Page of ms. S: _ Page of ms. P: 385R და ასწავებდა იესუ შესაკრებელსა ერთსა შაბათსა შინა.
და აჰა ესერა დედაკაცი ერთი იყო, რომლისა თანა [იყო] სული უძრულებისაჲ ათურამეტით წლითგან, დაღონებულ და ვერ ეძლო ახილვად ყოვლითურთ.
იხილა იგი იესუ, მოუწოდა და ჰრქუა მას: დედაკაცო, განტევებულ ხარ უძრულებისაგან შენისა.
და დაასხნა მას ზედა ჴელნი, და მეყსეულად აღემართა და ვიდოდა და ადიდებდა ღმერთსა.
მიუგო შესაკრებელთ-მთავარმან მან და ჰრქუა რისხვით, რამეთუ შაბათსა განკურნა იესუ, და ეტყოდა ერსა მას: ექუსნი დღენი არიან, რომელთა შინა ჯერ-არს საქმედ: მათ შინა მომავალნი განიკურნებოდედ და ნუ დღესა შაბათსა.
მიუგო იესუ და ჰრქუა მათ: ორგულნო, კაცად-კაცადმან თქუენმან არა აჰჴსნისა ჴარი გინა ვირი ბაგისაგან თჳსისა, წარიბის და ასჳს წყალი?
ხოლო ესე ასული აბრაჰამისი იყო, რომელი შეეკრა ეშმაკსა, აჰა ესერა ათურამეტი წელი არს: არა ჯერ-იყო განჴსნად საკრველთაგან მისთა დღესა შაბათსა?
და ამას რაჲ ეტყოდა თავადი, სირცხჳლეულ იქმნნეს ყოველნი წინა-\აღმდგომნი Page of ms. P: 385V მისნი; და ყოველსა მას ერსა უხაროდა ყოველთა მათ ზედა დიდებულებათა, რომელნი იქმნებოდეს მის მიერ,
Page of ms. P: 287R და იტყოდა იესუ: რასა ვამსგავსო სასუფეველი ცათაჲ, და ვისა მსგავს არს?
მსგავს არს იგი მარცუალსა მდოგჳსასა, რომელი მოიღო კაცმან და დასთესა; და აღორძინდა და იქმნა იგი ხედ, და მფრინველთა ცისათა დაიგრილეს შტოთა მისთა.
მერმე კუალად თქუა: რასა ვამსგავსო სასუფეველი ცათაჲ?
მსგავს არს იგი ცომსა, რომელი მოიღო დედაკაცმან და შეჰრთო იგი ფქვილსა საწყაულსა, ვიდრემდის აღაფუვნის ყოველი.
და მიმოვიდოდა ქალაქებსა და დაბნებსა ყოველსა და ას[წავებდა] Page of ms. P: 287V და წარჰგზავნიდა იერუსალჱმს.
და ჰრქუა ვინმე მას: უფალო, უკუეთუ მცირედ არიან ცხორებულნი? ხოლო თავადმან ჰრქუა:
იღუაწე შესლვად იწროჲსა მისგან კარისა, ხოლო გეტყჳ თქუენ: მრავალნი ეძიებდენ შესლვად და ვერ უძლონ.
ვინაჲთგან აღდგეს სახლისა უფალი და [დაჰჴშას კარი, და] გარეშე სდგეთ და იწყოთ რეკად კარისა და იტყოდით: უფალო, უფალო, განგჳღე ჩუენცა! და მოგიგოს და გრქუას: არა გიცნი, ვინანი ხართ.
მაშინ იწყოთ სიტყუად: ვჭამდით წინაშე შენსა და ვსუემდით, და უბანთა ჩუენთა ზედა გუასწავებდ.
და გრქუას: არა გიცნი, ვინანი ხართ. განმეშორენით ჩემგან ყოველნი მოქმედნი უსჯულოებისანი.
მუნ იყოს ტირილი და ღრჭენაჲ კბილთაჲ, რაჟამს იხილოთ აბრაჰამი, ისაკი და იაკობი და ყოველნი წინაწარმეტყუელნი სასუფეველსა ცათასა და თქუენ განსხმულნი გარეშე.
და მოვიდოდიან მზის-აღმოსავალით და მზის-დასავალით, ჩრდილოჲთ და სამხრით და ინაჴ-იდგმიდენ სასუფეველსა ცათასა.
და აჰა ესერა არიან უკანაჲსკნელნი, რომელნი იყვნენ წინა, და არიან პირველნი, რომელნი იყვნენ უკუანაჲსკნელ.
Page of ms. P: 169V მას დღესა შინა მო-ვინმე-უჴდეს იესუს ფარისეველნი და ეტყოდეს: განვედ და წარვედ ამიერ, რამეთუ ჰეროდე გეძიებს შენ მოკლვად.
ხოლო თავადმან ჰრქუა მათ: მივედით და არქუთ მელსა მას: აჰა ესერა განვასხამ ეშმაკთა და კურნებასა აღვასრულებ დღეს და ხვალე, და ზეგ აღვესრულები.
ხოლო ჯერ-არს ჩემდა ხვალე და ზეგე წარსლვაჲ, რამეთუ ვერ ეგების წინაწარმერტუელისა გარეშე იერუსალჱმისა წარწყმედაჲ.
იერუსალჱმ, იერუსალჱმ, რომელმან მოსწყჳდენ წინაწარმეტყუელნი და ქვაჲ დაჰკრიბე მოვლინებულთა შენ ზედა, რაოდენგზის მინდა შეკრებაჲ შვილთა შენთაჲ, ვითარცა სახედ მფრინველმან შეიკრიბნის მართუენი ქუეშე ფრთეთა თჳსთა, და არა ინებეთ!
აჰა ესერა დაუტეოთ სახლი თქუენი ოჴრად, გეტყჳ თქუენ: არღარა მიხილოთ, ვიდრემდის არა სთქუათ: კურთხეულ არს მომავალი სახელითა უფლისაჲთა.
