Page of ms. L: _ Page of ms. P: 363R და მოუწოდა ისუ ათორმეტთა მათ კაცთა, მთავართა ძეთა ისრაჱლისათა, ერთსა თითოჲსაგან ნათესავსა.
და ჰრქუა მათ ისუ: წარვედით ჩემ თანა წინაშე უფლისა შორის იორდანესა და გამოირჩიედ კაცად-კაცადმან და აღიღენ ლოდი ერთი მჴართა თჳსთა ზედა მსგავსად რიცხჳსა მის ტომისა ისრაჱლისა,
რაჲთა ისხნენ იგინი თქუენდა საწამებლად საუკუნოდ, რაჲთა, რაჟამს გკითხვიდეს შენ ძჱ შენი ხვალე და გრქუას: რაჲ არიან ლოდნი ესე?
შენ უთხრა ძესა შენსა და ჰრქუა, რამეთუ მოაკლდა იორდანე პირისაგან კიდობნისა შჯულისა უფლისა ყოვლისა ქუეყანისა, რაჟამს წიაღმოვიდეს იგინი მას ზედა; და იყვნენ ლოდნი იგი თქუენდა საჴსენებელად საუკუნოდ ძეთა შორის ისრაჱლისათა.
[და ყვეს ეგრჱთ ძეთა ისრაჱლისათა, ვითარცა უბრძანა უფალმან ისუს, და აღიხუნეს ათორმეტნი ლოდნი საშუვალ იორდანესა], ვითარცა უთხრნა უფალმან ისუს დასასრულსა მას წიაღმოსლვისა ძეთა ისრაჱლისათა. და მოიხუნეს მათ თანა ბანაკად და დასხნეს იგინი მუნ.
ხოლო აჰმართნა ისუ სხუანიცა ათორმეტნი ლოდნი მუნვე იორდანესა შინა, რაჟამს წიაღმოვიდოდეს იგინი იორდანესა, რამეთუ მათ ზედა დგეს ფერჴნი მღდელთანი, რომელთა მოაქუნდა კიდობანი იგი შჯულისა უფლისაჲ. და არიან იგინი მუნ ვიდრე დღენდელად დღედმდე.
და დადგეს მღდელნი იგი, რომელთა აქუნდა კიდობანი იგი შჯულისა უფლისაჲ იორდანესა შინა, ვიდრე აღასრულნა ისუ ყოველნი სიტყუანი, რომელ ამცნნა უფალმან ისუს თხრობად ერისა მის, და ისწრაფა ერმან და წიაღმოჴდეს. Page of ms. P: 363V
[და იყო, ვითარცა] წიაღმოესრულა ერი იგი წიაღმოსლვად (!), წიაღმოჴდა კიდობანი იგი შჯულისა უფლისაჲ, და ლოდნი იგი მოაქუნდეს წინაშე მათსა.
