,
[!] არამედ ცხოველ არს უფალი, რომელმან აღმოიყვანა და შეკრიბა ყოველი ნათესავი ისრაჱლისაჲ ქუეყანით ჩრდილოჲთ, Page of ms. J: A124r და ყოველთაგან სოფელთა, სადაცა განიშოვრნა იგინი მუნ;/ და კუალად აგნა იგინი ქუეყანასა მათსა.;
