Page of ms. L: _ Page of ms. P: 255R და მოიქცა იესუ ძალითა წმიდისაჲთა გალილეად; და ჰანბავი განჴდა ყოველსა მას სანახებსა მისთჳს.
და ასწავებდა თავადი შესაკრებელთა შორის მათთა და იდიდებოდა ყოველთაგან.
და მოვიდა ნაზარეთა, სადაცა აზრდილ იყო, და შევიდა ჩუეულებისაებრ მისისა დღესა შაბათსა შესაკრებელსა მათსა.
და მისცეს წიგნი ესაია წინაწარმეტყუელისაჲ. და აღდგა კითხვად და განყო წიგნი იგი და პოა ადგილი, რომელსა წერილ იყო ესრჱთ:
სული უფლისაჲ ჩემ ზედა, რომლისათჳს მცხო მე, მახარებელად გლახაკთა მომავლინა მე, ქადაგებად ტყუეთა განტევებისა და ბრმათა თუალთა ახილვად და განვლინებად, სნეულთა განკურნებად,
და ქადაგებად წელიწადი უფლისაჲ.
და შეყო წიგნი იგი და დაჯდა; და თუალნი ყოვლისა კრებულისანი მას ხედვიდეს.
და იწყო სიტყუად მათა მიმართ, ვითარმედ: დღეს აღესრულა წერილი ესე სასმენელთა მიმართ,
და ყოველნი ეწამებოდეს მას და დაუკჳრდებოდა მათ Page of ms. P: 255V ყოველთა სიტყუათა მათ ზედა მადლისათა, რომელნი გამოვიდოდეს პირისაგან მისისა.
Page of ms. P: 254R ჭეშმარიტსა გეტყჳ თქუენ: მრავალნი ქურივნი იყვნეს დღეთა ელიაჲსთა ისრაჱლსა შორის, რაჟამს-იგი დაეჴშა ცაჲ წჳმად სამ წელ და ექუს თთუე, ოდეს-იგი იყო სიყმილი ქუეყანასა ზედა.
და არცა ერთისა მათგანისა მიივლინა ელია, გარნა სარეფთად სიდონიაჲსა ხოლო, დედაკაცისა ქურივისა.
და მრავალნი კეთროანნი იყვნეს ისრაჱლსა შორის ელისესა წინაწარმეტყუელისა, და არავინ მათგანი განიკურნა, არამედ ნემან ხოლო ასური.
და აღივსნეს ყოველნი გულის-წყრომითა შესაკრებელსა მას შინა, ესმოდა რაჲ ესე.
და აღდგეს და გამოაძეს იგი გარეშე ქალაქსა მას და მოიყვანეს იგი ვიდრე თხემადმდე მის მთისა, სადა-იგი ქალაქი მათი დაშჱნებულ იყო, რაჲთამცა კლდესა გარდააგდეს იგი.
ხოლო თავადი განვიდა შორის მათსა და წარვიდა.
Page of ms. P: _ Page of ms. L: 604R და შთავიდა კაფარნაუმდ ქალაქსა გალილეაჲსასა, და ასწავებდა მათ შაბათსა შინა.
და უკუირდა მოძღუარებაჲ იგი მისი, რამეთუ ჴელმწიფებით იყო სიტყუაჲ მისი.
და იყო შესაკრებელსა მათსა კაცი, რომლისა თანა იყო სული არაწმიდაჲ: ღაღატ-ყო ჴმითა დიდითა:
ეჰა, რაჲ არს ჩემი და შენი, იესუ ნაზარეველო? რამეთუ მოხუედ წარწყმედად ჩუენდა: გიცი შენ, ვინა ხარ, წმიდაჲ ეგე ღმრთისაჲ.
და შეჰრისხნა მას იესუ და თქუა: პირი დაიყავ და განვედ მაგისგან! დასცა იგი შორის მათსა ეშმაკმან მან და განვიდა მისგან და არაჲ ავნო მას.
და იყო განკუირვებაჲ მათ ყოველთა ზედა, და ზრახვიდეს ურთიერთას და იტყოდეს: რაჲ არს სიტყუაჲ ესე, რამეთუ ჴელმწიფებითა და ძალითა უბრძანებს სულთა არაწმიდათა Page of ms. L: 604V და განვლენან?
და მიმოეფინებოდა ჰამბავი მისთუის ყოველთა მათ ადგილთა გარემო მის სოფლებისათა.
Page of ms. L: 605R და ვითარცა განთენა, გამოვი\და Page of ms. L: 605V მიერ და წარვიდა უდაბნოსა ადგილსა, და ერი იგი ეძებდა მას და მოვიდეს მისა და იყენებდეს მას, რაჲთამცა არა წარვიდა მათგან.
ხოლო თავადმან ჰრქუა მათ, ვითარმედ: სხუათაცა ქალაქთა ჯერ-არს ჩემდა ხარებად სასუფეველი ღმრთისაჲ, რამეთუ მისთჳს მოვივლინე.
და ქადაგებდა ყოველთა შესაკრებელთა გალილეაჲსათა.
