რამეთუ მნებავს თქუენი, რაჲთა უწყოდით, რავდენი ღუაწლი მაქუს თქუენთუის და ლავდიკელთა მათთჳს და რომელთა არა უხილავს პირი ჩემი ჴორციელად.
რაჲთა ნუგეშინის-ცემულ იყვნენ გულნი მათნი.
Page of ms. L: _ Page of ms. P: 51V ეკრძალენით, ნუუკუე იყოს ვინმე წარმტყუენველ თქუენდა სიბრძნისმოყუარებითა და ცუდითა სიბრძნითა, მოძღურებითა კაცთაჲთა და წესითა მით ამის სოფლისაჲთა და არა ქრისტჱსმიერითა;
Page of ms. P: 52R რამეთუ მას შინა დამკჳდრებულ არს ყოველი სავსებაჲ ღმრთეებისაჲ,
და ხართ თქუენ მას შინა აღსავსე, რომელი-იგი არს თავი ყოვლისა მთავრობისა და ჴელმწიფებისაჲ;
რომლისა მიერ წინადაიცჳთეთ წინადაცუეთითა მით ჴელითუქმნელითა, განძუარცვითა მით გუამისა ჴორცთა თქუენთაჲთა, წინადაცუეთითა მით ქრისტჱსითა;
და მის თანა დაეფლენით ნათლის-ღებითა, რომლისაცა თანა აღსდეგით სარწმუნოებითა და შეწევნითა ღმრთისაჲთა, რომელმან-იგი აღადგინა მკუდრეთით;
და თქუენცა მკუდარ იყვენით შეცოდებითა და წინადაცუეთითა ჴორცთა თქუენთაჲთა, მის თანა განგაცხოველნა და მოგჳტევნა ჩუენ ყოველნი ცოდვანი ჩუენნი.
და აჴოცა ჩუენთჳს ყოველი ჴელითწერილი ბრძანებითა, რომელი-იგი იყო ანთრაკად ჩუენდა, და იგი აღიღო შორის და შემსჭუალა ჯუარსა;
განიძუარცნა მთავრობანი და ჴელმწიფებანი, საჩუენებელ-ყვნა გამოჩინებითა, განაქარვნა იგინი მას შინა.
Page of ms. P: 359R ნუმცა რას ვინ განგიკითხავს თქუენ საჭმლითა და სასუმლითა და კერძო დღესასწაულისაჲთა, გინა თთჳსთავისაჲთა, გინა შაბათობითა,
რომელი-იგი არს სახჱ მერმეთაჲ მათ, ხოლო ჴორცთა მათ -- ქრისტჱსთა.
ნუვინ მძლე გექმნების, უნდეს ღათუ სიმდაბლითა და წესიერებითა ანგელოზთაჲთა, რომელი-იგი არა იხილა, თავი სთნდეს და ცუდად განლაღებულ იყოს გონებითა მით ჴორცთა მისთაჲთა.
და არა შეეკრძალოს მას თავი, რომლისაგან ყოველი გუამი სხეულთაგან და ნაწევართაგან შექმ[ნულ] არს და შეკრძალულ, ორძის სიორძილესა მას ღმრთისასა,
უკუეთუ მოჰკუედით ქრისტჱს თანა წესთა მათგან ამის სოფლისათა, რაჲსაღა ვითარცა ცხოველნი სოფელსა შინა ჰბრძანებთ: Page of ms. P: 359V
"ნუ მიეახლებით, ნუცა შეეხებით",
რომელი-იგი არს ყოველივე განსარყუნელად ჴმევითა მცნებისა მისებრ და მოძღურებისა კაცთაჲსა?
რომელი-იგი არს, რეცა სიტყუაჲ რაჲმე აქუს სიბრძნისაჲ ნებსით მოთმინებითა მით წესითა და სიმდაბლითა, ურიდებითა ჴორცთაჲთა, არა თუ პატივითა რაჲთმე განსაძღებელად ჴორცთა.
