Page of ms. P: 300V და აღმოვიდა იესუ მთასა და მოუწოდა, რომელთაჲ უნდა მას: და მოვიდეს მისა.
და ყვნა ათორმეტნი იგი, რაჲთა იყვნენ იგინი მის თანა და წარავლინნეს იგინი ქადაგებად
და აქუნდეს მათ ჴელმწიფებაჲ განსხმად ეშმაკთა.
და დასდვა სახელები: სიმონს პეტრე,
და იაკობ ზებედესი და იოვანესი, ძმაჲ იაკობისი; და დასდვა მათ სახელი ბანერეგეს, რომელ არს ძენი ქუხილისანი;
ანდრეას და ფილიპეს და ბართლომეს და მათეოზ მეზუერე, და თომა და იაკობ ალფჱსი, და თადეოზ და სიმონ კანანელი
და იუდა სკარიოტელი, რომელმან იგი მისცა.
და მოვიდეს სახლსა, და შეკრბა მისა კუალად ერი, და ვერ ჴელ-ეწიფა მათ ვერცა პურისა ჭამაჲ.
და ესმა მის კერძოთა მათ და გამოვიდეს [შეპყრობად მისა], რამეთუ იტყოდეს, ვითარმედ: განკრთომილ არს.
და მწიგნობარნი იგი, რომელნი იერუსალჱმით შთასრულ იყვნეს, იტყოდეს, ვითარმედ: ბელზებული მის თანა არს, და მთავარითა ეშმაკითაჲთა განასხამს ეშმაკთა.
და მოუწოდა მათ და იგავით ეტყოდა: ვითარ ჴელ-ეწიფების ეშმაკსა ეშმაკისა განსხმად?
და უკუეთუ მეუფებად მეუფებას განევთა, ვერ ჴელ-ეწიფების დამტკიცებად მეუფებაჲ იგი.
და უკუეთუ სახლი სახლსა გა\ნევთა, Page of ms. P: 196V ვერ ჴელ-ეწიფების სახლი იგი დამტკიცებად.
და უკუეთუ ეშმაკი თავსა თჳსსა ზედა აღდგომილ არს და განყოფილ არს, ვერ ჴელ-ეწიფების დამტკიცებად, და აღსასრული აქუს.
და ვერცაღა ჴელ-ეწიფების [შესლვად] სახლსა ძრიელისასა და ჭურჭელი მისი გამოტყუენვად, არა თუ პირველად ძრიელი იგი შეკრან და მაშინღა სახლი მისი გამოტყუენონ.
ამენ გეტყჳ თქუენ, რამეთუ ყოველივე მიეტეოს ძეთა კაცთა ცოდვაჲ და გმობაჲ, რაოდენსაცა ჰგმობდეს.
ხოლო რომელმან თქუას სულისა წმიდისა გმობაჲ, არა აქუს მოტევებაჲ, არამედ თანა-მდებ არს საუკუნესა სასჯელსა,
რამეთუ იტყოდეს, ვითარმედ: სული არაწმიდაჲ თანა არს.
და მოვიდეს ძმანი მისნი და დედაჲ მისი და გარეშე დგეს და მოუვლინეს და გამოხადეს მას.
და სხდა გარემო მისა ერი იგი და ჰრქუეს მას: აჰა დედაჲ შენი და ძმანი შენნი გარე დგანან და გეძიებენ შენ.
მიუგო მათ და ჰრქუა: ვინ არს დედაჲ ჩემი ანუ ვინ არიან ძმანი ჩემნი?
და მიმოიხილა მოწაფეთა მისთა მსხდომარეთა და ჰრქუა: აჰა დედაჲ ჩემი და ძმანი ჩემნი!
რამეთუ რომელმან ყოს ნებაჲ ღმრთისაჲ, ესე არს დედამ ჩემი და ძმანი ჩემნი.
