Page of ms. L: 299V დასაბამად ქმნა ღმერთმან ცაჲ და ქუეყანაჲ.
ხოლო ქუეყანაჲ იყო უხილავ და განუმზადებელ, ბნელი იყო ზედა უფსკრულთა, სული ღმრთისაჲ იქცეოდა ზედა წყალთა.
Page of ms. L: 300R და თქუა ღმერთმან: იყავნ ნათელი. და იყო ნათელი.
და იხილა ღმერთმან ნათელი იგი, რამეთუ კეთილ. და განაშორა შორის ნათლისა მის და შორის ბნელისა მის.
და უწოდა ღმერთმან ნათელსა მას დღჱ და ბნელსა მას უწოდა ღამჱ. და იყო მწუხრი და იყო განთიად დღჱ იგი პირველი.
და თქუა ღმერთმან. იყავნ სამყაროჲ შორის წყალთა, და იყავნ განმაშორებელ შორის წყალთა. და იყო ეგრე.
და შექმნა ღმერთმან სამყაროი იგი. და განაშორა ღმერთმან [შორის] წყალთა, რომელი-იგი იყო ქუეშე სამყაროსა მას და შორის წყალთა მათ, რომელი-იგი იყო ზედა სამყაროსა მას.
[და უწოდა ღმერთმან სამყაროსა მას] ცაჲ. და იხილა ღმერთმან, რამეთუ კეთილ. და იყო მწუხრი და იყო განთიად დღჱ იგი მეორჱ.
და თქუა ღმერთმან: შეკრბედ წყალნი იგი, რომელნი არიან ცასა ქუეშე, Page of ms. L: 300V შესაკრებელსა ერთსა, და გამოჩნდინ ჴმელი.
და უწოდა ღმერთმან ჴმელსა მას ქუეყანაჲ და შესაკრებელსა წყალთასა უწოდა ზღუებ. და იხილა ღმერთმან, რამეთუ კეთილ.
და თქუა ღმერთმან: აღმოაცენენ ქუეყანამან მწუანვილი თივისაჲ, სათესავი თესლად-თესლადი და მსგავსად-მსგავსადი, ხჱ ნაყოფიერი, რომელმან გამოიღოს ნაყოფი, რომლისა თესლი მის თანავე იყოს მსგავსად-მსგავსადი და თესლად-თესლადი.
და იხილა ღმერთმან, რამეთუ კეთილ. {1}
და იყო მწუხრი და იყო განთიად, დღჱ იგი მესამჱ.
და თქუა ღმერთმან: იყვნედ მნათობნი სამყაროსა ცისასა [მნათობად] ქუეყანისა და [განსაყოფელად] შორის დღისა და შორის ღამისა. და იყვნედ სასწაულებად დღედ და წელიწადებად.
და იყვნედ Page of ms. L: 301R განმანათლებელად სამყაროსა ცისასა, რაჲთა ნათობდენ ქუეყანასა ზედა.
და შექმნა ღმერთმან ორნი ესე ნათელნი დიდნი: ნათელი ესე დიდი მფლობელად დღისა და ნათელი ესე უმწემესი (!) მფლობელად ღამისა და მასკულავნი.
და დასხნა ღმერთმან სამყაროსა ცისასა, რაჲთა ნათობდენ ქუეყანასა ზედა,
და მთავრობდენ დღესა და ღამესა და განწვალებდენ შორის ნათლისა და შორის ბნელისა. და იხილა ღმერთმან, რამეთუ კეთილ.
და იყო მწუხრი და იყო განთიად დღჱ იგი მეოთხჱ.
და თქუა ღმერთმან: გამოიყვანეთ წყალთა ქუეწარმავალი საშმინველი ცხოელისაჲ და მფრინველი ფრთოანი ქუეყანასა ზედა მსგავსად სამყაროჲსა მისებრ ცისა. და იყო ეგრე.
და შექმნა ღმერთმან ვეშაპი იგი დიდი და ყოველნი ქუეწარმავალნი, რომელნი Page of ms. L: 301V გამოიყვანნეს წყალთა თესლად-თესლადისაებრ მათისა. და იხილა ღმერთმან, რამეთუ კეთილ.
და აკურთხა ღმერთმან და თქუა: აღორძნდით და განმრავლდით, აღავსენით წყალნი ეგე ზღუათა შინა და მფრინველნი ეგე განმრავლდით ქუეყანასა ზედა.
და იყო მწუხრი და იყო განთიად დღჱ იგი მეხუთჱ.
და თქუა ღმერთმან: გამოიღენ ქუეყანამან საშმინველი თესლად-თესლადი ოთხფერჴი, ქუეწარმავალი, მჴეცი ქუეყანისაჲ და ყოველი პირუტყვი თესლად-თესლადისაებრ მათისა. {1}
და თქუა ღმერთმან: ვქმნე კაცი ხატად ჩუენდა [და] მსგავსად. მთავრობდეს თევზთა ზედა ზღუისათა, მფრინველთა ცისათა და ყოველთა პირუტყუთა, ქუეწარმავალთა, რომელნი ვლენან ქუეყანასა ზედა.
და შექმნა ღმერთმან კაცი [სახედ თჳსად და] ხატად ღმრთისა შექმნა იგი, მამაკაცად და დედაკაცად Page of ms. L: 302R შექმნნა [იგინი].
აკურთხნა იგინი და თქუა: აღორძნდით და განმრავლდით და აღავსეთ ქუეყანაჲ და უფლებდით მას ზედა, და მთავრობდით თევზთა ზედა ზღუისათა და ყოველთა იძრვისთა.
და თქუა ღმერთმან: აჰა, ესერა, მიგეც თქუენ ყოველი თივაჲ სათესავი, რომელ არს პირსა ზედა ყოვლისა ქუეყანისასა; ხოლო ყოველი ხჱ, რომელსა აქუს მის თანა ნაყოფი სათესავი თესლად-თესლადი, თქუენდა იყავნ საჭმლად.
და ყოველთა ქუეწარმავალთა, რომელნი ვლენან ქუეყანასა ზედა, რომელსა აქუს მის თანა საშმინველი ცხოველი, და ყოველი თივაჲ სათესავი საჭმლად.
და იხილა ღმერთმან ყოველი, რავდენი ქმნა, და, აჰა, ესერა, ყოველი კეთილ იყო ფრიად. და იყო მწუხრი და იყო განთიად, დღჱ იგი მეექუსჱ. {1}
