რამეთუ ესერა დღჱ მოვალს აღგზებული ვითარცა თორნე, და შეწუნას იგინი, და იყვნენ ყოველნი უცხოთესლნი და ყოველნი რომელნი იქმან უშჯულოებასა ვითარცა ლერწამნი, და დაწუნეს იგინი დღემან მან მომავალმან, იტყჳს უფალი ყოვლისა-მპყრობელი, და არა დაუშთეს მას ძირი არცა რტოჲ.
და გამოგიბრწყინდეს თქუენ მოშიშთა სახელისა ჩემისათა მზჱ სიმართლისაჲ, და კურნებაჲ ქუეშჱ ფრთეთა მისთა, და გამოხჳდეთ და ხლდებოდით ვითარცა ჴბონი ბაგათაგან განტევებულნი.
და დასთრგუნვიდეთ უშჯულოთა, და იყვნენ იგინი ნაცარ ქუეშე ფერჴთა თქუენთა დღესა მას, რომელსა ვყო მე, იტყჳს უფალი ყოვლისა-მპყრობელი.
[!] მოიჴსენეთ შჯული მოსესი მონისა ჩემისაჲ, ვითარცა იგი ვამცენ მას ქორებს ყოვლისა მიმართ ისრაჱლისა ბრძანებანი და სამართალნი.
და აჰა ესერა მე მოგივლინო თქუენ ელია თეზბიტელი ვიდრე მოსლვადმდე დღისა მის უფლისა დიდისა და განჩინებულისა.
რომელმან მოაქციოს გული მამისაჲ ძისა, და გული კაცისაჲ მოყუსისა თჳსისა, ნუ უკუე მოვიდე და მოვსრა ქუეყანაჲ ერთბამად.: .:
