Page of ms. L: _ Page of ms. P: 315V და დაჯდა იგი მთასა ზეთის-ხილთასა წინაშე ტაძარსა მას, ჰკითხვიდეს მას თჳსაგან პეტრე, იაკობ, იოვანე და ანდრეა:
მითხარ ჩუენ, ოდეს ყოფად არს ესე, და რაჲ იყვნენ სასწაულნი, ოდეს-ესე აღესრულნენ?
მიუგო იესუ და ჰრქუა მათ: ეკრძალენით, ნუ ვინმე გაცთუნნეს თქუენ.
რამეთუ მრავალნი მოვიდოდიან სახელითა ჩემითა და იტყოდიან, ვითარმედ: მე ვარ ქრისტე, და მრავალთა აცთუნებდენ.
რამეთუ რაჟამს გესმოდიან ბრძოლანი და ამბავნი ბრძოლათანი, ნუ შესძრწუნდებით, რამეთუ ჯერ-არს ყოფად, არამედ არღარა არს აღსასრული.
რამეთუ აღდგეს ნათესავი ნათესავსა ზედა და მეუფებაჲ მეუფებასა ზედა. Page of ms. P: 286R და იყვნენ ძრვანი ადგილ-ადგილ და იყვნენ სიყმილნი და სრვანი. ესე ყოველი დასაბამი სალმობათაჲ არს.
და მიგცემდენ თქუენ შესაკრებელსა და კრებულსა შორის გტანჯვიდენ თქუენ, და წინაშე მეფეთა და მთავართა წარგადგინებდენ ჩემთჳს საწამებელად მათა და ყოველთა წარმართთა.
ხოლო პირველად ჯერ-არს ქადაგებაჲ ესე.
და რაჟამს მიგიყვანებდენ თქუენ მიცემად მათა, ნუ წინაჲწარ ჰზრუნავთ, რასა იტყოდით, არამედ რაჲ-იგი მოგცეს თქუენ მას ჟამსა შინა, მას იტყოდეთ, რამეთუ არა თქუენ ხართ მეტყუელნი, არამედ სული წმიდაჲ.
რამეთუ მისცეს ძმამან ძმაჲ სიკუდიდ და მამამმან -- შვილი, და აღდგენ შვილნი მამა-დედათა მათთა ზედა და მოჰკლვიდენ მათ.
და იყვნეთ თქუენ მოძულებულ ყოველთაგან სახელისა ჩემისათჳს. ხოლო რომელმან დაითმინოს იგი სრულიად, ცხონდეს.
