Page of ms. P: _ Page of ms. L: 598R და ვითარცა გამოვიდა იგი გზასა, აჰა, ესერა, მდიდარი ვინმე მორბიოდა მისა და მუჴლნი დაიდგნა მის წინაშე, ევედრებოდა მას და ეტყოდა: მოძღუარო სახიერო, რომელი საქმჱ ვქმნე, რაჲთა ცხორებაჲ საუკუნოჲ დავიმკუიდრო?
ხოლო იესუ ჰრქუა მას: რაჲსა მეტყუი მე სახიერებით? არავინ არს სახიერ, გარნა მხოლოი ღმერთი.
მცნებანი იცნი: ნუ კაც-ჰკლავ, ნუ იპარავ, ნუ ცილსა სწამებ, პატივ-ეც მამასა შენსა [და] დედასა შენსა.
ხოლო მან მიუგო და ჰრქუა მას: ესე ყოველი დამიმარხავს სიჭაბუკით ჩემითგან; რაჲღა მაკლს მე?
ხოლო იესუ მიხედა და შეუყუარდა და ჰრქუა მას: უკუეთუ გნებავს სრულ ყოფის, ერთი გაკლსღა შენ: წარვედ და, Page of ms. L: 598V რავდენი გაქუს შენ, განყიდე და მიეც გლახაკთა და გაქუნდეს საუნჯეჲ ცათა შინა.
ხოლო იგი წარვიდა მწუხარე ამის სიტყუისათჳს, [რამეთუ] აქუნდა მონაგები ფრიად.
მიმოიხილა იესუ და ჰრქუა მოწაფეთა თუისთა: ამენ გეტყუი თქუენ: ძნიად შევიდეს მდიდარი სასუფეველსა, რომელსა აქუნდეს საფასჱ.
ხოლო მოწაფეთა დაუკუირდებოდა სიტყუასა ამას ზედა, ხოლო იესუ კუალად მიუგო მოწაფეთა მისთა და ჰრქუა: შვილნო, რავდენ ძნელ არს, რომელნი ესვენ საფასესა შესლვად სასუფეველსა ღმრთისასა!
უადვილეს არს მანქნისსაბელი ჴურელსა ნემსისასა განსლვად, ვიდრე მდიდარი შესლვად სასუფეველსა ღმრთისასა.
ხოლო მათ უმეტესად დაუკუირდებოდა და იტყოდეს ურთიერთას: და ვის ჴელ-ეწიფების ცხორებად?
მიხედა იესუ და ჰრქუა მათ: კაცთა მიერ შეუძლებელ არს, ხოლო ღმრთისაგან ყოველი შესაძლებელ არს.
Page of ms. L: _ Page of ms. P: 292R იწყო პეტრე სიტყუად მისა და ჰრქუა: აჰა ესერა ჩუენ ყოველი დაუტევეთ და შეგიდეგით შენ. Page of ms. P: 292V
მიუგო მათ იესუ და ჰრქუა: არავინ არს, რომელმან დაუტეოს სახლი, გინა ძმანი, გინა დანი, გინა დედაჲ, გინა მამაჲ, გინა ცოლი, გინა აგარაკი ჩემთჳს და სახარებისა ამისთჳს,
უკუეთუ არა მოიღოს ასი წილი აწ ჟამსა ამას სახლი, ძმანი, დანი, დედაჲ, მამაჲ, შვილნი და აგარაკი შემდგომად დევნისა და საუკუნესა მას მომავალსა ცხორებაჲ საუკუნოჲ.
ხოლო მრავალნი იყვნენ პირველნი უკუანა და უკუანანი წინა.
