Page of ms. P: 381V წელსა მეათხუთმეტესა ტიბერიის კეისრისასა, მთავრობასა პონტოელისა პილატჱსსა ჰურიასტანს, და მეოთხედ-მთავრობასა გალილეას ჰეროდჱსსა, და ფილიპჱსსა, ძმისა მისისასა, მეოთხედ-მთავრობასა ისტჳრიას და ტრაქონელთა სოფელსა, და ლჳსიანჱსსა მეოთხედ-მთავრობასა აბინერეზსა.
მღდელთ-მოძღურობასა ანაჲსსა და კაიაფაჲსსა იყო სიტყუაჲ უფლისაჲ იოჰანესა მიმართ, ძისა ზაქარიაჲსა, უდაბნოს.
და მოჰვლიდა ყოველსა მას გარემო სოფლებსა იორდანისასა და ქადაგებდა ნათლის-ცემასა სინანულისასა მოსატევებელად ცოდვათა.
ვითარცა წერილ არს წიგნსა მას სიტყჳთა ესაია წინაწარმეტყუელისათა და იტყჳს: ჴმაჲ ღაღადებისაჲ უდაბნოსა: განმზადენით გზანი უფლისანი და წრფელ ყვენით ალაგნი მისნი.
ყოველი ჴევნები Page of ms. P: 360R აღმოივსოს, და ყოველნი მთანი და ბორცუნი დამდაბლდენ; და იყოს გულარძნილი იგი მართლ და ფიცხელი გზად წრფელად.
და იხილოს ყოველმან ჴორციელმან მაცხოვარებაჲ ღმრთისაჲ.
და ეტყოდა განმავალსა, მას მისა ერსა ნათლის-ღებად მისგან: ნაშობნო იქედნეთანო, ვინ გიჩუენა თქუენ სივლტოლაჲ მერმისა მისგან რისხვისა?
ყავთ უკუე ნაყოფი ღირსი სინანულისაჲ და ნუ იტყჳთ გულთა თქუენთა, ვითარმედ: მამაჲ გჳვის ჩუენ აბრაჰამი. გეტყჳ თქუენ, რამეთუ შემძლებელ არს ღმერთი აღდგინებად ქვათაგან შვილად აბრაამისა.
რამეთუ აწვე ცული ძირთა თანა ხეთასა ძეს: ყოველმან ხემან რომელმან არა გამოიღოს ნაყოფი კეთილი, მოეკუეთოს და ცეცხლსა დაედვას.
და ჰკითხვიდა მას ერი იგი და ეტყოდეს: რაჲ-მე ვყოთ?
მიუგო მათ იოჰანე და ჰრქუა: რომელსა აქუნდეს ორი სამოსელი, მიეცინ, რომელსა არა აქუნდეს; და საზრდელი ეგრევე მსგავსად ყავნ.
მოვიდეს მისა მეზუერენიცა ნათლის-ღებად და ჰრქუეს მას: მოძღუარ, ჩუენ რაჲ ვყოთ?
ხოლო მან ჰრქუა მათ: ნურას უფროჲს განწესებულისა თქუენისა იქმთ.
ჰკითხვიდეს მას ერად განწესებულნიცა იგი და ჰრქუეს: და ჩუენ რაჲ ვყოთ? და მან ჰრქუა მათ: ნუვის აჭირვებთ და კმა გეყავნ როჭიკი თქუენი.
და ვითარცა მოელოდა ერი იგი, და განიზრახვიდეს გულთა იოვანჱსთჳს, ნუუკუე იგი არს ქრისტე.
მიუგო ყოველთა და ეტყოდა: მე ნათელ-გცემ თქუენ [წყლითა]. არამედ მოვალს უძრიელჱსი ჩემსა, რომლისა არა ღირს ვარ ჴამლთა მისთა ტჳრთვად; მან ნათელ-გცეს თქუენ სულითა წმიდითა და ცეცხლითა,
რომლისა ნიჩაბი ჴელთა შინა მისთა, და განწმიდოს კალოჲ მისი და შეკრიბოს იფქლი საუნჯესა, ხოლო ბზჱ იგი დაწუას ცეცხლითა უშრეტითა.
და ფრიად სხუასაცა მრავალსა ჰლოცვიდა და Page of ms. P: 360V ახარებდა ერსა მას.
Page of ms. P: _ Page of ms. L: 601V და თავადსა იესუს ეწყო ოდენ ყოფად ოცდამეათესა Page of ms. L: 602R წელსა, რომელი საგონებელ იყო ძედ იოსებისა, იაკობისა, იელისა,
მატათანისა, ლევისა, მელქისა, იანესა, იოსებისა,
მატათისა, ამოსისა, ნაუმისა, ესლისა, ნაგესა,
მათისა, მატათისა, სემისა, იოსებისა, იუდაჲსა,
ოანანაისა, იესაჲსა, ზორობაბელისა, სალათიელისა, ნერისა,
მელქისა, ადადისა, კოსამისა, ელმოდადისა, ერისა,
იესუისა, ელიაზარისა, იორამისა, მატათისა, ლევისა,
სუიმეონისა, იუდაჲსა, იოსებისა, იონანისა, ელიაკიმისა,
მილიაჲსა, მენანისა, [მატთანისა, ნათანისა], დავითისა,
იესესა, იობელისა, ბოოზისა, სალმონისა, ნასონისა,
ამინადაბისა, არამისა, ეზრომისა, ფარეზისა, იუდაჲსა,
იაკობისა, ისაკისა, აბრაჰამისა, თარაჲსა, ნაქორისა,
სერუქისა, რაგავისა, ფალეგისა, ებერისა, სალაჲსა, Page of ms. L: 601V
კაინანისა, არფაქსადისა, სემისა, ნოვესა, ლამექისა,
მათუსალაჲსა, ევნუქისა, იერედისა, მალელისა, კაინანისა,
ანოსისა, სეითისა, ადამისა და ღმრთისა.
